Baara min bɛ mɔgɔ fanga kuraya
1 Mɔgɔ minnu bɛ sɔn Bibulu kɔnɔ kuma ma, k’a waleya u ka ɲɛnamaya kɔnɔ, a bɛ olu bɛɛ fanga kuraya. (Zab. 19:7, 8) A bɛ u dɛmɛ u ka kalansira nkalonmanw ani kɛwale juguw bila, ka jigiya sɛbɛ sɔrɔ u ka siniɲɛsigi ko la. Nka kibaruya duman bɛ fɔ mɔgɔ minnu ye, olu dɔrɔn de tɛ a tɔnɔ-sɔrɔ-bagaw ye. Mɔgɔ minnu bɛ Bibulu tiɲɛ waajuli kɛ ka mɔgɔw fanga kuraya, olu fana fanga bɛ kuraya.—Nt. 11:25.
2 An barika bɛ kuraya waajuli baara fɛ: Yesu y’a fɔ ko mɔgɔ minnu bɛ sɔn ka kerecɛnya tɔnnajiri ta, o min kɔrɔ fana ye ka waajuli baara kɛ ani ka mɔgɔw kɛ kalandenw ye, olu ‘niw na fanga sɔrɔ ko kura.’ (Mat. 11:29) A yɛrɛ y’a ye ko ka seereya kɛ mɔgɔ wɛrɛw ye, o bɛ mɔgɔ barika kuraya. O tun bɛ a bolo iko dumuni. (Yuh 4:34) Tuma min na a ye kalanden 70 bila a yɛrɛ ɲɛ, u ka taa waajuli kɛ, u ye nisɔndiya sɔrɔ k’a ye ko Jehowa bɛ ka barika don u ka cɛsiriw la.—Luka 10:17.
3 O cogo kelen na bi fana, kerecɛn caman kolo bɛ ka gɛlɛya waajuli baara fɛ. Balimamuso dɔ y’a fɔ ko: “Waajuli baara bɛ mɔgɔ fanga kuraya bawo a bɛ kuntilenna di ne ka ɲɛnamaya ma, wa ne bɛ kun ye ne ka ɲɛnamaya la. Kungow minnu bɛ ne kan, ani jɔrɔ minnu bɛ ne kan don o don, olu bɛ kɛ bolokɔfɛfɛn ye ni ne bɛ waajuli la.” Balimamuso weleweledala timinandi dɔ y’a fɔ ko: “Cidenyabaara. . . bɛ ne hakili jigin ko Jehowa bɛ yen sɛbɛ la ani a bɛ dusu suma di ne ma ani ne bɛ lafiya sɔrɔ, o dun tɛ se ka sɔrɔ sira wɛrɛ fɛ.” Nin ye bɔnya ye an bolo sa, ka kɛ “Ala ka baarakɛɲɔgɔnw” ye!—1 Kɔr. 3:9.
4 Krista ka tɔnnajiri man gɛlɛn: Hali ni a fɔra ko kerecɛnw k’u gɛlɛya, Yesu t’a ɲini an fɛ an ka fɛn kɛ an tɛ se min na. (Luka 13:24) Tiɲɛ na a y’a ɲini yɛrɛ ni kanuya ye ko ‘an ka na ale ka tɔnnajiri jukɔrɔ ni ale ye.’ (Mat. 11:29, sɛbɛnni minnu bɛ Jehowa Seerew ka Bibulu belebele fura ɲɛ duguma.) Gɛlɛyaw bɛ mɔgɔ minnu na, olu tɛ se ka baara caman kɛ. Nka u bɛ se ka da a la k’u bɛ ka u seko damajira min kɛ, o ka di kosɛbɛ Jehowa ye.—Mar. 14:6-8; Kol. 3:23.
5 Mɔgɔ fanga bɛ kuraya dɛrɛ n’i bɛ baara kɛ Ala ye ale min bolo, an bɛ fɛn o fɛn kɛ a tɔgɔ kosɔn, o ye ko ba ye! (Heb. 6:10) An ka an seko damajira bɛɛ kɛ a ye tuma bɛɛ!