“A’ ye ne ka tɔnna jiri da aw kanna”

¹ Diɲɛ falen don kunkow ni jɔrɔnankow la. Nka Yesu ye welekan min lase an ma ni nisɔndiya ye walisa ka lafiya sɔrɔ a ka tɔnna jiri kɔrɔ, an sɔnna o la minkɛ, an ye lafiya yɛrɛ-yɛrɛ de dɔn. (Mat. 11:29, 30) Ka sɔn Yesu ka tɔnna jiri la ka kɛ a ka kalanden ye, nin kow sen bɛ o la: k’an niyɔrɔ kɛ baara la min tɛ cɛsiriba baara dɔrɔn ye dɛ, nka min b’an dusu lafiya fana, ka Masaya kibaru duman fɔ ani ka mɔgɔw dɛmɛ anw ni olu ka lafiya sɔrɔ Yesu ka tɔnnajiri ɲuman kɔrɔ.—Mat. 24:14; 28:19, 20.

² Lafiya min bɛ sɔrɔ cidenyabaara la: Yesu m’a ɲini a ka kalandenw fɛ u ka ale ka doni ta ka fara olu yɛrɛ ka doni kan. A y’a ɲini u fɛ u ka u ka doni girinman falen ale ka doni la min ka fiyɛn. N’u y’o kɛ, u dusu tɛna degun tun ni nin diɲɛ haminankow ni a ka jigitanyakow ye, wa, u tɛna u yɛrɛ sɛgɛn tun baara la nafolo bantaw kosɔn. (Luka 21:34; 1 Tim. 6:17) Hali n’an bolo degunnen don ani ko an ka kan ka baara kɛ walisa ka an ka don o don magoɲɛfɛnw sɔrɔ, Ala bato de nafa ka bon ni fɛn bɛɛ ye an ka diɲɛlatigɛ kɔnɔ. (Mat. 6:33) Ni an bɛ hakili ɲuman to an na fɛnw kan minnu nafa ka bon kosɛbɛ, an bɛna a ye tuma bɛɛ ko an ka cidenyabaara bɛ an dusu lafiya, wa, ko doni girinman tɛ.—Fil. 1:10.

³ Tuma caman na, fɛn o fɛn min b’an ni kan, a ka di an ye ka kuma o kan. (Luka 6:45) Fɛn min ko ka bon kosɛbɛ Kretiɛnw bɛɛ bolo, o ye Jehowa ani dugawuw ko ye, a ka Masaya bɛna minnu lase an ma, ni olu layidu tara a fɛ. O la sa, ka kuma “ko ɲumanw kibaro duman” kan an ka cidenyabaara kɛtuma na, k’an jɔrɔnanko to an kɔfɛ, jɔrɔnanko minnu b’an da la don o don, o b’an dusukun lafiya kosɛbɛ dɛ! (Rom. 10:15, Bibulu senuma 1961) Tiɲɛ don ko n’an bɛ to ka fɛn dɔ kɛ, an bɛ se o fɛn kɛli la ka taa a fɛ, wa, an bɛ nisɔndiya min sɔrɔ o la, o fana bɛ bonya ka taa a fɛ. O la sa, n’an bɛ se ka waati caman kɛ cidenyabaara la, o bɛna dɔ fara an ka lafiya kan. Wa, ni mɔgɔw sɔnna an ka waajuli la, o ye dusu lafiya ye an bolo dɛ! (Kɛw. 15:3) Hali ni an bɛ mɔgɔw sɔrɔ minnu b’a jira ko kibaru duman man di u ye walima minnu b’an kɛlɛ, o bɛɛ n’a ta, cidenyabaara bɛna an dusu lafiya alako ta fan fɛ, n’an b’a to an hakili la ko an bɛ cɛsiri minnu kɛ, olu ka di Jehowa ye ani an bɛ ko duman o ko duman sɔrɔ, an bɛna olu sɔrɔ ale de ka dugawu barika la.—Kɛw. 5:41; 1 Kɔr. 3:9.

⁴ An kɛlen ka sɔn Yesu ka welekan na, an ye bonya sɔrɔ ka baara kɛ a kɛrɛfɛ i ko Jehowa Seere ye. (Esa. 43:10; Jir. 1:5) Fɛn tɛ yen min bɛ se ka mɔgɔ dusu lafiya ka tɛmɛ o kan dɛ!