Kerecɛn ka cidenyabaara —an ka baara bɛɛ la nafama
1 Baara suguya caman bɛ an kelen-kelen bɛɛ bolo an ka kan ka min kɛ. Ka jɔ ni denbaya ka musakaw ye, o ye ko ye, Ala bɛ min wajibiya an ma. (1 Tim. 5:8) Nka o bɛɛ n’a ta, o baara wajibiyalen man kan ka bonya ni Masaya weleweledali baara ye ani ka mɔgɔw kɛ Yesu ka kalandenw ye.—Mat. 24:14; 28:19, 20.
2 Yesu ye ɲɛjiralan to an bolo an bɛ tugu min kɔ, ni o ye ka “Masaya ɲini fɔlɔ.” (Mat. 6:33; 1 Pi. 2:21) Hali ni fɛn bɛrɛ tun t’a bolo, a tun y’a yɛrɛ bɛɛ di a Fa sago kɛli ma. (Luka 4:43; 9:58; Yuh. 4:34) A tun bɛ a jija ka seereya kɛ tuma o tuma a se mana kɛ a ye. (Luka 23:43; 1 Tim. 6:13) A ye a ka kalandenw sɛbɛkɔrɔ laadi u ka u mago sɛbɛ don suman tigɛ baara la.—Mat. 9:37, 38.
3 An ka Yesu ladege bi: An bɛ se ka Yesu ka misali ladege ni an b’an jija ka an ka ɲɛnamaya nɔgɔya, k’a kuntilenna kɛ kerecɛn ka cidenyabaara ye. Diɲɛlatigɛ tɛ taa fɛn minnu kɔ, ni an ye olu sɔrɔ kaban, an ka Bibulu ka kuma lamɛn, o min ko an kana to ka nin diɲɛ fɛnw ɲini ka ton ɲɔgɔn kan. (Mat. 6:19, 20; 1 Tim. 6:8) Min ka fisa kosɛbɛ, o ye k’a ɲini, ka dɔ fara an ka waajuli baara kan! Hali ni an ye gɛlɛyaw sɔrɔ, an ka an jija k’a kɛ iko Yesu, an kana a to diɲɛlatigɛ jɔrɔkow ka bonya ka tɛmɛ an ka baara bɛɛ la nafama kan ni o ye ka Masaya kibaru duman weleweledali kɛ.—Luka 8:14; 9:59-62.
4 Hali mɔgɔ minnu ka baara ka ca, olu bɛ waajuli baara kɛ fɛn bɛɛ la nafama ye. Balimakɛ dɔ min ka denbaya ka bon haali, o bɛ jɔyɔrɔba la a ka baarada la. Ale ye maakɔrɔ ye kerecɛn jɛkulu dɔ kɔnɔ, o de y’a fɔ ko: “Ne ɲɛ bɛ ne ka cidenyabaara la iko ne ka baara dabilabali.” Tutigɛbaga musoman dɔ ko: “Ka kɛ tutigɛbaga ye, o bonya ka bon ka tɛmɛ baara wɛrɛ ta kan.”
5 An ka diɲɛlatigɛ bɛ cogo o cogo la, an ka tugu Yesu ka misali kɔ. Cogo di? An ka an ka kerecɛn ka cidenyabaara kɛ an ka baara bɛɛ la nafama ye.