Ka waajuli kɛ nin diɲɛ kɔnɔ min bɛ ka yɛlɛma tuma bɛɛ

¹ Kow yɛlɛma ka teli dɛ! Suko ni dugujɛ cɛ, ni kasaaraba dɔ kɛra, wala gɛlɛyaba dɔ donna nafolo ɲɛnabɔ siraw la, wala yɛlɛmaba dɔ donna politiki la, wala bɔnɛba dɔ kɛra, min ko bɛ ka fɔ ka caya arajo la, tele la, zurunali la, i bɛ bala ka o kumaw mɛn bɛɛ da. O cogo kelen fana na, mɔgɔw kɔdon man go a ko la, k’u ɲɛsin ko wɛrɛ ma. (Kɛw. 17:21; 1 Kɔr. 7:​31) Nin diɲɛ in kɔnɔ, diɲɛ in min bɛ ka yɛlɛma tuma bɛɛ, an bɛ se ka fɛɛrɛ jumɛnw tigɛ walisa mɔgɔw ka u ɲɛmajɔ kosɛbɛ Kibaru duman cikan fɛ?

² An ka u haminankow ɲini k’a dɔn: Kow minnu bɛ senna bi, mɔgɔw bɛ u ɲɛmajɔ olu de fɛ. A kɛtɔ ka dusu don a lamɛnbagaw la u ka u sɛbɛkɔrɔ miiri u ni Ala cɛ la, Yesu kumana don dɔ la, kasaaraba dɔw kan, minnu tun bɛ u hakili la hali sa. (Luka 13:​1-5) O cogo kelen na, ni an bɛ kibaru duman weleweledali kɛ, a ka ɲi an ka kuma kibaruyaw kan minnu bɛ senna, walima ko kɛlen kan sigida la, min bɛ an ka waajulikɛyɔrɔ kɔnɔ mɔgɔw ɲɛ sira la. Nka ni an bɛ o ɲɔgɔnna barow kɛ, an ka kan k’o kɛ ni ɲɛmajɔ ye walisa an kana politiki jɛkulu wala jamakulu dɔ sankɔrɔta.​—Yuh. 17:16.

³ An bɛ se ka mɔgɔw ka haminankow dɔn cogo jumɛn, tuma min na an ni u bɛ bɛn? A dɔn cogo bɛɛ la ɲuman bɛ se ka kɛ ɲininkali dɔ kɛli ye u la, ka o jaabi lamɛn. (Mat. 12:34) An bɛ an mago min don mɔgɔw la, o bɛna an bila ka dɔ faamu u hakilinaw la, ka ɲininkali kɛ ka taa a fɛ ni fɛɛrɛ ye. So kɔnɔmɔgɔ dɔ bɛ se ka bala ka ko dɔ fɔ, min bɛ se ka kɛ o sigida kelen mɔgɔ caman ka miiriya ye wa o bɛ se ka kɛ waajuli sira dɔ ye.

⁴ N’an bɛ jiracogo dɔ labɛn: Ni an bɛ ka an yɛrɛ labɛn waajuli kama nin diɲɛ in kɔnɔ, diɲɛ in min kow bɛ yɛlɛma tuma bɛɛ, an bɛ se ka baara kɛ ni Comment raisonner gafe ye. Hakilina nafamaw minnu bɛ se ka an dɛmɛ ka bi kow sen don an ka waajuli kɔnɔ, olu bɛ sɔrɔ a ɲɛ 10-​11nan na, dakun na, min tɔgɔ ye “Crime/Sécurité” (kojugukɛ/lakana) ani “Actualités” (ko minnu bɛ sen na). O kunnafoni ɲɔgɔnw bɛ se ka sɔrɔ Sɛtanburukalo san 2000 An ka Masaya Cidenyabaara kɔnɔ, a ɲɛ 4nan na. Ni i bɛ ka kibaru duman jiracogo labɛn, i jija ka Bibulu tɛmɛsira bɛnnen dɔ fara a kan.

⁵ An ka waajulikɛyɔrɔ mɔgɔw ka haminankow bɛ yɛlɛma tuma bɛɛ. Ni an bɛ ka an ɲɛmajɔ o fɛ, an ka kan ka an ka kibaru duman lasecogo bɛrɛ kɛɲɛ u haminankow ma. Ni an taamana o sira kan, an bɛ kuma mɔgɔw fɛ fɛnw kan, fɛn minnu bɛ u dusukun na. O la, an bɛ mɔgɔ caman wɛrɛw dɛmɛ u ka Jehowa dɔn, ale min mankutuw ni a ka sariya sigilenw, tɛ yɛlɛma.​—Yak. 1:​17.