I bɛ jɔyɔrɔ fɔlɔ di fɛn jumɛn ma?
1 Diinɛ caman bɛ sinsin ko ɲumanw kɛli kan, i n’a fɔ ka yɔrɔw jɔ, lakɔli kalan kama, walima furakɛli kama, walima yɛrɛ u bɛ o yɔrɔw jɔli wari bɔ. Hali ni Jehowa Seerew tɛ ɲinɛ ka ‘ko ɲuman kɛ, ka fɛnw tila u ni mɔgɔ wɛrɛw cɛ,’ u bɛ jɔyɔrɔ fɔlɔ di fɛn min ma, o ye mɔgɔw dɛmɛni ye alako ta fan fɛ.—Heb. 13:16.
2 San kɛmɛ fɔlɔ misali: k’a to dugukolo kan, Yesu ye baara ɲuman caman kɛ a ka cidenyabaara kɔnɔna na. Nka, a tun ye jɔyɔrɔ fɔlɔ di baara min ma, o tun ye ka seereya kɛ tiɲɛ ko la. (Luk. 4:43; Yuh. 18:37; Kɛw. 10:38) A ye a nɔfɛmɔgɔw ci u ka ‘taa siyaw bɛɛ la ka u kɛ kalandenw ye . . . Ka u kalan.’ (Mat. 28:19, 20) A y’a jira ko mɔgɔ minnu bɛ dannaya da ale kan, olu bɛna baaraw kɛ minnu bɛ bonya ni ale ka baara kɛlenw ye. (Yuh. 14:12) Yesu tun ye jɔyɔrɔ fɔlɔ di waajuli baara ma, bawo o baara de bɛ mɔgɔw dɛmɛ u ka kisili sira dɔn.—Yuh. 17:3.
3 Ciden Pol tun bɛ a ka waajuli baara mafilɛ ‘wajibi’ ye. Ale bolo, baara don min tun tɛ se k’a kɛ bolokɔfɛko ye. (1 Kɔr. 9:16, 17) A tun labɛnnen don yɛrɛdi sugu bɛɛ kama, ani ka kɔrɔbɔli sugu bɛɛ kun, walima ka gɛlɛya sugu bɛɛ muɲu walisa k’a ka cidenyabaara tiimɛ. (Kɛw. 20:22-24) Ciden Piɛrɛ ni a jɛɲɔgɔnw ye o hakilila sugu kelen jira. Hali ni u donna kaso la, ka tila ka bugɔ, u ma ‘mɔgɔw kalanni ni Krista Yesu kibaru duman fɔli dabila.’—Kɛw. 5:40-42.
4 Anw dun? Yali an bolo, ka Masaya kibaru duman weleweleda, ani ka mɔgɔ kɛ kalandenw ye, o de nafa ka bon ka tɛmɛn baara tɔw bɛɛ kan wa? Yali mɔgɔw hami b’an minɛ i n’a fɔ mɔgɔw hami tun bɛ Yesu minɛ cogo min na, k’u mafilɛ iko ‘fɛn fosi tɛ minnu bolo, ni u jɛnsɛnnen bɛ i n’a fɔ sagaw, gɛnbaga tɛ minnu na’ wa? (Mat. 9:36) Ko minnu bɛ ka kɛ diɲɛ kɔnɔ sisan, ani kiraya kuma minnu bɛ Bibulu kɔnɔ, olu b’a jira k’a jɛya ko nin diɲɛ jugu in bɛna ban sɔɔni. Ni an bɛ a to an hakili la k’a jɛya ko waajuli baara nafa ka bon kosɛbɛ, o bɛna anw bila an ka an timinandiya waajuli la ka taga a fɛ.
5 I k’i ka kow cogoya sɛgɛsɛgɛ: Ikomi tuma caman na, an kelen-kelen bɛɛ ka kow cogoya bɛ yɛlɛma-yɛlɛma, hakilitigiyako don k’a lajɛ tuma ni tuma, ni an bɛ se ka yɛlɛmaw don an ka kow la, walisa an ka dɔ fara an niyɔrɔ kan waajuli baara la. An balimamuso dɔ tun kɛra tutigɛbaga basigilen ye 1950, 1960, ani 1970 sanw kɔnɔna na. Nka, a wajibiyara ka tutigɛbagaya baara jɔ bawo a tun man kɛnɛ. Waati dɔ sera, a fari nana fisaya kosɛbɛ, o la sa, a y’a ka kow cogoya lajɛ kokura. A y’a ye ko a bɛ se ka kɛ tutigɛbaga ye kokura. A kɛra nisɔndiyaba ye a bolo ka se ka tutigɛbagaw ka lakɔli kɛ, k’a sɔrɔ a si ye san 90 ye. E dun? Yali i ka eretirɛti surunyara, walima i bɛna i ka dipulɔmu sɔrɔ a tɛna mɛn tun wa? N’i ka kow cogoya yɛlɛmana, yali o bɛna se k’a to i ka kɛ tutigɛbaga ye wa?
6 Tuma min na Yesu y’a kɔlɔsi ko Marte ‘hakili bɛɛ tun bɛ a ka baara camanbaw de la,’ a y’a fɔ Marte ye ni kanuya ye ko a tun na dugawu caman sɔrɔ ni a y’a ka kow nɔgɔya. (Luk. 10:40-42) Yali i bɛ se k’i ka ɲɛnamaya kɛcogo nɔgɔya i yɛrɛ bolo wa? Yali wajibi don tiɲɛ na, cɛ n’a muso fila bɛɛ ka baara kɛ wa? Ni yɛlɛmaw donna kow la, yali denbaya bɛ se ka balo ni mɔgɔ kelenpe dɔrɔn ka sara ye wa? Mɔgɔ caman ye nafa sɔrɔ alako ta fan fɛ u kɛtɔ ka yɛlɛmaw don u ka kow la, walisa u ka se ka dɔ fara u niyɔrɔ kan cidenyabaara la.
7 Yesu ni cidenw ye misali ɲuman min to an bolo, an bɛɛ k’an jija ka tugu o la. An bɛ se ka da a la tigitigi ko an bɛ cɛsiri minnu kɛ ni kɔnɔnajɛya ye, Jehowa bɛna duba olu ye walisa an k’an seko damajira kɛ Masaya kibaru duman waajuli baara la, ɲɛnamaya dulonnen bɛ o min na. —Luk. 9:57-62.