Don kelen jamalajɛ kɛrɛnkɛrɛnnen ka kalan bolodalen kura

¹ Lakɔli karamɔgɔw, ani kunna­foni sɛbɛnw, arajɔ, telewisiɔn, n’a ɲɔgɔnnaw bɛ nafolo mankutu, k’a jira ko a jɔyɔrɔ ka bon fo ka dama tɛmɛ. Nka, Ala ka Kuma bɛ dusu don an kɔnɔ walisa an ka kɛ “fɛntigi ye wale ɲumanw kɛli la.” (1 Tim. 6:18) Don kelen jama­lajɛ kɛrɛnkɛrɛnnen ka kalan bolo­dalen min bɛna daminɛ san 2002 Sɛtanburukalo la, o kumasenkun bɛna kɛ o de ye. O jamalajɛ bɛna dusu don an kɔnɔ cogo jumɛn na?

² “Ka kɛ fɛntigi ye Ala bolo,” o kɔrɔ ye min ye, kafo lakɔlɔsibaga bɛna o ɲɛfɔ, wa, mɔgɔ minnu bɛ u jija walisa ka kɛ fɛntigi ye alako ta fan fɛ, a bɛna olu dɔw fana ɲi­ninka. Kumana min bɛ na bɔ an ye, o bɛna a jira a ka jɛmukan fɔlɔ la, ko Ala ka jamakulu bɛ ka ‘baara ɲumanw kɛ nin sumantigɛ waati la.’ Dusu bɛna don an bɛɛ kɔnɔ walisa an k’a lajɛ cogo min na an bɛ se ka dɔ fara kosɛbɛ an ka kɛta kan, o sumantigɛ baara la, Ala y’an ci ka o min kɛ.

³ Nisɔndiyaba don an bolo, k’a ye ko an ka denmisɛn minnu ye Kerecɛnw ye, olu bɛ ka tugu alako nafolow kɔ. O bɛ nɔɔrɔ da Jeho­wa kan, ka denmisɛnw dɛmɛ u ka jujo ɲuman sigi waajuli baara wɛrɛw kama. Denmisɛn minnu ye kɛrɛ­cɛnya sira ta, olu ye baara ɲuman minnu kɛ sigida la, o ko bɛna ɲɛfɔ k’a jɛya barokun na, min tɔgɔ ko: “Denmisɛnw fo u ka baara ɲu­manw na katuguni u bɛ ka Je­howa tanu.”

⁴ Ka tugu baara ɲumanw kɛli la, mun bɛ sɔrɔ o la? Kumana min bɛ na bɔ an ye, o bɛna baro kɛ o kan, a ka jɛmu laban na, n’o ye ko: “Baara ɲuman kɛ ka taga a fɛ, ka dugawu sɔrɔ.” A bɛna a jira ko an bɛ dugawu caman sɔrɔ yɔrɔ naani na: (1) an kelen-kelen bɛɛ bɛ dugawu sɔrɔ, (2) denbaya b’a sɔrɔ, (3) jɛkulu b’a sɔrɔ, ani (4) diɲɛ bɛɛ jɛkuluba fana b’a sɔrɔ.

⁵ Mɔgɔ minnu ye u yɛrɛbakun di Jehowa ma, olu bɛna se ka batise. Ni i labɛnnen don o kama, i ka lakɔlɔsibaga ɲɛmɔgɔ ladɔnniya ka­bini sisan.

⁶ Jamalajɛ bɛna kɛ waati min na i sigida la, ni o fɔra, i teliya k’i ka kow labɛn walisa i ka se ka na o la. I jija ka na joona walisa ka bɛn dɔnkili ni delili tuma ma, lajɛ daminɛ na. Ka ye don kelen jama­lajɛ kɛrɛnkɛrɛnnen kɛnɛ kan, k’an tulo­majɔ a kalan bɛɛ la, o bɛna fanga di an ma walisa an ka taga a fɛ ka kɛ fɛntigi ye tiɲɛ na, Jehowa Ala bolo.