Ɲininkaliw Jaabi

◼ An ka kan ka an hakili to mun na, ni an bɛ baara kɛ ni telefɔni selilɛriw ani bipɛriw ye?

A ka c’a la, o fɛn suguyaw b’a to an ka mɔgɔ tɔw lasɔrɔ, an mana kɛ yɔrɔ o yɔrɔ la. Hali n’u nafa ka bon, an k’an kɔlɔsi walisa an kana baara kɛ ni selilɛriw ni bipɛriw ye tumaw la minnu bɛnnen tɛ, ka dɔ bɔ an ka cidenyabaara la walima an ka kerecɛn lajɛw nafa la. Selilɛri ani bipɛri bɛ se ka fiɲɛ bila an ka waajuli, ni an ka lajɛw la cogo di?

An ka miiri ko tuma min na an bɛ ka waajuli kɛ foro kɔnɔ, an ka selilɛri, walima an ka bipɛri ye mankan kɛ. Waajuli bɛ ka kɛ sokɔnɔmɔgɔ minnu ye, olu na mun miiri? Hakilina jumɛn bɛ na mɔgɔw la, ni an ye waajuli jɔ ka selilɛri, walima bipɛri jaabi? An t’a fɛ ka fɛn fosi kɛ min bɛna tɔw bali ka Masaya cikan lamɛn. (2 Kɔr. 6:⁠3) O la sa, ni selilɛri, walima bipɛri b’an bolo, an ka kan ka a labɛn walisa a kana anw bali, walima ka mɔgɔ wɛrɛw bali ka waajuli kɛ foro kɔnɔ.

Ni an bɛ ka balima wɛrɛw kɔnɔ minnu bɛ waajuli la, an bɛ se ka mun kɛ o waati kɔnɔ? N’an ye waati dɔ dabɔ foro cidenyabaara kama, yali a man kan an k’an miiriyaw bɛɛ ɲɛsin o baara ma wa? An ka cidenyabaara senuman in bonya kosɔn, a ɲininen bɛ an fɛ, an ka baara wɛrɛw bila tuma wɛrɛw la. (Rom. 12:⁠7) Tiɲɛ don, o kɔrɔ tɛ ko an man kan ka telefɔni ta walisa ka waajuli kɛ, walima ka waati dɔ boloda ni mɔgɔ dɔ ye walisa ka seereya kɛ o tigi ye.

Kɛrɛnkɛrɛnnenya la, an ka kan k’an ɲɛmajɔ n’an bɛ baara kɛ ni telefɔni ye, k’an to bolimafɛn kɔnɔ, bawo jateminɛw y’a jira ko ka telefɔni ci k’a sɔrɔ i bɛ bolimafɛn kɔnɔ, o bɛ se k’a to kasaara caman ka mɔgɔ sɔrɔ. Sariya o sariya min bɛ an bali ka baara kɛ ni telefɔni ye, k’an to bolimafɛn kɔnɔ, an man kan ka o sariya sɔsɔ.

An bɛ na an ka Kerecɛn lajɛw la, jamalajɛw, ani kafoba ka jamalajɛw la, walisa ka Jehowa bato, ani k’a to a k’an kalan. O kow senuya kosɔn, yali an ka waleɲumandɔn man kan ka an bila an ka selilɛriw ani bipɛriw labɛn cogo la min b’a to u kana an yɛrɛw, ani mɔgɔ si tɔɔrɔ wa? Ni ko teliman dɔ ka kan ka ɲɛnabɔ joona joona, an bɛ se ka bɔ lajɛ kɛyɔrɔ kɔfɛ, ka taa o ɲɛnabɔ. An bɛ se fana ka fɛɛrɛ tigɛ walisa an ka se ka an yɛrɛw ka kow, ani baara wɛrɛw ɲɛnabɔ tuma wɛrɛw la, minnu ma bila bato kama. ​—⁠1 Kɔr. 10:⁠24.

An bɛ baara kɛ cogo min na ni selilɛriw, walima arajominɛn sugu o sugu ye, an k’a to o k’a jira ko an bɛ tɔw bonya, wa ko alakow b’an bolo jɔyɔrɔba la.