A’ ye fara ɲɔgɔn kan cogo la min cɛ ka ɲi, bɛn kɔnɔ
1 Hadamaden farikolo dilanna ka ɲɛ cogo min na, yali o ma i kabakoya tuma caman wa? Farikolo fan kelen kelen bɛ baara kɛ ni fan tɔw ye ka ɲɔgɔn dafa cogoya bɛnnen na. Ala ka kuma bɛ Kerecɛn jɛkulu sanga ni mɔgɔ farikolo ye, min sigilen bɛ ɲɔgɔn kan ka ɲɛ. Yesu bɛ Jɛkulu kun na iko kunkolo bɛ farikolo kan cogo min. Yesu ka fanga jukɔrɔ jɛkulu mɔgɔw bɛɛ ‘faralen bɛ ɲɔngɔn kan cogo la min cɛ ka ɲi bɛn kɔnɔ. Farikolo yɔrɔw dilalen bɛ walisa u ka jɛ ka baara kɛ tugudaw sababu la, u bɛɛ mago ɲɛli kama.’ Jɛkulu kɔnɔmɔgɔw fana bɛ ten. (Efɛ. 4:16a). O cogo de la sa, Jehowa bɛ se k’a ka jamakulu bɛnnen ta ka dakabana kow kɛ.
2 San kɛmɛ fɔlɔ la, Kerecɛn jɛkulu kɔnɔmɔgɔw tun bɛ jɛ ka kow kɛ “ni kan kelen ye,” u tun bɛ ɲɔgɔn dɛmɛ nafolo ani alako sira fɛ (Kɛw. 2:44-47). Jehowa ka dɛmɛ sababu la, u tun bɛ fara ɲɔgɔn kan ka juguyaba kunbɛn, ka o kɛlɛ, ka se sɔrɔ o kan (Kɛw. 4: 24-31). U tagara yɔrɔ o yɔrɔ la, u ye Masaya kibaru fɔ yen. Dugukolo yɔrɔ o yɔrɔ tun dɔnnen bɛ u tile la, u ye kibaru duman fɔ o yɔrɔw bɛɛ la. (Kol. 1:23) Bi Kerecɛn jɛkulu ye o waajuli ɲɔgɔn kɛ kelenya kɔnɔ, wa u ye waajuli kɛ yɔrɔ minnu na, olu ka bon ka tɛmɛ fɔlɔ Kerecɛnw ta kan. Sababu jumɛnw ye kelenya in bange an ni ɲɔgɔn cɛ?
3 Ala ka kalan bɛ ka an sama ka don ɲɔgɔn na: Dugukolo yɔrɔ bɛɛ, an ka bato ye an fara ɲɔgɔn kan ka an kɛ kelen ye. Cogo di? Jehowa ye fɛɛrɛ min tigɛ dugukolo kan walisa ka “Hakilila dumuni di a tuma la,” an bɛ o dɔn, wa an sɔnna o ma (Mat. 24:45). Maakɔrɔw fana nafa ka bon an bolo kosɛbɛ, olu minnu ye jɛkulu karamɔgɔw ye, Jehowa ka “cɛ dilenw.” Jehowa ye fɛɛrɛ min tigɛ an ka hakili la dumuni kama, an sɔnna o ma ni majiginnenya ye. O ye an ka faamuyali bonya Ala ko la. O fana bɛ a to Yesu ladege nege bɛ don an bɛɛ la. An ye ale de ka kalandenw ye. An ka taga a fɛ ka Ala ka kuma kalan, an ka an jija kalan fɛ, ka a kɛ ni sɛbɛ ye walisa ‘kelenya ka don an ni ɲɔgɔn cɛ limaniya kɔnɔ.’ (Efɛ. 4:8, 11-13) Kelenya min bɛ an cɛ alako ta fan fɛ, I bɛ ka o sankɔrɔta ni i ka don o don Bibulu kalan ye wa?
4 Kerecɛn tɔn ye an fara ɲɔgɔn kan: Kanuya de b’an bɛɛ bila an ka fara ɲɔgɔn kan Kerecɛn lajɛw la. O lajɛw la, an bɛ ‘an jan to ɲɔgɔn na.’ (Heb. 10: 24, 25) O kɔrɔ ye ko an kana ɲɔgɔn minɛ yecogo dɔrɔn fɛ, nka an ka tɛmɛ o kan, ka a ɲini ka an balimaw dɔn tiɲɛ yɛrɛ la, k’u filɛ mɔgɔw nafamaw ye, i na fɔ Jehowa yɛrɛ b’u ye cogo min na. (Ag. 2:7) N’an bɛ an tulomajɔ tuma min na u b’u ka limaniya jira, u ka kumaw fɛ, o bɛ dɔ fara an ka kanuya kan ka ɲɛsin u ma, ka an ka kelenya barika bonya. Yali e dɔnnen bɛ mɔgɔ ye min bɛ na jɛkulu ka lajɛw bɛɛ la wa?
5 An baarakɛɲɔgɔnw foro kɔnɔ: Ka kibaru duman waajuli kɛ ni an batokɛɲɔgɔnw ye, o bɛ kelenya don an ni ɲɔgɔn cɛ, Ala sago kɛli la. Ciden Pol tun bɛ nisɔndiya haali ni “a baarakɛɲɔgɔnw ye Ala ka Masaya kosɔn.” (Kol. 4:11) An ye dɔnniya minnu sɔrɔ waajuli senfɛ, ni an bɛ o dɔnniyaw tila an ni ɲɔgɔn cɛ, ka ɲɔgɔn dɛmɛ waajuli kɔnɔ, o bɛ an dɛmɛ ka an ka Kerecɛnya baara kɛ, ka an ka kelenya kologɛlɛya. (Kol. 3:14)
6 Se min bɛ Hakili senu ye ka kelenya don an ni ɲɔgɔn cɛ: Ni an ye an yɛrɛ di Jehowa sago kɛli la, a bɛ a ka hakili senu di an ma. O b’an dɛmɛ ka an ka ɲɔgɔn famubaliyaw nɔgɔya, ka an dɛmɛ an ka sigi ɲɔngɔn fɛ kelenya kɔnɔ. (Zab.133:1) A b’an bila an ‘ka an jija ka an hakiliw kɛ kelen ye bɛn kɔnɔ.’ (Efɛ. 4:3). An bɛɛ kelen-kelen bɛ se ka dɔ fara bɛn kan Ala ka jamakulu kɔnɔ ni an bɛ hakili senu denw waleya an ni ɲɔgɔn cɛ. (Gal. 5:22, 23).
7 Ka baara kɛ ɲɔgɔn fɛ kelenya kɔnɔ, Yesu ka kuntigiya jukɔrɔ, o bɛ jɛkulu ‘farikolo yiriwa, ka a jɔ ka taga a fɛ, kanuya kɔnɔ.’ (Efɛ. 4:16b) Ka fara o bɛɛ kan, a bɛ nɔrɔba da Jehowa kan, ale min ye “Ala ye min bɛ hɛrɛ di.” Rom. 16:20