Ka caman dan, o bɛ na ni dugawu caman ye
1 Layidu minnu bɛ Ala ka Kuma kɔnɔ, an bɛɛ bɛ olu tiimɛni makɔnɔna ni nisɔndiya ye. Hali bi, Jehowa bɛ dugawu caman lase an ma walisa ka dɔ fara an ka nisɔndiya kan an ka ɲɛnamaya kɔnɔ . O n’a ta o ta, an kelen-kelen bɛɛ ka dugawuw cayali bɛ bɔ an yɛrɛ ka cɛsiri la haali. I ko ciden Pol y’a sɛbɛn cogo min na, ‘min bɛ suman caman dan, o na suman caman tigɛ.’ (2 Kɔr. 9:6). An ka o sariyakolo waleya yɔrɔ fila lajɛ.
2 An yɛrɛ ka cidenyabaara: Ka kibaru duman fɔ mɔgɔw ye, tuma min na a se b’an ye k’o kɛ, o bɛ dugawu caman lase an ma (Nt. 3:27, 28) An balima caman bɛ ka dani caman kɛ cogoya la min ni tanuli ka kan, u bɛ ka dɔ fara u ka cidenyabaara kan, dɔw kɛra tutigɛbaga farankanw ye, dɔw kɛra tutigɛbaga basigilenw ye .. An bɛɛ bɛ se ka danni caman kɛ ni an b’an janto sɛbɛ la ka segin ka taa bɔ mɔgɔw ye, kibaru duman mɛnni diyara minnu ye, walisa, an ka se ka olu ka ɲɛtaa kɔkɔrɔdon; ani n’an bɛ bibulu kalan dabɔ ni mɔgɔw ye tuma bɛnnen la . (Rom. 12:11) N’an b’an yɛrɛ jagoya nin siraw kan, o bɛ na ni sekow ani dɔnkow sɔrɔli ye cidenyabaara kɔnɔ, o bɛ dusu don an na, ka dɔ fara an ka ninsɔndiya kan .
3 An ka Ala ka Masaya kɔkɔrɔdon: Pol ye ‘dani caman’ ɲɛfɔli kɛ ka ɲɛsin nafoloma fɛnw ɲili ma. (2 Kɔr. 9:6, 7, 11, 13) Bi an bɛ se ka caman kɛ bolofɛn dili sira fɛ ani yɛrɛdili sira fɛ, walasa ka Masaya ko ɲasiraw kɔkɔrɔdon. An bɛ se ka dɛmɛ don Masaya Sow ani Jamalajɛw Sow jɔli la. An bɛ se k’a bɔ an yɛrɛ la fana k’an sen don bato lakika kɛyɔrɔw saniyali la, k’u ladon. Ka fara o kan, an bɛ se ka wari dɔ di an ka jɛkulu ka musakaw kosɔn iko an b’o kɛ cogo min na, diɲɛ mumɛ ka Masaya waajuli ni kalandenw kɛli baara ko la . N’an bɛɛ b’an nyiyɔrɔ kɛ; a bɛ kɛ nisɔndiyaba ye, ka Jehowa ka dugawuw camanba nɔ ye nin baara in kan, Ala y’an ci k’o min kɛ.—Mal. 3:10; Luk. 6:38.
4 Ala ka Kuma bɛ dusu don an kɔnɔ ka ‘ko ɲuman kɛ, ka kɛwale ɲuman caman kɛ, ka nili kɛ, k’an labɛn ka tilali kɛ ni tɔw ye.’ N’an b’an jan to o kankaridakan na, an na nisɔndiya ni dugawu caman ye sisan. O tuma kelen na fana, an bɛ ‘jusigi ɲuman sɔrɔ an yɛrɛ ye yɔrɔ lakananen na, siniɲɛsigi ni ɲɛnamaya sɛbɛ nata kama’.—1 Tim. 6:18, 19.