Ɲɔgɔn dusulamin kɛrɛnkɛrɛnnen
1 O don tɛ tɛmɛn ni Jehowa ka jamakulu ka limaniya tɛ kɔrɔbɔ. Ikomi Sendonbaga b’a dɔn ko a ka waati tɔ man jan tun, a bɛ kɛlɛ jugu laban dɔ wuli walasa k’an ka kantigiya cɛn Jehowa fan fɛ. (Jir. 12:12) O kosɔn, a nafa ka bon kosɛbɛ an ‘ka taa a fɛ ka an barika bonya Matigi ni a ka sebagayaba la,’ walasa ‘an ka se ka an kologɛlɛya don juguw la, ani an kɛlen kɔ ka kow bɛɛ kɛ k’a dafa, an ka se ka an banban.’—Efe. 6:10, 13.
2 Anw ani an balimaw ka ɲɔgɔn lajɛ, o ye Jehowa ka fɛɛrɛ tigɛlen ye walasa ka an dɛmɛ ka fanga sɔrɔ. Ciden Pol tun bɛ o nafa dɔn. A tun ka di a ye, ale ni a balima Kerecɛnw ka ɲɔgɔn lajɛ walasa u ka se ka ɲɔgɔn dusu lamin, ka ɲɔgɔn ‘sabati.’ (Rom. 1:11, 12) Walasa an fana ka nafa sɔrɔ dusulamin na ka bɔ an balimaw yɔrɔ, Ɲɛmɔgɔ Kulu ye kafoba ka jamalajɛ dɔ labɛn, n’o ye ko: “Masaya weleweledala timinandiw.” A ye o kɛ ni kanuyaba ye ka ɲɛsin an ma walasa an ka se ka Ala sago kɛ.
3 An ka kɛ yen walasa ka nafa sɔrɔ: A kɛ i kuntilenna ye ka na jamalajɛ tile saba bɛɛ la. A ‘nafa’ bɛ an yɛrɛw de kan, ni an bɛ na joona sanni dɔnkili fɔlɔ ka da, wa, n’an bɛ to yen fana fo ka se k’a fɔ ‘Amina,’ ni kɔnɔnajɛya ye, delili laban na. (Esa. 48:17, 18) Mɔgɔ caman ka kan ka kɔn k’u ka baara labɛn walasa u ka se ka waati sɔrɔ ka na tile saba bɛɛ la. Laala, aw ka patɔrɔn bɛna gɛlɛya don aw naliko la jamalajɛ la, nka, Jehowa y’a jira ko ale bɛna an dɛmɛ an ka se k’ale sago kɛ. (1 Yuh. 5:14, 15) Ni aw ma fɛɛrɛ jɔnjɔn si tigɛ fɔlɔ taransipɔri ani jigiyɔrɔ ko la, sisan de y’a waati ye k’o kɛ. An kana miiri ko kow bɛna kɛ u yɛrɛma. An bɛ cɛsiri minnu kɛ, an ka da a la ko Jehowa bɛna barika don olu la walasa an ka se ka na a tile saba bɛɛ la —Nt. 10:22.
4 An bɛna dusulamin kuma minnu mɛn, an ka miiri olu la kabini sisan: Yali i ma deli ka bɔ jamalajɛ dɔ la, ka tila k’a fɔ ko: ‘Nin ɲɔgɔn lajɛ duman ma deli ka kɛ!’ Mun na i miirila o cogo la? Ikomi an ye hadamaden dafabaliw ye, an fanga bɛ se ka ban dɔɔnin dɔɔnin, fo tɔ si tɛ an na tun. O tumaw la, an b’a ye ko an mago bɛ dusulamin na alako ta fan fɛ. (Esa. 40:30) An balimamuso dɔ y’a fɔ ko: “Diɲɛ in kosigicogo bɛ ne barika ban, nka, jamalajɛ bɛ ne dɛmɛ ka ne miiricogo latilen alako ta fan fɛ. Ka fara o kan, ne mago bɛ fanga min na alako ta fan fɛ, ne bɛ o sɔrɔ. Ne y’a jateminɛ ko ne mago bɛ dusulamin na kosɛbɛ waati min yɛrɛ la, o waati yɛrɛ la, dusulamin bɛ na ka bɛn o ma ten tigitigi.” A ka c’a la, k’o ɲɔgɔn ye e fana sɔrɔ ka tɛmɛn.
5 An mago bɛ dusulamin min na alako ta fan fɛ, an tɛ o sɔrɔ jɛmukanw, ani mɔgɔw ɲininkaliw dɔrɔn fɛ, nka, an b’o sɔrɔ fana an ka jamalajɛw ko caman wɛrɛw fɛ, ko minnu bɛ nafa lase an ma alako ta fan fɛ. An balimakɛ dɔ ko: “Bibulu sariyakolow waleyali cogo jɛlen na, ani cogo nafama na, o de ka di ne ye kosɛbɛ. Siga t’a la ko daramu (kɔtɛba) fana nafa ka bon yɛrɛ de, bawo ko minnu kɛra fɔlɔ la, a bɛ o ɲuman ni o juguman jira, an bɛ se ka kalansiraw nafama sɔrɔ minnu na. Ne kɔrɔtɔlen sigilen bɛ sɛbɛn kuraw makɔnɔ tuma bɛɛ, wa, ne seginnen kɔ so, ne bɛ u kalan ni nisɔndiya ye fo ka mɛn.”
6 An ka ‘waati gɛlɛn in na,’ kafoba ka jamalajɛw ye Jehowa ka ko sigilen ye min nafa ka bon kosɛbɛ an ka ɲɛnamaya la. (2 Tim. 3:1) U b’an dɛmɛ an ka tugu Jehowa ka nin laadilikan in na, ko: ‘Aw ka to a ɲɛ na. Aw banbannen ka to limaniya la. Aw ka kɛ cɛw ye, aw ka barika sɔrɔ.’ (1 Kɔr. 16:13) O la sa, an k’a bɔ an yɛrɛ la ka na jamalajɛ tile saba bɛɛ la, tile kuuru bɛɛ la, wa, fosi kana an bɔ o kan, walasa an ka dusulamin ɲɛnama sɔrɔ an ka Kafoba ka jamalajɛ la, min tɔgɔ ye ko: “Masaya weleweledala timinandiw”.
[Box on page 3]
A boloda ka na jamalajɛ tile saba bɛɛ la
■ A ɲini i ka patɔrɔn fɛ a k’i labila o waati kɔnɔna na
■ Jamalajɛ bɛ kɛ dugu min kɔnɔ, i ka soden dɔ maminɛ o yɔrɔ la.
■ I bɛ taga cogo min na jamalajɛ la, o ko ɲɛɲini.