Yala i bɛ Wajibiya gafenin kɛ ka Bibulu kalan daminɛ wa?
1 Bibulu kuma ka di mɔgɔ min ye, n’i ye waati boloda baro kama n’o tigi ye, ka o baro kɛ ni kalan fɛɛrɛ ye, k’a sinsin gafe kan min sɛbɛnna Bibulu kalan kama, hali n’o ma kɛ baro kuntaala jan ye, yala i b’a dɔn ko o ye Bibulu kalan daminɛnen ye n’o tigi ye wa? Sɛbɛ la, Bibulu kalan de don hali ni baro bɛ ka kɛ so dakun de la, walima telefɔni la. Mun na e tɛna cɛsiri jɔnjɔn kɛ ka o Bibulu kalan cogo daminɛ ni Wajibiya gafe ye Mɛ ni Zuwɛn kalow la ?
2 I yɛrɛ labɛn walasa i ka ɲɛtaa sɔrɔ: N’i bɛ Wajibiya gafenin jira, i b’a fɛ ka kuma barokun min kan i ka o dɔn kosɛbɛ. N’i bɛ segin ka taa bɔ mɔgɔ ye, i miiri aw ka barokun tɛmɛnnen la. I yɛrɛ ɲininka, i ka kan ka i sinsin gafenin dakun jumɛn de kan, k’o walanwalan walasa o laban ka kɛ Bibulu kalan ye. N’i bɛ wajuli kɛ so ni so, barokunw jateminɛ, minnu ka di kamalenin ye, ani minnu ka di musomanin ye, ani minnu ka di maakɔrɔba ye, ani minnu ka di cɛ ye walima muso ye. Barokun kolomaw minnu bɛ gafenin kɔnɔ, olu bɛɛ jateminɛ, i ka dɔ ɲɛnatɔmɔ min bɛna diya mɔgɔw ye. I bɛna i donkan kɛ min ye, n’i ye o latigɛ, i yɛrɛ dege o la siɲɛ caman. O ye i ka ɲɛtaa konɛgɛw dɔ la kelen ye.
3 Zanwuyekalo san 2002 An ka Masaya Cidenyabaara min bɔra, o farankan kɔnɔ, Wajibiya gafenin jiracogo seegin bɛ yen. Dakun min tɔgɔ ye “ka sin ka Bibulu kalan ko fɔ,” o dakun b’a jira gafenin bɛ kɛ ka Bibulu kalan daminɛ cogoya min na. I bɛ se ka nin yɛlɛma don jiracogo fɔlɔ la:
◼ “E b’a dɔn ko sanga dama dɔrɔn kɔnɔ i bɛ se ka ɲininkaliba dɔ jaabi sɔrɔ ka bɔ Bibulu kɔnɔ wa? Misali la, mun na diinɛ caman b’a fɔ k’u ye Kerecɛnw ye? Yali i m’a deli ka miiri o la wa? N’i barokɛɲɔgɔn ye jaabi di, gafenin dayɛlɛ barokun 13 nan la, i ka baro kɛ dakun fɔlɔ ani filanan kan. N’a waati b’aw bolo, aw ye Bibulu tɛmɛsira kelen walima fila kalan. O kɔ, ɲininkali laban kalan sɛbɛnfura daminɛ na, k’a fɔ ko: Kalan tɔ bɛ taamasiyɛn duuru de kofɔ minnu bɛ diinɛ sɛbɛ danfara ka bɔ diinɛ tɔw la. A ka di n ye ka na baro kɛ o kan n’i ye siɲɛ wɛrɛ”.
4 I timinandiya a fɛ: Tuma minnu na, n’a bɛ se ka kɛ, Bibulu kalan ɲɛjira mɔgɔw la ni Wajibiya gafenin ye. Dugawu ɲini Jehovah fɛ. (Mat. 21:22) N’i y’i timinandiya baara in na, nisɔndiya min bɛ mɔgɔ wɛrɛ dɛmɛni na, a ka sɔn kibaru duman la, i na o dɔn.