An ka limaniya b’an bila ka baara ɲumanw kɛ
1 Dannaya ye Nuhun ni Musa ani Rahab bila ka baara ɲuman kɛ. Nuhun ye kurunba dila. Waatinin-dɔ-kɔnɔ nafa minnu tun bɛ Musa bolo Faraon ka so kɔnɔ, a jɛnna olu bɛɛ kɔ. Musa ye mɔgɔ minnu ci ka taa jamana cogo lajɛ, Rahab fana ye olu dogo, ka tugu u ka ci fɔlenw na. A y’a somɔgɔ kisi o cogo la. (Heb. 11:7, 24-26, 31) An ka limaniya bɛ se k’an bila ka baara ɲuman jumɛnw kɛ bi?
2 Ka seereya kɛ: Limaniya b’an bila ka kuma an ka Ala dakabana in ko la. A b’an bila fana ka kuma a ka fɛɛrɛ tigɛlenw ko la minnu bɛ hɛrɛ banbali lase an ma. (2 Kɔr. 4:13) An bɛ se ka siga tuma dɔw la ka seereya kɛ, nka, ‘ni Jehowa b’an ɲɛkɔrɔ tuma bɛɛ,’ an bɛ fanga sɔrɔ, wa dɔ bɛ bɔ an ka siran na. (Zab. 16:8) O la sa, an ka limaniya bɛna an bila ka kibaru duman fɔ an balimaw ye, ani sigiɲɔgɔnw, ani baarakɛɲɔgɔnw, ani kalankɛɲɔgɔnw, ani mɔgɔ wɛrɛw ye, k’a bɛn a waati ma.—Rom. 1:14-16.
3 An ka ɲɔgɔn lajɛ: Ka na lajɛw la tuma bɛɛ, o ye ko ɲuman wɛrɛ ye an ka limaniya b’an bila ka min kɛ. Cogo jumɛn na? O b’a jira ko an dalen b’a la tigitigi ko ni anw ni an Kerecɛnw ɲɔgɔn lajɛlen bɛ tuma o tuma, Yesu bɛ anw cɛma o tuma la, Ala ka hakili senu barika la. (Mat. 18:20) O b’a jira ko a ka di an ye tiɲɛ na k’a ‘mɛn hakili senu bɛ min fɔ jɛkuluw ye.’ (Jir. 3:6) An bɛ dɔnniya min sɔrɔ o yɔrɔ la, an bɛ o ta an sɛbɛ la, bawo limaniya sababu la, an b’a faamu ko an Karamɔgɔba Jehowa de bɛ k’an kalan.— Esa. 30:20.
4 An bɛ sugandili minnu kɛ: N’an dalen bɛ tigitigi tiɲɛ kow la, ɲɛkisɛ tɛ se ka tiɲɛ ko minnu ye, o bɛna an bila ka alakow to jɔyɔrɔ fɔlɔ la an ka ɲɛnamaya kɔnɔ. (Heb. 11:1) Tuma caman na, o kɔrɔ ye ka kaari nafolokow kɔ. Misali la, jɔyɔrɔba dɔ tun dira maakɔrɔ dɔ ma a ka baarakɛyɔrɔ la. O jɔyɔrɔ tun bɛ sɔrɔ sira dayɛlɛ a ye. Nka, ikomi o tun bɛna a to lajɛ dɔw ka fɔ a kɔ, k’a yɔrɔ janya a ka denbaya la, k’a ka tutigɛbagaya baara fana jɔ, a y’i ban o jɔyɔrɔ la. An fana ka an ka dannaya da Bibulu kɔnɔkuma kan, ko mɔgɔ minnu bɛ ‘taa a fɛ ka Masaya ni tilennenya ɲini fɔlɔ,’ Ala bɛna olu ka dahirimɛ nɔgɔya u ye.—Mat. 6:33.
5 Barikaba min bɛ an ka limaniya ye k’an ka ɲɛnamaya ɲɛminɛ, o tɛ to dogo la, bawo mɔgɔ wɛrɛw bɛ o kɔlɔsi. O kosɔn an ka dannaya dɔnnen don dugukolo yɔrɔ bɛɛ la. (Rom. 1:8) O la sa, an bɛɛ ka se k’a jira an ka baara ɲumanw fɛ ko limaniya min bɛ an na, o ye limaniya ɲɛnama ye.—Yak. 2:26.