Denbayaw bɛ se ka basigi alako la cogo di?
1 Foli bɛ Krecɛnw ka denbayaw ye bawo ‘u nɔrɔlen bɛ Ala la u ka du kɔnɔ.’ (1 Tim. 5:4) Nka, ikomi kojuguw bɛ k’an lamini, o bɛ se ka an ka dannaya barika dɔgɔya. O kosɔn a nafa ka bon kosɛbɛ denbayaw ka baara kɛ ɲɔgɔn fɛ walasa u ka to mɔgɔ basigilenw ye alako ta fan fɛ. O bɛ se ka kɛ cogo di?
2 Kuntigiya kɛ iko Krista b’a kɛ cogo min na: Dutigiw ka kan ka Yesu Krista ladege u jɔyɔrɔ fa cogo la, n’u bɛ ka u ka denbaya barika bonya alako ta fan fɛ. Yesu ma a ka kanuya jira an na siɲɛ kelenpe dɔrɔn a ka saya fɛ, nka, a bɛ taga a fɛ ka jɛkulu ‘balo, k’a minɛ koɲuman.’ (Efe. 5:25-29) Bangebaga minnu bɛ u ka denbaya kanu, olu fana bɛ tugu o misali la, k’u ka denbaya minɛ koɲuman don o don alako ta fan fɛ. O kɔrɔ ye k’u bɛ u ka denbaya ka Bibulu kalan ɲɛminɛ dɔgɔkun o dɔgɔkun. O kɔrɔ ye fana ko denbaya kɔnɔmɔgɔw bɛna Alako baro ɲɛnamaw kɛ ɲɔgɔn fɛ, tuma caman na. Ni kunkow nana u ma, u na teliya ka olu ɲɛnabɔ.—Dut. 6:6, 7.
3 Foro cidenyabaara la: Denbaya kɔnɔmɔgɔw bɛɛ ka kan k’a faamu ko ka mɔgɔ wɛrɛw waju Jehowa ni a sagonataw ko la, o ye u ka bato kɔnɔko nafama dɔ ye. (Esa. 43:10-12) Aw minnu ye bangebagaw ye, ni aw b’a fɛ aw denw ka kɛ Jehowa Seere kantigiw ye, aw ka kan k’a daminɛ joona k’u dusukun labɛn cidenyabaara kama. An ka kan ka an yɛrɛ di wajuli ma, ka an sen don o la dɔgɔkun o dɔgɔkun kun minnu na, baro kɛ o kan. (Mat. 22:37-39) O kɔfɛ, aw ka kow labɛn walasa aw ni u ka se ka wajuli kɛ ɲɔgɔn fɛ tuma bɛɛ foro cidenyabaara la.
4 Nafa min bɛ wajuli baara la, aw ye aw ka denbayaw dɛmɛ fana u k’o faamu, aw kɛtɔ ka waati dɔ boloda denbaya ka dɔgɔkun kalan kɔnɔna na, walasa ka ɲɛjirali nafama dɔ labɛn, ka segin o kan, fo u ka se o la. Aw ka aw den kelen-kelen bɛɛ dege cidenyabaara la, k’u dɛmɛ u ka taa ɲɛ, ka kɛɲɛ ni u si hakɛ ni u seko ye. Ni aw ni aw denw tilara wajuli la tuma min na, a ɲini k’a dɔn u ye Jehowa ka ɲumanya lasaa cogo min na. Ko minnu kɛra wajuli la n’u bɛ dɔ fara mɔgɔ ka dannaya kan, aw k’olu fɔ. Denbaya b’a ‘nɛnɛ k’a dɔn cogo min na Jehowa ka ɲi’, u bɛ gɛrɛ a la ten fana, wa, o bɛ fanga di u ma ka ‘kojugu bɛɛ’ kɛlɛ.—1 Piɛ. 2:1-3.
5 Lajɛw la: Ni denbaya kɔnɔmɔgɔw bɛ ɲɔgɔn dɛmɛ ka taa jɛkulu lajɛw bɛɛ la, janko ni u dɔ la kelen sɛgɛnnenba don, walima ni dɔ dusutiɲɛnen bɛ, walima n’o kɔnɔgannen don, o ye koɲumanba ye. An balimamuso denmisɛn dɔ ye nin kɔlɔsi a fa ko la, a ko: “Ni ne fa nana ka bɔ baarakɛyɔrɔ la, a sɛgɛnnen bɛ, nka, baro bɛna kɛ kalan min kan o su, ne bɛ o yɔrɔ nafama dɔ fɔ a ye, o bɛ dusu don a kɔnɔ a ka taa lajɛ la. Ni ne fana sɛgɛnnen bɛ tuma min na, ale de bɛ dusu don ne kɔnɔ ka taa lajɛ la.’—Heb. 10:24, 25.
6 Ka baara kɛ ɲɔgɔn fɛ: Denbayaw ka kan ka fɛnw kɛ ɲɔgɔn fɛ, i n’a fɔ sokɔnɔ baaraw. Waati ka kan ka bila fana ɲɛnajɛ sugandilen ɲumanw kama. Ka taa pikiniki la, ka taa yaala, denbaya k’a ɲɛnajɛ ni tulonkɛfɛnw ye, ka taa bɔ balimaw, walima teriw ye, o fɛnw bɛɛ bɛ se ka kɛ waati dumanw ye, ani ka kɛ ko tɛmɛnnenw ye, u bɛ se ka miiri min ma ni nisɔndiya ye.—Waaj. 3:4.
7 Gɛlɛya minnu bɛ Krecɛnw ka denbayaw ka alamɔgɔya kɛlɛ don o don, u bɛ olu kunnasagon. U kɛtɔ k’u gɛrɛ kosɛbɛ Jehowa la, u b’a ye ko Ala b’a ka fanga di u ma.—Efe. 6:10.