Denbaya ka jɛ ka Jehowa bato ɲɔgɔn fɛ
1 Bibulu sɛbɛnwaati la, denbaya kɔnɔmɔgɔw tun bɛ fɛn caman kɛ ɲɔgɔn fɛ. Baara minnu tun ka kan ka kɛ don o don, u tun bɛ o kɛ ɲɔgɔn fɛ, wa, fɛn min nafa tun ka bon n’a bɛɛ ye, ni u tun bɛ jɛ k’o kɛ ɲɔgɔn fɛ, o ye ka Jehowa bato. (Lev. 10:12-14; Dut. 31:12) Bi yɔrɔ caman na, denbaya kɔnɔmɔgɔw tɛ fɛn bɛrɛ kɛ ɲɔgɔn fɛ. O bɛɛ n’a ta, Kretiɛnw b’a dɔn nafa min b’a la denbaya ka jɛ ka baara kɛ ɲɔgɔn fɛ, kɛrɛnkɛrɛnnenya la bato la. Denbaya Sigibaga ka denbayaw ye ka ale bato kelenya kɔnɔ, siga t’a la ko o b’a nisɔndiya kosɛbɛ.
2 Denbayaw, aw ka waajuli kɛ ɲɔgɔn fɛ: Ni denbaya bɛ jɛ ka baara kɛ ɲɔgɔn fɛ kibaru duman waajuli la, o bɛ kelenya sinsin denbaya kɔnɔ. O kosɔn, ka fara a ka waajuli kan jɛkulu kɔnɔmɔgɔw fɛ, maakɔrɔ ka kan ka fɛɛrɛ tigɛ walisa ale ni a muso ni a denw fana ka waajuli kɛ ɲɔgɔn fɛ tuma bɛɛ. (1 Tim.3:4, 5) K’a sɔrɔ baara camanba de bɛ lakɔlɔsibaga-taamakɛlaw bolo ka kɛ, hali olu bɛ waati boloda walisa olu ni u musow ka cidenyabaara kɛ ɲɔgɔn fɛ.
3 Bangebaga minnu ni u denw bɛ waajuli kɛ ɲɔgɔn fɛ, olu bɛ se k’u denw dɛmɛ u ka kɛ kibaru duman fɔbagaw ye minnu bɛ taa ɲɛ. Bangebagaw bɛ nisɔndiya ni wasa minnu sɔrɔ cidenyabaara la, denmisɛnw tɛna o dɔrɔn ye, nka u bɛna a ye fana bangebagaw bɛ u ka kanuya jira cogo min na Jehowa fan fɛ ani u mɔgɔɲɔgɔn fan fɛ. (Dut. 6:5-7) Ni bangebagaw ni u denw bɛ jɛ ka waajuli kɛ ɲɔgɔn fɛ, nafa min bɛ o la, dɔ tɛ bɔ o la ni denw bɛ ka kɔrɔbaya k’u to so kɔnɔ. Denkɛ saba bɛ cɛ dɔ ni a muso bolo minnu si hakɛ bɛ san 15 ni san 21 cɛ. U bɛ u denw bilasira tuma bɛɛ walisa u ka waajuli kɛ ɲɔgɔn fɛ. Cɛ ko: “Ni anw ani an denw bɛ waajuli kɛ ɲɔgɔn fɛ tuma o tuma, an bɛ u kalan fɛn dɔ la. An bɛ ko bɛɛ kɛ walisa an ye waajuli baara min kɛ ɲɔgɔn fɛ, o ka diya, wa o ka dusu don an kɔnɔ.
4 Denbaya ka waajuli baara labɛn ɲɔgɔn fɛ: Denbaya caman y’a ye ko nafa b’a la u ka jɛ ka cidenyabaara labɛn ɲɔgɔn fɛ. Tuma caman na, a ka di denmisɛnw ye olu ni denbaya kɔnɔmɔgɔw ka u ka kuma fɔtaw ni u fɔcogo labɛn ɲɔgɔn fɛ, ka segin o kan siɲɛ caman u ni ɲɔgɔn cɛ, kelen b’a yɛrɛ kɛ waajulikɛla ye, tɔ kelen b’a yɛrɛ kɛ lamɛnbaga ye, ani ka o bɔ ɲɔgɔn kɔrɔ. Denbaya dɔw bɛ miniti damadɔw ta ka o kɛ u tilalen kɔfɛ u ka denbaya ka kalan na.
5 An bɛ mɔgɔ minnu kanu, ni anw ni olu bɛ ka baara nafamaw kɛ minnu bɛ mɔgɔ wasa, an ka nisɔndiya bɛ bonya kosɛbɛ. Denbaya kɔnɔmɔgɔw ka jɛ ka baara kɛ ɲɔgɔn fɛ foro cidenyabaara la so ni so, ka segin ka taa bɔ mɔgɔw ye ɲɔgɔn fɛ, ani ka Bibulukalanw ɲɛminɛ ɲɔgɔn fɛ, o ka di sa! Nin o cogo de la, e ani i ka denbaya bɛ Jehowa bato, i nisɔndiyalen bɛ se k’a fɔ ko: “Ne kɔni, ne ni ne ka so mɔgɔw na baara kɛ Matigi ye.”—Jos. 24:15.