Cɛ dilenw labɛnnen don ka Ala ka jamakulu ladon
1 Jehowa y’an kanu ka ‘cɛw di’ an ma walasa u ka an dɛmɛ. A y’o kɛ a Denkɛ sababu fɛ. (Efɛ. 4:8, 11, 12) O ‘cɛ dilenw’ bɛ baara sifa caman kɛ. A dɔ ye ka Ala ka jamakulu ladon ni timinandiya ye. (1 Pi. 5:2, 3) O dɛmɛ nafa ka bon kosɛbɛ. An bɛɛ bɛ se ka hɛrɛ sɔrɔ o la. Mɔgɔ dɔw bɛ gɛlɛyaw la, dɔw ye mɔgɔ kuraw ye jɛkulu kɔnɔ, dɔw dɛsɛlen bɛ ka taama sira tilennen kan, dɔw yɛrɛ ye u mabɔ jɛkulu la. Nka, cɛ dilenw bɛ u mago don o mɔgɔ kelen-kelen bɛɛ ka hɛrɛ la, alako ta fan fɛ.—Fil. 2:4; 1 Tes. 5:12-14.
2 Ni diɲɛ kow b’an jɔrɔ, ka an siran, o bagangɛnnan dankanw bɛ iko ‘dogoyɔrɔ fiɲɛba ɲɛ, ani sanjiba latɛmɛyɔrɔ.’ N’an sɛgɛnnen bɛ tuma min na, walima n’an doninen bɛ waati minnu na, an mago bɛ dusu saaloli la. O cɛw b’an dɛmɛ o waatiw la, walasa an ka fanga sɔrɔ kokura. U bɛ kɛ iko ‘kɔ minnu bɛ woyo dugukolo jalen na,’ walima iko ‘farakurunba min bɛ suma kɛ jamana jalan kan’—Esa. 32:2.
3 U bɛ dusu don wajulikɛbaliw kɔnɔ: Ala-ka-marako san in na, maakɔrɔw bɛ cɛsiri kɛrɛnkɛrɛnnenw kɛ walasa ka dusu don mɔgɔw kɔnɔ minnu basigilen tɛ wajuli la, walima minnu tɛ wajuli kɛ tun. Maakɔrɔw b’u dɛmɛ u ka wajuli kɛ cogo basigilen na kokura ni jɛkulu ye. Maakɔrɔw ka mɔgɔ ladonni sira la, u bɛ taa bɔ u ye ni kanuya ye, siɲɛ caman. O kɛra sababu ye, u caman ka jɛkulu lajɛw matarafa cogo basigilen na. U ka alako bonyana fo u ye foro cidenyabaara daminɛ ko kura. Maakɔrɔw bɛ o cɛsiri minnu kɛ, o bɛɛ b’a jira ko Jehowa b’a mago don an na ni kanuya ye, ani ko Yesu Krista bɛ kuntigiya kɛ cogo nafama na. O de y’a to sagaden minnu tun y’u mabɔ jɛkulu la, walima minnu tun tununna, Yesu bɛ hami u kelen-kelen bɛɛ ko la, Mat. 18:12-14; Yuh 10:16, 27-29.
4 Bagangɛnnan dankanw bɛ taamasiyɛn jateminɛ walasa k’a dɔn ni dɔw barika dɔgɔyara alako ta fan fɛ. Mɔgɔ minnu kɛcogo b’a jira k’u fari fagara, ani mɔgɔ minnu tɛ na ka caya lajɛw la, walima minnu tɛ ka baara caman kɛ tun, foro la, a ka c’a la k’olu mago bɛ a la, ka dɛmɛ sɔrɔ Alako ta fan fɛ. Mɔgɔ o mɔgɔ b’a daminɛ ka diɲɛ jogo ta, a ka fini doncogo fɛ, ani a kun dilancogo fɛ, walima mɔgɔ o mɔgɔ ka kɔrɔfɔ bɛ ɲini ka caya ka ɲɛsin jɛkulu ma, maakɔrɔw b’a fɛ k’o mɔgɔw dɛmɛ. Ikomi maakɔrɔw bɛ hami jɛkulu kɔnɔmɔgɔw la, u labɛnnen don k’u ‘ni di’ walasa u ka se k’o mɔgɔ suguw dɛmɛ Jehowa kanuya ka bonya u la ko kura. Maakɔrɔw bɛ o cɛsiriw kɛ bawo u bɛ o mɔgɔw kanu, u b’a fɛ k’u mago don u la.— 1 Tes. 2:8.
5 Waati tɛmɛnnen na, Krecɛn dɔw tun y’u mabɔ jɛkulu la, u ye alako bɛɛ dabila. Bana ko, wariko gɛlɛya, walima degun minnu bɛ denbaya kan, olu kɛra o sababu ye. Nka, bagangɛnnaw t’u kɔrɔfɔ. U b’a jira ko Jehowa bɛ a mago don a ka sagadenw bɛɛ la, ani ko Jehowa bɛna u kɔkɔrɔdon ni waati gɛlɛn nana. (Zab. 55:22; 1 Pi. 5:7) Jɛkulu bagangɛnnan ɲɛmajɔlenw bɛ u dɛmɛ u k’a faamu ko ni u ‘bɛ gɛrɛ Ala la, Ala fana bɛna gɛrɛ u la,’ ka u dusu saalo ani k’u fanga bonya. —Yak. 4:8; Zab. 23:3, 4.
6 Bana ye fiyɛnba bila minnu na, olu ka ko ka bon maakɔrɔw bolo: O bangagɛnnan dankan ɲuman ninnu bɛ hami fana mɔgɔw la ɲinɛ bɛ se ka kɛ minnu kɔ. Jɛkulu bɛɛ la, i bɛ mɔgɔ dɔw sɔrɔ bana ye fiɲɛba bila minnu na, walima minnu tɛ se ka fosi kɛ u yɛrɛ ye, walima minnu dalen bɛ dɔgɔtɔrɔsow la. O kow b’a to, u bɛ min kɛ Masaya kibaru duman fɔli la, o tɛ bɛrɛ ye. Cogo minnu bɛ u bolo ka wajuli kɛ, o ye dɔrɔn ka kuma mɔgɔw fɛ, minnu bɛ taa bɔ u ye, walima u banabagatɔ ɲɔgɔnw, walima mɔgɔ minnu bɛ u fura kɛ. Nka, u bɛ se ka baara o baara kɛ, o bɛ jate fɛn ye min nafa ka bon diɲɛ bɛɛ wajuli baara la. (Mat. 25:15) Hali ni u ye sanga 15 dɔrɔn kɛ wajuli la, o ka kan ka sɛbɛn. O cogo la u bɛ jate tuma bɛɛ iko Masaya weleweledala basigilenw.
7 ‘Cɛ dilenw’ b’a dɔn, u balimaw mago bɛ min na alako ta fan fɛ, kɛrɛnkɛrɛnnenya la, nin Hakilijigin waati kɔnɔna na. Waati bɛnnen don maakɔrɔw bolo u k’u cɛsiri kosɛbɛ, walasa mɔgɔ minnu ye u mabɔ jɛkulu la, walima minnu kɛra walekɛbaliw ye, maakɔrɔw ka se k’olu dɛmɛ u ka nisɔndiya ni hakilisigi sɔrɔ ko kura jɛkulu kɔnɔmɔgɔw ka jɛɲɔgɔnya la. A bɛ an nisɔndiya ka a ye ko an ‘balimaw, dannaya sira la,’ olu bɛ na jɛkulu lajɛw la, ani ka wajuli kɛ, k’u ka dannaya jira kokura kunmabɔ saraka la. Gal. 6:10; Luk. 15:4-7; Yuh 10:11, 14.