‘Kɛwale ɲuman caman kɛ’

¹ A ka cidenyabaara laban tuma na, ciden Pol ni Timote ani Tite jɛra ka baara kɛ ɲɔgɔn fɛ kosɛbɛ. Pol ye dusudon kumaw minnu ci u kelen-kelen ma, o kumaw bɔlen bɛ ɲɔgɔn fɛ. A y’a fɔ Tite ye ko: ‘mɔgɔ minnu dara Ala la, olu’ ka kan ka ‘kɛwale ɲumanw kɛ.’ (Ti. 3:8) A y’a fɔ Timote ye ko mɔgɔ minnu ye u jigi da Ala kan, olu ka kan ka ‘ kɛwale ɲuman caman kɛ.’ (1 Tim. 6:17, 18) O ye laadilikan ɲuman ye an bɛɛ bolo. Nka, mun bɛna an bila ka kɛwale ɲumanw kɛ an ka ɲɛnamaya kɔnɔ? Ani an bɛ se ka kɛwalew jumɛn kɛ kɛrɛnkɛrɛnnenya la, don nataw kɔnɔ?

² Dannaya ani kanuya min bɛ an na, ka ɲɛsin Jehowa ma, a ye jigiya ɲumanba min di an ma, o bɛɛ de bɛna an bila ka kɛwale ɲuman caman kɛ. (1 Tim. 6:19; Ti. 2:11) An bɛ nin san waati min na, a ɲininen bɛ an fɛ, an hakili ka to a la, ko Jehowa y’a Denkɛ ci ka na dugukolo kan, walasa Yesu ka se ka a Fa tiɲɛtigiya, mɔgɔ o mɔgɔ ka kan n’a ye, Yesu k’a to olu bɛɛ ka ɲɛnamaya banbali sɔrɔ. (Mat. 20:28; Yuh 3:16) O kuma de bɛna ɲɛfɔ koɲuman, Marisikalo tile 28, Krista ka saya Hakilijigin sanyɛlɛma don kɛnɛ kan. Jigiya min bɛ an ye, ka ɲɛnamaya banbali sɔrɔ, yali o waleɲumandɔn t’an bila k’an seko damajira kɛ, k’a ɲini ka ‘kɛwale ɲuman caman kɛ’ wa? Ɔwɔ dɛrɛ! Nka, an bɛ se ka kɛwalew jumɛn kɛ?

³ Kɛwale ɲuman minnu ka kan ka kɛ Marisikalo la, ani marisikalo tɛmɛnen kɔ: Siga t’a la, ko an bɛna ye Krista ka saya Hakilijigin sanyɛlɛma don kɛnɛ kan, k’a masɔrɔ, o ye san ko bɛɛ la belebeleba ye Jehowa Seerew bolo, diɲɛ fan tan ni naani la. (Luk. 22:19) Nka, nisɔndiya min filɛ o ye, an b’a fɛ ka o tila ni mɔgɔ camanba ye. Ni i ye san 2002 Annuaire dantigɛli baara yɔrɔ mafilɛ , i b’a ye ko salon, jamana caman na, mɔgɔ minnu nana Krista ka saya Hakilijigin sanyɛlɛma don kɛnɛ kan, k’olu hakɛ cayara ka tɛmɛ weleweledalaw hakɛ kan, fo siɲɛ saba,siɲɛ naani, siɲɛ duuru. Yɔrɔ dɔw la, u hakɛ cayara ka tɛmɛ o bɛɛ kan! Siga t’a la ko jɛkuluw bɛɛ ye u sɛbɛ don kosɛbɛ Yesu ka saya Hakilijigin papiye jɛnsɛnni ma u ka wajulikɛyɔrɔ bɛɛ la. O de kosɔn, yan ni Marisikalo tile 28 cɛ, an b’a fɛ ka an seko bɛɛ kɛ walasa ka wajulikɛyɔrɔ mɔgɔw dɛmɛ u ka kisili jigiya dɔn.

⁴ Awirilikalo setɔla don, tile tɛ bin joona o waati la. Dɔw yɛrɛ bara, o waati nɛɛma ka bon. O bɛ se cogo di ka an dɛmɛ, an ka ‘kɛwale ɲuman caman kɛ’? An bɛ se ka t’a fɛ ni nisɔndiya ye ka kibaru duman wajuli baara kɛ, ‘an ka an jija ka kɛwale ɲuman caman kɛ’. (Ti. 2:14; Mat. 24:14) Ni i ma se ka kɛ tutigɛbaga farankan ye Marisikalo la, yali i tɛ se ka kɛ a ye Awirili kalo ni Mɛ kalow la wa? Yali i tɛ se ka kɛ a ye o kalow dɔ la kelen na wa? Ni i kɛra tutigɛbaga ye Marisikalo la, yali i bɛ se ka o kɛ ka t’a fɛ wa?

⁵ Weleweledala dɔw y’a ye k’u bɛ se ka lɛrɛ kelen ɲɔgɔn kɛ wajuli la, u taatɔ u ka baara yɔrɔ la. U bɛ seereya kɛ bɔlɔn fɛ, walima u bɛ kuma bila mɔgɔw la, minnu bɛ kɔn ka u ka jagokɛyɔrɔw dayɛlɛ sɔgɔmada fɛ. Dɔw bɛ wajuli kɛ u ka tilelafana dun tuma na. Dɔw yɛrɛ y’a ye k’u bɛ se ka Bibulu kalan kɛ ni u baarakɛɲɔgɔn dɔw ye o waati la. An balimamusow la, gadonmuso caman sera ka waati dɔ boloda foro cidenyabaara kama, k’a sɔrɔ u denw taara lakɔli la. Tuma dɔw la, u bɛ soli ka wuli k’u ka sokɔnɔ baaraw kɛ. O b’a to, u bɛ se ka fɛrɛ wajuli ni mɔgɔw kalanni ma, tile tɔ la.— Efɛ. 5:15, 16.

⁶ Hali n’a y’a sɔrɔ i tɛ se ka kɛ tutigɛbaga farankan ye, laala i na se k’i ka kow labɛn walasa ka dɔ fara i ka cidenyabaara kan, k’i seko bɛɛ kɛ ‘ka ko ɲuman kɛ, ka kɛ mɔgɔ ye, min bɛ kɛwale ɲuman caman kɛ, min bolo labilalen bɛ, ka tiɲɛ kumaw lase mɔgɔ wɛrɛw ma. —1 Tim. 6:18.

⁷ Kɛwale ɲuman min b’an bila ka mɔgɔw kɛ kalandenw ye, i kana ɲinɛ o kɔ: Mɔgɔ minnu b’a jira ko Bibulu kɔnɔ kuma ka di u ye, san o san, olu dɔw bɛ na Hakilijigin kɛnɛ kan, k’a sɔrɔ Bibulu kalan tɛ kɛ ni dɔw ye fɔlɔ. Yali jɛkulu kɔnɔmɔgɔ dɔw bɛ se k’u mago don o mɔgɔw la wa? Yali mɔgɔw bɛ sɔrɔ minnu bɛ taa bɔ u ye, walasa k’u dɛmɛ u ka taa ɲɛ, alako ta fan fɛ wa? I b’a sɔrɔ o mɔgɔ dɔw balimaw ye Jehowa Seerew ye. A bɛ se ka kɛ fana, ko dɔw ye Bibulu kalan kɛ fɔlɔ la, nka sisan, a dan ye dɔrɔn ka u dusulamin, walasa u ka sɔn ka Bibulu kalan kɛ ko kura, ka na lajɛw la, cogo basigilen na. Ni o tigimasinaw sera ka kɛ Jehowa ka baarakɛla ɲɛnamaw ye kokura, o na kɛ nisɔndiya ko ba ye dɛ!

⁸ N’an ye dɔ fara an ka baara kɛta kan cidenyabaara la Marisikalo n’a nɔfɛ kalow la, a ka c’a la, an na se ka segin ka taa bɔ mɔgɔ caman ye, minnu b’a jira ko Bibulu kɔnɔ kuma ka di u ye. Ɲininkali dɔ lawuli sanni i ka bɔ u bara ka taa so. A jira u la k’i bɛna ni o ɲininkali jaabi ye siɲɛ wɛrɛ. N’an y’a kɛ ten, an bɛ bɔnye kuraw ɲɛsigi. Ka segin ka na bɔ u ye joona joona, o de ka fisa n’a bɛɛ ye. Ni an ma se cogo si la ka Bibulu kalan daminɛ an tɛmɛ ko fɔlɔ la, an ka an seko bɛɛ kɛ walisa ka dɔ daminɛ o kɔ.

⁹ N’an bɛ ka wajuli kɛ nbɛda la, an ka an jija ka baro daminɛ ni mɔgɔw ye. U ni mɔgɔ minnu bɛnna nbɛda la, weleweledala caman sera ka olu tɔgɔ sɔrɔ k’a ta, ani u ka ladɛrɛsi, ani u ka telefɔni nimero. I ni mɔgɔ min kumana, n’o tigi ka so tɛ i ka jɛkulu ka wajulikɛyɔrɔ kɔnɔna na, i ka sɛbɛn (S-43) ɲini Masaya So la, ka o lafa, ka tila ka o di jɛkulu sɛbɛnnikɛla ma. Jɛkulu sɛbɛnnikɛla na o sɛbɛn lase jɛkulu ma min ka surun o tigi ka sigida la. Ni sɛbɛnnikɛla y’a ye k’o tɛ se ka kɛ, a na o sɛbɛn ci Tɔn bolofara ma, walasa a ko ka ɲɛnabɔ. O la sa, min y’a jira ko Bibulu kuma ka di a ye, o tigi ka kan ni dɛmɛ min ye, a na o sɔrɔ.

¹⁰ Ni i ye telefoni nimero sɔrɔ, nka i ma ladɛrɛsi sɔrɔ, i ka o tigi ka segin-ka-bɔnye kɛ telefoni fɛ. I yɛrɛ labɛn o kama. Comment raisonner gafe bila i bolo kɔrɔ walasa i ka se ka ɲinini kɛ joona a kɔnɔ. Seere dɔw sera ka kalan kɛ koɲuman ni mɔgɔw ye telefɔni na. O mɔgɔ dɔw tun sɔrɔ man di u ka so. An balimamuso dɔ y’a daminɛ ka telefoni nimero ɲininka musow la, a ni minnu bɛnna da-ni-da, wajuli sen fɛ. A sera o cogo la ka Bibulu kalan daminɛ ni mɔgɔ fila ye.

¹¹ An ka jɛ ka baara kɛ ni maakɔrɔw ye, wajulikɛbaliw dɛmɛni na: Maakɔrɔw b’u mago don kosɛbɛ wajulikɛbaliw la, ni kanuya ye. O wajulikɛbaliw caman y’a bɔ u yɛrɛ la, ka nali daminɛ ko kura jɛkulu ka lajɛw la. U y’a faamu ko u mago bɛ a la k’u magɛrɛ Jehowa ka jɛkuluba la, walasa ka se ka lakanali koɲuman sɔrɔ alako ta fan fɛ, iko a ɲɛfɔlen bɛ cogo min Zaburu 91 kɔnɔ. U dɔw labɛnnen don sisan ka foro baara kɛ ko kura. Nin kalo in na, ni wajulikɛbali dɔ wɛrɛw nana Hakilijigin na, laala, u na sɔn Bibulu kalan ka kɛ ni u ye. O tuma, maakɔrɔw na fɛɛrɛ tigɛ walasa minnu b’a fɛ ka dɛmɛ sɔrɔ, kalan ka se ka kɛ ni olu ye. Ni a ɲinina i fɛ ko i ka dɔ dɛmɛ, n’i sɔnna o ma, o na diya bɛɛ ye.— Rom. 15:1, 2. 

¹² An ka t’a fɛ ka ‘kɛwale ɲumanw kɛ’: Mɔgɔ minnu kɛra tutigɛbaga farankan ye kalo kelen walima kalo caman na, u caman y’a ye ko kalo minnu tugura o la, caman farala u ka foro baara barika kan. U ye mɔgɔw sɔrɔ Bibulu kuma diyara minnu ye, n’u seginna ka taa bɔ olu ye. O ye u bila ka dɔ fara u ka cɛsiri kan foro baara la, walasa ka segin ka taa bɔ mɔgɔw ye kokura. Dɔw ye Bibulu kalanw daminɛ. O yɛrɛ y’u dɛmɛ ka dɔ fara u ka baara kan, foro la.

¹³ Dɔw fana ye nisɔndiyaba sɔrɔ haali, wajuli ni mɔgɔ kalanni baara la. O kɛra sababu ye, k’u bila ka sɛgɛsɛgɛli kɛ, k’a mafilɛ, min ni min ka kan ni jɔyɔrɔ fɔlɔ ye u ka ɲɛnamaya kɔnɔ. O y’a to dɔw sera ka dɔ bɔ u ka dahirimɛ ɲini baara la, walisa ka kɛ tutigɛbaga farankan ye kudayi. Dɔw sera ka kɛ tutigɛbaga basigilenw ye. U sera k’u jigi da kosɛbɛ Ala kan. U ma u jigi da diɲɛ fɛnw kan. U y’a ye ko ka kɛ mɔgɔw ye, minnu ‘bolo labilalen bɛ, n’u labɛnnen bɛ tɔw dɛmɛni kama,’ k’o bɛ na ni dugawu caman ye, ka bɔ Jehowa yɔrɔ. Ani a bɛ “ɲɛnamaya sɛbɛ” jigiya sinsin an na. (1 Tim. 6:18, 19) Tiɲɛ don ko ni tutigɛbaga farankanw cayara, jɛkulu mumɛ bɛ nafa sɔrɔ o la. Tutigɛbagaw bɛ ko minnu sɔrɔ foro baara la, u ka teli ka o lakali, wa u ka teli fana k’a ɲini mɔgɔw fɛ, u ka bɔ foro la, ka wajuli kɛ ɲɔgɔn fɛ cidenyabaara la. O bɛ alako barika bonya jɛkulu kɔnɔ.

¹⁴ Nin Hakilijigin waati in na, ani kalo minnu bɛ da o kan, an bɛɛ ka ‘kɛwale ɲuman caman kɛ,’ ka dɔ fara an niyɔrɔ kan, Krecɛnya baara la. An ka Jehowa waleɲumandɔn, ka da a kan, a ye ɲɛnamaya banbali jigiya di an ma, dugukolo kura kan, tilennenya bɛna sigi min kɔnɔ.— 2 Pi. 3:13.