Ɲɛmɔgɔ kulu ka lɛtɛrɛ cilen
1 K’a sɔrɔ an bɛ san kɛmɛ sigiyɔrɔma 21daminɛ na, aw minnu ye an ‘balimaw’ ye diɲɛ kɔnɔ, nisɔndiyaba don, an bolo ka lɛtɛrɛ ci aw bɛɛ ma, ani ka aw fo, aw ka baara gɛlɛn na. (1 Piɛ. 2:17). A bɛ san ba fila bɔ, Yesu ye ɲininkali kɛ ko: ‘Mɔgɔ Denkɛ mana na, yali a na dannaya sɔrɔ dugukolo kan wa?’ (Lu. 18:8). Aw ye cɛsiri minnu kɛ, ala-ka-marako san kɔnɔna na, o ye Yesu ka ɲininkali jaabi di. An bɛ se ka an kan kɔrɔta k’a fɔ: Ɔwɔ. Aw dɔw ka dannaya kɔsɔn, mɔgɔw ye u ɲagaribɔ aw la, ka aw mafiyɛnya. Yɔrɔ caman na, aw ye kow kun kɛlɛw, kasaaraw, banaw walima kɔngɔ la. (Lu. 21:10, 11) Ikomi aw y’a cɛsiri baara tilennenw na, Yesu bɛ se ka ‘dannaya sɔrɔ dugukolo kan’ hali bi. Siga t’a la ko sankolo ka kan ka nisɔndiya sɔrɔ o ko la.
2 An b’a dɔn ko a man nɔgɔn ka muɲu. Misali la, aw ka miiri an balimaw la, minnu ka kan ka tɔɔrɔw muɲu Azi tilebin yanfan jamana dɔ la. Tɔɔrɔ minnu bɛ da Jehowa Seerew kan, o kɛra olu fɛ delinankow ye. Kɔsa in na, tuma min na mɔgɔ 700 tun bɛ u ka lajɛ la, hɛrɛ la, polisiw nana o lajɛ wuli. Siraw tigɛra mɔgɔw ɲɛ, ka mɔgɔ 1.300 bali ka se o lajɛ yɔrɔ la. Mɔgɔ caman sinna ka don ɲɔgɔn fɛ jamalajɛ kɛyɔrɔ la, ka mɔgɔ caman bugɔ, ka tasuma don u ka minɛnw la. Polisiw tun bɛ o jamaba cɛma, wa fugula minnu bɛ ɲɛdaw dogo, u ye o don. Siɲɛ dɔw la, diinɛlafasabaga juguw ye an balimaw tɔɔrɔ, k’u bugo ni bere puwɛntimaw ye.
3 O kow sugu bɛ digi mɔgɔ la, nka a tɛ bala an na. Ciden Pol y’a sɛbɛn ko: “Minnu b’a fɛ ka taama alaɲɛsiran na Krista Yesu la, tugu na kɛ olu bɛɛ la ka u tɔɔrɔ.” (2 Tim. 3:12) San kɛmɛ fɔlɔ la, Krecɛnw ye tɔɔrɔw muɲu, kuma juguw la, ani farikolo la, dɔw yɛrɛw fagara (Kɛw. 5:40; 12:2; 16:22-24; 19:9). A kɛra ten fana san kɛmɛ sigiyɔrɔma mugan kɔnɔna na, wa o tɛna yɛlɛma fana san kɛmɛ sigiyɔrɔma mugan ni kelen kɔnɔna na. Nka, Jehowa b’a fɔ an ye ko: ‘Kɛlɛkɛminɛn fɛn o fɛn mana dilan i kama, o si tɛna se sɔrɔ.’ (Es. 54:17). O kuma bɛ mɔgɔ hakili latigɛ! Tiɲɛ na, an ko ka gɛlɛn Jehowa ma, fo a ka kira Zekariya da fɛ, a ko: ‘Mɔgɔ minnu mana maga aw la, olu bɛ maga ne ɲɛkisɛ de la.’ (Za. 2:8). Mɔgɔ minnu bɛ Jehowa batobagaw juguya, a kɛra cogo o cogo, olu tɛna ɲɛ sɔrɔ cogo si la. Bato senuma de bɛna se sɔrɔ.
4 Misali la, jamana kofɔlen in na, Ala-ka-marako san 2001 kɔnɔna na, Jehowa Seere ye nisɔndiya sɔrɔ bawo, siɲɛ fila, weleweledalaw cayara ka se hakɛ la, min ɲɔgɔn tun ma deli ka sɔrɔ. O yɔrɔ ani diɲɛ yɔrɔ bɛɛ la, an balimaw bɛ t’a fɛ ka Ala ka baara kɛ hali ni gɛlɛyaw bɛ yen. Diɲɛ kɔnɔ, Ala-ka-marako san tɛmɛnen na, dɔgɔkun o dɔgɔkun, kalanden kura 5.066 ye batɛmu ta, k’a jira o cogo la k’u ye u yɛrɛbakun di Jehowa ma. Anw, ani o kalanden kuraw jɔlen bɛ a kan, ka kɛ mɔgɔw ye minnu ‘dafalen jɛyalen bɛ to, Ala sago ko bɛɛ la.’—Kol. 4:12.
5 Aw ka a filɛ fana, ko minnu kɛra kɔsa in na Gɛrɛsi jamana na. Ɔrtodɔxiw ka Egilisi min bɛ Gɛrɛsi jamana na, o tun ye Jehowa Seerew kɛlɛ kosɛbɛ san caman kɔnɔ, nka o n’a ta o ta, sisan, gofɛrɛnaman bɛ Jehowa Seerew mafilɛ iko “diinɛ lakodɔnnen.” Sɛbɛn min bɛ o jira, o bɛ nin fɔ ka fara o kan, ko Gɛrɛsi Betɛlso ye “yɔrɔ senuma ye min bilara Ala ka bato kama.” An nisɔndiyalen fana b’a fɔ aw ye ko ala-ka-marako san tɛmɛnnen na, kiritigɛbolow ye kiri minnu tigɛ, u ye jo di an ka diinɛ ma Alemaɲi, Buligari, Kanada, Etazuni, Japɔn, Rumani, ani Rusi jamanaw na. Waleɲumandɔnba bɛ an na, ka ɲɛsin Jehowa ma, bawo ale de y’a kɛ o dugu ninnu na, da yɛlɛlen tora baara kama.
6 Ni an ɲɛ b’a la cogo caman minnu fɛ Jehowa bɛ a ka jamakulu kɔkɔrɔdon nin don labanw na, an b’a faamu ko ale de ye teri bɛɛ la ɲuman ye, an bɛ se ka min sɔrɔ. Jɛɲɔgɔnya sira minnu bɛ anw ni ale cɛ, o ye nisɔndiya koba ye, katuguni an b’a dɔn ko ale b’an kanu, k’an kalan, ka an kolo. Ɔwɔ, an ka dannaya bɛna kɔrɔbɔ ka t’a fɛ, nka a tɛna tila an na. O dannaya bɛna an kɔkɔrɔdon kɔrɔbɔliw la. Yakuba y’a sɛbɛn ko: “Ne balimaw, kɔrɔbɔli sifa caman mana aw sɔrɔ, aw ka o jate ɲagaliba ko ye, k’a dɔn ko muɲuni bɛ bɔ aw ka dannaya kɔrɔbɔli la.” (Yak. 1, 2, 3) Ka fara o kan, an b’a jira an ka muɲuni fɛ, ko an bɛ Jehowa kanu, o bɛ an nisɔndiya kosɛbɛ. Balima kanulenw, aw ka da a la ko Jehowa bɛna an kelen-kelen bɛɛ kɔkɔrɔdon. N’an tora kantigiya la, a bɛna an dɛmɛ tigitigi, an ka don diɲɛ kura kɔnɔ. A b’a fɛ an ka se k’o min sɔrɔ.
7 An balima cɛmaw ni musomaw, denmisɛnw, ni mɔgɔkɔrɔbaw, an bɛ dusu don aw kɔnɔ walasa aw ka aw hakili to tuma bɛɛ, dugawuw la, dugawu minnu b’an ɲɛ. An ka ciden Pol ka hakilina ɲɔgɔn sɔrɔ. A y’a sɛbɛn ko: “Ne b’a jate ko sisan tɔɔrɔkow tɛ foyi ye, ni u sumana ni sini nɔɔrɔ ye, nɔɔrɔ min bɛna jira an sababu la. (Rom. 8:18) Gɛlɛyaw kɛra cogo o cogo, an ka an jigi da Jehowa kan. Aw ka o gɛlɛyaw muɲu. Aw kana muɲu dabila. Aw tɛna nimisa o la badaa, badaa. Ala ka Kuma b’an dɛmɛ an ka da nin kumaw na ko: ‘Mɔgɔ tilennen na ɲɛnamaya a ka dannaya barika la.’ Hab. 2:4.
Aw balimaw,
Jehowa Seerew ka ɲɛmɔgɔ kulu.