Mun na an ka kan ka wajuli kɛ ka t’a fɛ?

¹ Aw ka sigida la, yali Masaya wajuli baara bɛ ka kɛ ka t’a fɛ kabini tuma jan wa? (Mat. 24:14) N’o don, i bɛ se k’a miiri ko jɛkulu ka wajulikɛyɔrɔ baarala ka ɲɛ. O bɛɛ n’a ta, i bɛ ka bɛn ni mɔgɔ caman ye minnu t’u mago don Masaya cikan na. Hali n’a bɛ ten, a lajɛ min fɔra Yesu ka kalanden sɛbɛw ko la Prophétie d’Isaïe II gafe furaɲɛ 141 nan na, ko: “Yɔrɔ dɔw la, n’i ye u ka baara hakɛ ni cɛsiri kɛlenw lajɛ, a bɛ iko u ma nafaba sɔrɔ u ka cidenyabaara la. Nka, u tora muɲu kɔnɔ.” Mun na wajuli ka kan ka kɛ ka t’a fɛ?

² An k’an hakili to Jeremi na: An ka wajuli baara kɔnɔna na, an ka muɲuli kantigiya kɔnɔ, o tɛ bɔ mɔgɔw ka lamɛnni, walima u ka lamɛnnibaliya la. Jeremi ye wajuli kɛ san 40 kɔnɔ yɔrɔ kelen na. Mɔgɔ damadɔw dɔrɔn de y’a lamɛn. Tɔw y’u ban a ka cikan na. Mun na Jeremi taara a fɛ ka wajuli kɛ? K’a masɔrɔ Ala de tun y’a bila o baara la, ani fana fɛn min tun bɛna kɛ kɔfɛ, o dɔnniya y’a wajibiya ka kuma ni kɔnɔnajɛya ye ka t’a fɛ.—Jer. 1:​17; 20:9.

³ An ka cogoya n’o ye kelen ye. Yesu ye “ci fɔ an ye ko an ka mɔgɔw waju k’a fɔ k’a jɛya ko Ala ye min sigi ka kɛ ɲɛnamaw ni suw kiritigɛla ye, o ye ale de ye.” (Kɛw. 10:42) Cikan min b’an bolo, o bɛ se ka ɲɛnamaya walima saya lase a mɛnbagaw ma. Mɔgɔw bɛna min kɛ ka ɲɛsin kibaru duman ma, u kiri bɛna tigɛ o de kan. O la sa, an ta ye ci fɔli ye a cogo la. N’an timinandiyara an ka baara kɛta la, hali ni mɔgɔw b’u ban ka lamɛnni kɛ, an b’a jira k’an ka kanuya ka bon ka ɲɛsin u ma, wa, k’an nɔrɔlen bɛ Jehowa la. Nka, o dɔrɔn tɛ.

⁴ An bɛ nafa sɔrɔ: Mɔgɔw mana an kunbɛn ɲɛ o ɲɛ ma, an bɛ lafiya, wasa ni nisɔndiya sɔrɔ Ala sago kɛli la. An tɛ se ka o fɛnw sɔrɔ cogo wɛrɛ si la. (Zab. 40:9) Kun jɔnjɔn bɛ ye an ka diɲɛnatigɛ la. N’an bɛ t’a fɛ ka cidenyabaara kɛ, an dusukun ni an miiriw fana bɛ t’a fɛ ka to Ala ka diɲɛ kura jigiya n’a nisɔndiya la. Ka to ka kuma Bibulu ka o layiduw kan, o bɛ dɔ fara an ka alako kan, ani ka anw ni Jehowa cɛ siraw kologɛlɛya.

⁵ Hali n’an ka wajuli baara nɔ tɛ ye o yɔrɔnin bɛɛ la, i b’a sɔrɔ tiɲɛ kuma kisɛ danna mɔgɔ dɔ dusukun na. O kuma kisɛ bɛna se ka falen Jehowa sagona waati la. (Yuh. 6:44; 1 Kɔr. 3:6) Jehowa ka jamakulu ka cɛsiriw sababu fɛ, an si t’a dɔn mɔgɔ hakɛ minnu bɛna sɔn ka kalan kɛ Jehowa ka Masaya ko kan an ka sigida la, walima yɛrɛ diɲɛ bɛɛ kɔnɔ.

⁶ An ka kan k’an teliya ka tɛmɛ fɔlɔ kan ka Yesu ka laadilikan waleya, ko: “A’ ye aw cogo dɔn. A’ ye to aw ɲɛ na, ka Ala deli, katuguni aw ma o kow se tuma dɔn. Ne bɛ min fɔ aw ye, ne bɛ o fɔ mɔgɔw bɛɛ ye: a ye to aw ɲɛ na.” (Mar. 13:33, 37) O la sa, an kɛtɔ k’an ta kɛ Jehowa tɔgɔba senuma saniyali la, an bɛɛ ka t’a fɛ ka Masaya kibaru duman weleweleda, ka Jehowa nisɔndiya.