“Ala ka kuma fɔ k’a dafa”
1 Ni fɛn ɲuman dɔ sɔrɔli diyara i ye tiɲɛ na, yali i t’o jira i miiricogo ani i ka walew fɛ wa? Ɔwɔ. Jehowa ye kanuya ni ɲumanya min jira hadamadenw ta fan fɛ, o ye ciden Pol bila ka waleya cogo min na, an k’o jateminɛ. A ko: “Barika Ala ye a ka nilifɛnba kosɔn min ɲɔgɔn tɛ!” Mun bɛ o “nilifɛnba” in na? O ye “Ala ka nɛɛmaba ye” min jirala an fan fɛ. O nɛɛmaba jiracogo bɛɛ la belebele kɛra a denkɛ dili ye walasa a ka kɛ kunmabɔsara ye an ka jurumuw kosɔn.—2 Kɔr. 9:14, 15; Yuh. 3:16.
2 Pol ye kuma minnu fɔ walasa ka barika da Ala ye, yali olu tun ye kuma gansanw dɔrɔn de ye wa? Cogo si la. A y’a jira sira caman fɛ ko waleɲumandɔnba tun b’a la. A tun bɛ hami kosɛbɛ a Krecɛnɲɔgɔnw ka nɛɛma na alako ta fan fɛ, wa, fɛn min tun bɛ se ka to u ka Ala ka kanuya diyabɔ k’a dafa, a tun b’a fɛ k’o de kɛ. Ka ɲɛsin o mɔgɔw ma, Pol ko: “O dama tɛ an tun bɛ aw kanu kosɛbɛ, o de kosɔn an labɛnnen tun don ka Ala ka Kibaru duman di aw ma, hali an niw yɛrɛ, katuguni aw ko diyara an ye kosɛbɛ.” (1 Tes. 2:8) Ka fara jɛkulu kɔnɔmɔgɔ dɛmɛni kan walasa u ka se ka kisi, Pol ma sɛgɛn jate Ala ka kibaru duman fɔli fana na katuguni a ye kilomɛtɛrɛ ba caman kɛ dugukolo ni baji kan walasa ka mɔgɔw sɔrɔ, mɔgɔ minnu ‘tun cogo bɛnnen don ɲɛnamaya banbali kama.’ (Kɛw. 13:48, NW) Jehowa tun ye fɛn minnu bɛɛ kɛ Pol ye, waleɲumandɔnba tun b’a la o ko bɛɛ kosɔn. O waleɲumandɔn de y’a bila a ka “Ala ka kuma fɔ k’a dafa.” —Kol. 1:25.
3 Jehowa ye ko minnu bɛɛ kɛ an ye, yali waleɲumandɔn b’an na o kow kosɔn wa? Mɔgɔ minnu bɛ jɛkulu kɔnɔ n’u mago bɛ dɛmɛ na, yali o waleɲumandɔn b’an bila an k’olu dɛmɛ wa? (Gal. 6:10) Yali o t’an bila an ka an seko bɛɛ kɛ Ala ka Masaya kibaru duman fɔli la an ka wajulikɛyɔrɔ bɛɛ la wa? —Mat. 24:14.
4 Cogo b’an bolo ka waleɲumandɔn jira: Jehowa ni Yesu ye min kɛ an ye, Krista ka saya Hakilijigin bɛ cogo kɛrɛnkɛrɛnnen di an ma san o san, walasa an ka waleɲumandɔn jira o ko la. Hakilijigin tɛ lajɛ dɔ dɔrɔn ye, walima ko gansan dɔ hakilijigin ye. Yesu ko: “A’ ye t’a fɛ ka nin kɛ walasa ka aw hakili to ne la.” (Luka 22:19) Krista ka saya Hakilijigin bɛ cogo di an ma walasa Yesu ye mɔgɔ sugu min ye, an ka miiri o la. O ye waati ye k’a sɔn a ma ko a ɲɛnama don, ani k’a bɛ ka wale kɛ bi nɔɔrɔ la, ani kuntigiya la. A tun ye o nɔɔrɔ ni o kuntigiya sɔrɔ katuguni a ye kantigiya sirataama, ka kɛ saraka ye. O ko labatoli ye cogo fana ye walasa k’a jira ko an b’an kolo Krista ka kuntigiya ye, ko ale de bɛ Krecɛn jɛkulu kow ni a baaraw ɲɛminɛ. (Kol. 1:17-20) Ala ka jamakulu mɔgɔw bɛɛ ka kan ka ye Krista ka saya Hakilijigin kɛnɛkan, k’o kɛ ni bonya fana ye. Ɲinan, Hakilijigin bɛna kɛ Marisikalo tile 28, san 2002 tile binnen kɔ, n’o bɛ bɛn Alamisadon ma.
5 Ikomi u tun ye baara kɛ kosɛbɛ Hakilijigin labatoli don ɲɛ, salon mɔgɔ bɛɛ lajɛlen minnu tun bɛ Hakilijigin kɛnɛ kan, u tun ye mɔgɔ 2 163 602 ye Ameriki jamana kan. O hakɛ ɲɔgɔn tun ma deli ka sɔrɔ ban. (I ka sigida ta lajɛ san 2002 Zanwuyekalo tila fɔlɔ La Tour de Garde ɲɛw 19-22 la.) Mɔgɔ hakɛ bɛna kɛ joli ye ɲinan? O bɛna bɔ kosɛbɛ nin na: ‘ka baara kɛ kosɛbɛ, ka kɛlɛ kɛ,’ walasa ka mɔgɔ caman dɛmɛ u ka ye Hakilijigin kɛnɛkan.—1 Tim. 4:10.
6 N’an nana Matigi ka surɔfana na, an bɛ se fana ka dɔ fara an ka kɛta kan foro baara la. Siga t’a la ko balimakɛ ni balimamuso ba tan tan caman bɛna kɛ tutigɛbaga farankan ye kalo kelen, walima kalow la minnu ka ca n’o ye. A san duuru de filɛ nin ye, san o san, an bɛ tutigɛbaga farankan hakɛ min sɔrɔ Hakilijigin waati la, ka taa Marisikalo la ka na bila Mɛkalo la Ameriki jamana na, o ye mɔgɔ 212 142 ye. (Walasa k’a dɔn mɔgɔ hakɛ minnu ye o kɛ sigida la, i ka sigida ta lajɛ Afiriki tilebin yanfan n’a cɛmancɛ yanfan jamanaw bɔkow kɔnɔ san 2001 Zuluye, Uti, ani Sɛtanburu kalow An ka Masaya Cidenyabaara la.) Yali i bɛ se k’i ka kow labɛn walasa i ka se ka kɛ tutigɛbaga farankan ye ɲinan wa? O bɛna kɛ cogo ɲuman ye walasa k’i ka waleɲumandɔn lakika jira Ala ka kanuya nilifɛn ko la, Krista ka saraka fɛ. I bɛ se ka da a la k’i bɛna Jehowa ka dugawuw sɔrɔ, i n’a fɔ ko kɛlen nataw b’a jira cogo min na.
7 An balimamuso dɔ bɛ dahirimɛ ɲini baara kɛ waati dafalen na. Ikomi a tun kɛra tutigɛbaga farankan ye Marisikalo tɛmɛnnen na, a y’a sɛbɛn ko: “San 2001 Feburuyekalo An ka Masaya Cidenyabaara tun ye dusu don mɔgɔw kɔnɔ minnu cogo tun b’a to u bɛ se ka kɛ tutigɛbaga farankan ye Hakilijigin waati la. Ikomi Sibiri duuru bɛ Marisikalo la, o ni ne ka waatibolodalen tun bɛ ɲɔgɔn minɛ kosɛbɛ. O la sa, ne y’a latigɛ ka sɛbɛn lafa walasa ka kɛ tutigɛbaga ye.” A tun bɛna kalo daminɛ tuma min na, a y’a ŋaniya ka sokɔnɔ Bibulu kalan daminɛ. Yali a sera k’o kɛ wa? Ɔwɔ. A y’o kɛ o kalo yɛrɛ la, tuma min na a ye lɛrɛ 52 sɔrɔ a ka wajuli la. A ka kuma laban kɛra mun ye? “N’an bɛ dɔ fara an ka cɛsiri kan, dugawuw caman bɛ sɔrɔ o la.”
8 Nafa jumɛn b’a la dukɔnɔmɔgɔw bɛɛ lajɛlen ka kɛ tutigɛbagaw ye ɲɔgɔn fɛ? Mɔgɔ naani denbaya dɔ ye o de kɛ Awirilikalo tɛmɛnen na. O kɛra u bolo kalo ye, u hakili bɛna to min na tuma bɛɛ. Bamuso ko: “An ye don kelen kelen bɛɛ daminɛ ni nisɔndiya ye, katuguni an bɛɛ tun lajɛlen don ka baara kɛ ɲɔgɔn fɛ cidenyabaara la! An tun bɛ baro minnu kɛ an ka don o don foro baara kan surɔfana dun tuma na, o tun ye nisɔndiyaba ye.” Denkɛ ko: “Ne nisɔndiyara kosɛbɛ ka baara kɛ Baba fɛ foro baara la dɔgɔkun don labanw na. Tuma caman na, o waati tun bɛ Baba sɔrɔ a ka dahirimɛ ɲini baara la.” Fa ye nin fɔ ka fara a kan: “Ikomi ne ye dutigi ye, n ye nisɔndiya sɔrɔ k’a ye ko an bɛɛ lajɛlen ye baara kɛ ɲɔgɔn fɛ, baara la min nafa ka bon ni baara tɔw bɛɛ ye an ka waati la.” Yali i ka dukɔnɔmɔgɔ bɛɛ lajɛlen bɛ se ka kɛ tutigɛbagaw ye ɲɔgɔn fɛ wa? Mun na aw bɛɛ lajɛlen tɛna kuma o kan, k’a lajɛ ni dukɔnɔmɔgɔ bɛɛ lajɛlen bɛ se ka kɛ tutigɛbaga farankan ye Hakilijigin waati la?
9 Yali an bɛ se ka Marisikalo kɛ an ka kalo bɛɛ la fisaman ye wa? San 2000 daminɛ na, An ka Masaya Cidenyabaara tun ye nin ɲininkali kɛ: “Yali an bɛ se ka Awirilikalo kɛ an ka kalo bɛɛ la fisaman ye wa?” An ka jaabi kɛra mun ye? Tutigɛbaga farankan hakɛ cayara yɔrɔ caman na. U hakɛ mumɛ kɛra 2 410 ye Togo jaman kan ani 196 ye Senegali. Dɔ farala fana lɛrɛ kɛlen hakɛ kan, ani sɔn-ni-sɔn gafeninw bilalen hakɛ kan, ani segin-ka-bɔnye hakɛ kan. Ala ka baara min kɛra o kalo kɛrɛnkɛrɛnnen na, o nana ni nisɔndiya min ye jɛkulu kɔnɔ, yali i hakili bɛ o la wa? Yali i bɛ se k’o baara ɲɔgɔn kɛ ɲinan, walima yɛrɛ i bɛ se ka dɔ fara o kan wa? N’an bɛɛ b’an cɛsiri, Marisikalo 2002 bɛ se ka kɛ “an ka kalo bɛɛ la fisaman ye.” Mun na Marisikalo?
10 Kun fila de bɛ an bila ka baara kɛrɛnkɛrɛnnen kɛ Marisikalo. A fɔlɔ ye ko Hakilijigin bɛna kɛ Marisikalo sa tuma na. O bɛ cogo caman di an ma an ka kɔn ka mɔgɔw caman wele u ka na. A kun filanan ye ko ɲinan, dɔgɔkun laban duuru de bɛ Marisikalo la. O b’a nɔgɔya lakɔlidenw bolo, walima mɔgɔ minnu bɛ baara la, olu ka se ka kɛ tutigɛbaga farankanw ye. Mun na i tɛna i sigi sisan k’i ka waati boloda koɲuman? Mun na i tɛna baara kɛ ni donjatelan ye min bɛ nin farankan kɔnɔ walasa k’o kɛ? Ka kɛ tutigɛbaga ye, o bɛ se ka nɔgɔya ka tɛmɛ an bɛ min miiri. Misali la, n’i y’a boloda ka lɛrɛ 8 kɛ foro baara la dɔgɔkun laban duuru kelen kelen bɛɛ la, walasa i ka se ka lɛrɛ wajibiyalen 50 dafa, i ka kan ka lɛrɛ hakɛ min boloda kalo kɔnɔ ka fara i ka lɛrɛ 8 kan, o ye lɛrɛ 10 dɔrɔn ye.
11 Maakɔrɔw bɛ se ka mun kɛ walasa ka bɛɛ dɛmɛ jɛkulu kɔnɔ u ka “Ala ka Kuma fɔ k’a dafa”? U bɛ se ka dusu don jɛkulu kɔnɔmɔgɔw kɔnɔ u ka barow fɛ, ani lajɛw yɔrɔ dɔw fana fɛ. Jɛkulu gafe ɲɛminɛbagaw ni u kankɔrɔsigiw bɛ se k’a bɔ u yɛrɛ la ka kuma u ka gafe kalan kulu mɔgɔ kelen-kelen bɛɛ fɛ, ka jira u la k’u b’a fɛ k’u dɛmɛ. U mago bɛ min na tigitigi, o bɛ se ka kɛ dusulamin kuma ɲuman damadɔw de ye, walima hakilila nafamaw dɔw. (Nta. 25:11) Balima caman bɛna ye ko ni u ye yɛlɛma fitinin dɔw kɛ u ka waatibolodalen na, u bɛ se ka nisɔndiya ni bonya sɔrɔ ka kɛ tutigɛbaga farankanw ye. Jɛkulu caman kɔnɔ, maakɔrɔw ani cidenyabaara magannaw ni u musow ye ɲɛjirabaga ɲumanw ye katuguni u fanba, ni a ma kɛ u bɛɛ yɛrɛ ye, u bɛ kɛ tutigɛbaga farankanw ye ɲɔgɔn fɛ Hakilijigin waati la. O ko ye dusu don weleweledala caman kɔnɔ u ka fara u kan ka kɛ tutigɛbaga farankanw ye. Nka, ka da farikolo dɛsɛ kan, walima ko wɛrɛw kan, weleweledala dɔw tɛ se ka kɛ tutigɛbagaw ye. O n’a ta o ta, dusu bɛ se ka don olu kɔnɔ u k’u ka weleɲumandɔn jira k’u seko damajira kɛ cidenyabaara la jɛkulu mɔgɔ tɔw fɛ.
12 Ɲɛtaa bɛ bɔ maakɔrɔw ka ko labɛncogo ɲuman na. Dɔgɔkun kɔnɔna bɛɛ la, foro baara ka kan ka kɛ waati bɛnnenw na. N’a bɛ se ka kɛ, baara lakɔlɔsibaga bɛ kɔn ka wajuli baara lajɛ bɛɛ ɲɛminɛ to balimakɛw bolo minnu bɛ cogo dafa. Labɛn koɲuman wajibiyalen bɛ walasa o lajɛw kana tɛmɛ sanga 10 walima 15 kan. Ka mɔgɔw tila ka kɛ kuluw ye, ka wajulikɛyɔrɔ di, ani ka Ala deli, o fɛn bɛɛ ka kan ka kɛ o waati kɔnɔ. (I ka san 2001 Sɛtanburukalo An ka Masaya Cidenyabaara Ɲininkaliw jaabi yɔrɔ lajɛ.) Wajuli baara min bɛna kɛ o kalo kɔnɔ, o ka kan ka ɲɛfɔ jɛkulu ye, ka tila ka gengen kunnafoniwalan kan.
13 Wajulikɛyɔrɔ bɛnnen ka kan ka sɔrɔ fana. Baara lakɔlɔsibaga ka kan ka balimakɛ ye min bɛ wajulikɛyɔrɔw ko kunna walasa u ka fɛɛrɛ kɛ ka baara kɛ yɔrɔw la minnu tɛ kɛ tuma caman na. Sinsin ka kan k’a kɛ nin kan ko: jɛkulu ka baara kɛ mɔgɔw bara minnu tun tɛ u ka so tuma min na weleweledala tɛmɛna, ani ka seereya kɛ nbɛdaw la, bitiki ni bitiki, ani sufɛ. A bɛnnen don yɔrɔ minnu na, weleweledala dɔw bɛ se ka dɛmɛ yen walasa u ka telefoni seereya kɛ.
14 U dɛmɛ u ka baara kɛ tuguni: Jɛkulu wajulikɛyɔrɔ la, yali an balima dɔ bɛ yen min tɛ kibaru duman wajuli kɛ tuguni wa? Jɛkulu kɔnɔmɔgɔw don hali sa, wa u mago bɛ dɛmɛ na. (Zab. 119:176) Diɲɛ kɔrɔ in bantuma sera. Diɲɛ kura ka surun. O la sa, kun ɲɛnama b’an bolo an k’an cɛsiri kosɛbɛ walasa ka walekɛbaliw dɛmɛ. (Rom. 13:11, 12) Kameruni jamana na, san duuru tɛmɛnen kɔnɔna na, mɔgɔ minnu sɔnna u ka dɛmɛ, n’u tilara ka kɛ walekɛbagaw ye ko kura, olu hakɛ tun ka ca ni 350 ye. Kanuya ni dannaya minnu tun bɛ mɔgɔ caman na u ka cidenyabaara daminɛ na, an bɛ se ka mun kɛ walasa ka o fɛnw bonya ko kura u la?— Heb. 3:12-14.
15 Maakɔrɔw kulu bɛna baro kɛ ɲɔgɔn fɛ walasa k’a lajɛ u bɛ se ka mɔgɔw dɛmɛ cogo min na, mɔgɔ minnu kɛra walekɛbaliw ye san tɛmɛnen kɔnɔna na. (Mat. 18:12-14) Sɛbɛnnikɛla ka kan ka jɛkulu weleweledalaw ka wajuli baara karati sɛgɛsɛgɛ, ka tila ka mɔgɔw tɔgɔw sɛbɛn, mɔgɔ minnu kɛra walekɛbaliw ye. Cɛsiri kɛrɛnkɛrɛnnen ka kan ka kɛ ka ɲɛsin maakɔrɔw ka dɛndɛnni baara ma walasa ka weleweledalaw dɛmɛ. Maakɔrɔ dɔ bɛ se ka ŋaniya ka taa bɔ weleweledala dɔ ye ale ni min tun delilen bɛ ɲɔgɔn na kosɛbɛ, walima a bɛ se k’a ɲini weleweledala wɛrɛw fɛ u ka dɛmɛ kɛ. I b’a sɔrɔ fɔlɔ la weleweledalaw tun ye kalan kɛ balima kun min kɛra walekɛbali ye sisan, wa, u ka nisɔndiya ka bon kosɛbɛ sisan walasa ka dɛmɛ kɛrɛnkɛrɛnnen lase a ma nin waati min na a mago bɛ dɛmɛ na. An jigi b’a la ko mɔgɔ minnu kɛra walekɛbaliw ye, ko o dɛmɛ bɛna u caman bila u ka Ala ka kuma wajuli baara daminɛ ko kura. Ni u ye cogow dafa, waati min ka fisa ni waati bɛɛ ye walasa ka wajuli daminɛ, o ye Hakilijigin waati ye. (San 2001 Santirafriki jamana ni Cad ka Zanwuyekalo An ka Masaya Cidenyabaara Ɲininkaliw jaabi yɔrɔ lajɛ walasa ka kunnafoni wɛrɛw sɔrɔ.)
16 Yali mɔgɔ wɛrɛw fana bɛ cogow dafa walasa ka wajuli kɛ wa? Jehowa bɛ t’a fɛ ka barika don a ka jama na, a kɛtɔ ka “siyaw bɛɛ ka fɛn fisamaw” lana a ka jɛkuluba la. (Ag. 2:7) San o san mɔgɔ ba caman bɛ cogow dafa walasa ka kɛ weleweledalaw ye minnu ma batise. Olu ye jɔnni ye? Jehowa Seerew denw ani Bibulu kalanden minnu ye ɲɛtaa kɛ. An bɛ se k’a dɔn cogo di k’u bɛ cogo dafa walasa ka kɛ kibaru duman weleweledalaw ye?
17 Jehowa Seerew denw: Denmisɛnnin caman b’u bangebagaw bilasira du ni du baara la san caman kɔnɔ, k’a sɔrɔ u ma kɛ weleweledalaw ye minnu ma batise. Marisikalo ye waati ɲuman ye walasa u k’o daminɛ. I bɛ se k’a dɔn cogo di ni i den bɛ cogow dafa? Organisés pour accomplir notre ministère gafe ɲɛ 100 b’a fɔ ko: “Ni den ye misali ɲuman ye a taamacogo fɛ, ani n’a bɛ se ka kibaru duman fɔ, k’a ka dannaya ɲɛfɔ tɔw ye bawo a dusukun b’a bila k’o kɛ.” Ni e yɛrɛ fɛ i den bɛ cogow dafa, i ka kuma jɛkulu ka baara kulu maakɔrɔ dɔ la kelen fɛ.
18 Bibulu kalanden minnu bɛ cogow dafa: Ni Bibulu kalanden dɔ ye dɔnniya sɔrɔ, wa n’a bɛ na lajɛw la a bɛ waati dɔ bɔ, laala, a b’a fɛ ka kɛ Masaya weleweledala dɔ ye. N’i bɛ ka o mɔgɔ sugu dɔ kalan, i ka nin ɲininkaliw jateminɛ: Yali a bɛ ka taa ɲɛ ka kɛɲɛ ni a si ni a sekow ye wa? A y’a daminɛ k’a ka dannaya ɲɛfɔ mɔgɔ wɛrɛw ye wa? Yali a ye ‘mɔgɔya kura’ don a yɛrɛ la wa? (Kol. 3:10) Cogo minnu bɛ Notre Ministère gafe ɲɛw 97-9 la weleweledalaw ko la minnu ma batise, yali a b’olu dafa wa? N’a bɛ olu dafa, i ka kan ka jɛkulu ka baara kulu ye a ka fɛɛrɛw tigɛ walasa maakɔrɔw fila ka kuma e ani i ka kalanden fɛ. N’a bɛ cogow dafa, maakɔrɔ filaw bɛna a ladɔnniya ko a bɛ se ka foro cidenyabaara daminɛ.
19 Awirili ni Mɛ kalow dun? Olu fana bɛna kɛ kalo kɛrɛnkɛrɛnnenw ye walasa an ka dɔ fara an ka foro cidenyabaara kan. Mɔgɔ minnu kɛra tutigɛbaga farankan ye Marisikalo la, laala, olu caman bɛ se k’o kɛ Awirilikalo walima Mɛkalo la, walima o kalo fila bɛɛ la. Awirili ni Mɛ kalow la, an bɛna an cɛsiri fɛn fɔlɔ min kama, o bɛna kɛ La Tour de Garde ni Réveillez-vous! jirali ye an ka cidenyabaara la. Mɔgɔ minnu ye o sɛbɛnw kalan, o ye nɔ ɲuman min bila o mɔgɔw ka ɲɛnamaya kɛcogo la, o bonyana dɛ! O sɛbɛnw ye baaraba de kɛ, wa, u kɛra sababu ye dɔ ka fara an kan, i n’a fɔ a kɛra cogo min na diɲɛ yɔrɔ bɛɛ la. Cɛsiri kɛrɛnkɛrɛnnen bɛna kɛ Awirili ni Mɛ kalow la walasa k’o sɛbɛnw jira mɔgɔ caman na. I k’i ka kow labɛn kabini sisan walasa i k’i ta kɛ o la kosɛbɛ.
20 Ikomi fɛɛrɛ tigɛra walasa an ka dɔ fara an ka wajuli baara kan, i bɛ sɔn-ni-sɔn gafenin hakɛ min ta jɛkulu kɔnɔ, yali i mago t’a la ka dɔ fara o hakɛ kan wa? Ala-ka-marako san kuuru bɛɛ la, Sibiri kelen-kelen bɛɛ la, an ye La Tour de Garde ani Reveillez-vous! jira an ka sɔn-ni-sɔn gafenin don na. Ikomi mɔgɔ caman bɛna kɛ tutigɛbaga farankan ye, wa, k’an bɛɛ bɛna sɔn-ni-sɔn gafenin jira kalo dafalenw fila kɔnɔ, a nafa bɛ se ka bonya i ka dɔ fara i ka sɔn-ni-sɔn gafenin ɲininen hakɛ kan jɛkulu kɔnɔ. N’i bɛna o de kɛ, balimakɛ min bɛ sɛbɛnko ɲɛnabɔ i ka jɛkulu kɔnɔ, i k’o ladɔnniya o yɔrɔ bɛɛ la.
21 Mɔgɔ caman y’a jira ko waleɲumandɔn b’u la An ka Masaya Cidenyabaara yɔrɔ ko la min ye ko: “Mun bɛ fɔ sɔn-ni-sɔn gafenin ko la.” Sɔn-ni-sɔn gafenin jiracogo minnu labɛnna, yali an bɛ olu dɔn ka se ka baara kɛ n’u ye wa? Mun na an tɛna waati dɔ ta an ka denbaya ka Bibulu kalan na, dɔgɔkun o dɔgɔkun, walasa k’o jiracogow dege?
22 I ka nafaba bɔ ɲinan Hakilijigin waati la: Iko Pol y’a jira cogo min na, an fana ka baara kɛ k’a dafa Ala ka baaraw la minnu bolodara nin Hakilijigin waati in na, ka jira Jehowa la o cogo la ko waleɲumandɔnba b’an na a ka “nilifɛnba kosɔn min ɲɔgɔn tɛ.” Nin kow sen bɛ o baaraw la: 1) ka na san ko bɛɛ la nafama na, n’o ye Matigi ka surɔfana labatoli ye san 2002, Marisikalo tile 28, Alamisa don na; 2) ka dɛmɛ kɛ walekɛbaliw ye walasa ‘kanuya min tun bɛ u la a daminɛ na,’ o ka kɛ u la ko kura (Jir. 2:4; Rom. 12:11); 3) ka an denw ani an ka Bibulu kalandenw dɛmɛ minnu bɛ cogow dafa, u ka kɛ weleweledalaw ye minnu ma batise; ani 4) ka an seko bɛɛ kɛ kibaru duman wajuli la, n’an bɛ se yɛrɛ, ka kɛ tutigɛbaga farankan ye Marisikalo la, ani kalo wɛrɛ la.— 2 Tim. 4:5.
23 An ka delili ye min ye tigitigi, o filɛ: an bɛɛ ka Masaya kibaru duman wajuli baara kɛ k’a dafa nin Hakilijigin waati la, ka jira o cogo la ko Jehowa ye ko minnu bɛɛ kɛ an ye, ko o waleɲumandɔnba bɛ an na.
[Box page 6]
I ka san 2002 Marisikalo foro baara waatibolodali
Karidon Ntɛnɛn Tarata Araba Alamisa Juma Sibiri
1 Sɔn-ni-sɔn
gafenin don
3 4 5 6 7 8 Sɔn-ni-sɔn
gafenin don
10 11 12 13 14 15 Sɔn-ni-sɔn
gafenin don
16 17 18 19 20 21 Sɔn-ni-sɔn
gafenin don
24 25 26 27 28 29 Sɔn-ni-sɔn
HAKILIJIGIN gafenin don
TILEBIN
31 KƆFƐ
Yali i bɛ se ka lɛrɛ 50 boloda walasa ka kɛ tutigɛbaga farankan ye Marisikalo la wa?