Ka waleɲumandɔn jira Jehowa ka kanuya ko la, dugawuw b’o la —Yɔrɔ filanan
1 Kalo tɛmɛnnen, an ye nin barokun yɔrɔ fɔlɔ lajɛ. An ye cogo naani sɛgɛsɛgɛ minnu fɛ an bɛ se k’an ka waleɲumandɔn jira Jehowa ka kanuya ko la cidenyabaara la. (1 Yuh. 4:9-11) Nin bɔko in kɔnɔ, an bɛna o waleɲumandon jiracogo duuru fara o kan. N’an b’an jija a fɛ ka mɔgɔ wɛrɛw dɛmɛ alako ta fan fɛ, an bɛ dugawuw sɔrɔ.
2 Senfɛ seereya: Cogo ɲuman don an ka se ka mɔgɔw sɔrɔ, tilennenya nege bɛ minnu na iko kɔngɔ ani minnɔgɔ, ani ka se ka sɛbɛn nafamaw di olu ma. A ka ɲi n’an bɛ ‘waati kunmabɔ’ ka seereya kɛ mɔgɔ o mɔgɔ ye an ni min bɛ bɛn yɔrɔ bɛɛ la. (Efe. 5:16) A dɔ rɔ, an mago b’a la ka dusu ta walasa ka seereya kɛ o cogo la. Nka, ni Ala ka kanuya waleɲumandɔn b’an na, ani n’an bɛ mɔgɔw mago kala ma, an bɛna seereya kɛ cogo bɛɛ la.—2 Tim. 1:7, 8.
3 Tunga-fɛ ciden dɔ ye dugawuba sɔrɔ a kɛlen ka baro daminɛ ni cɛ dɔ ye, ale ni min tun bɛ takisi kelen kɔnɔ. Cɛ y’i mago don tunga-fɛ ciden ka kumaw na. Bɔnyeliw kɛra a ye, wa, Bibulu kalan daminɛna. O cɛ kɛra Jehowa Seere ye; a ye ɲɛtaa kɛ fo a kɛra jɛkulu maakɔrɔ ye.
4 Ka batakiw sɛbɛn: A dɔ rɔ, an tɛ se ka taa so ni so k’a masɔrɔ waati man ɲi, walima an ye dɛsɛbagatɔ ye. O la, an bɛ se ka seereya kɛ k’a surunya bataki kɔnɔ, k’o ci mɔgɔw ma an bɛ minnu dɔn, walima minnu diyanyemɔgɔ sara, walima minnu tun tɛ u ka so waati min na an tun taara u fɛ wajuli la. An bɛ se ka sɛbɛndennin ni bataki ci ɲɔgɔn fɛ, Bibulu cikan duman bɛ sɛbɛndennin min na kɔni, ani min bɛ dusu don mɔgɔ kɔnɔ a k’an jaabi n’a b’a fɛ ka ɲininkaliw kɛ. I k’i yɛrɛ ka ladɛrɛsi walima Masaya So ka ladɛrɛsi sɛbɛn bataki la. A ɲininen bɛ i fɛ i kana tɔnbolofara ka ladɛrɛsi sɛbɛn a la.
5 Nɛgɛjuru fɛ seereya: An tɛ se ka mɔgɔ minnu sɔrɔ so ni so baara la, n’an bɛ nɛgɛjuru ci olu ma, o ye cogo ɲuman ye min b’a to an ka se ka kuma olu fɛ. N’an bɛ se kuma na, n’an b’a kɛ ni hakili ni ɲumanya ye, ka mɔgɔ gasi sigi, a dɔ rɔ mɔgɔw bɛna sɔn an ka kumaw ma. San 2001 Feburuyekalo ka An ka Masaya Cidenyabaara la, ɲɛw 5-6 na, hakililata nafamaw dira an ma minnu b’a to an ka se ka nɔ ɲumanw sɔrɔ.
6 Balimamuso dɔ tun bɛ seereya kɛ nɛgɛjuru fɛ tuma min na, a ye muso dɔ ɲininka n’a y’a miiri a ka siniko n’a ka denbaya siniko kan. Muso y’a fɔ a ye ko ɔwɔ, a y’i miiri o la. A y’a ɲɛfɔ balimamuso ye k’a ka jigilatigɛ kosɔn, a ma bɔ a ka so kɔnɔ. Balimamuso y’i mago sɛbɛ don a la. O ye muso bila a ka sɔn ɲɔgɔnye ma sugufiyɛ dɔ la min man jan a ka so la. Fɛn min bɔra o la, muso sɔnna Bibulu kalan ma teliya la!
7 An ka mɔgɔw ladon minnu ma deli ka na lajɛkɛyɔrɔ la: N’an b’an sigiɲɔgɔn kanu, an ma deli ka mɔgɔ min ye an ka lajɛkɛyɔrɔ la, an bɛna an hakili to a la k’a ladon kosɛbɛ. (Rom. 15:7) An k’a ladon cogo la min b’a to a k’a dɔn k’a bɛ mɔgɔw cɛma minnu b’u mago sɛbɛ don a ka nɛɛma na Ala sira la. N’an b’an mago sɛbɛ don a la, k’a fɔ a ye k’an bɛ se ka Bibulu kalan kɛ a kun, a dɔ rɔ, o bɛn’a bila ka sɔn an ka dɛmɛ ma.
8 An taamacogo ɲuman: An bɛ se ka dawula da tiɲɛ kan an taamacogo ɲuman sababu fɛ. (Tite 2:10) Mɔgɔ minnu bɛ diɲɛ kɔnɔ, n’olu bɛ kuma ɲumanw fɔ an ko la iko Jehowa Seerew, u bɛ bonya da Ala kan. (1 Piɛ. 2:12) O fana bɛ se ka mɔgɔ wɛrɛw dɛmɛ u ka se ka sira ta min bɛ taa ɲɛnamaya la.
9 Jehowa ka kanuyaba min bɛ ɲɛsin an ma, an bɛ se k’an ka waleɲumandɔn jira o kanuya ko la nin cogo duuru in fɛ. Mun na an tɛ segin nin cogow kan, ka wale kɛ ka kɛɲɛ n’olu ye? (1 Yuh. 4:16) I kɛtɔ k’o kɛ, i bɛna dugawuw caman sɔrɔ.