Ka waleɲumandɔn jira Jehowa ka kanuya ko la, dugawuw b’o la—Yɔrɔ fɔlɔ

¹ Ciden Yuhana y’a sɛbɛn ko: ‘An kɔni, an bɛ kanu k’a masɔrɔ ale [Jehowa] fɔlɔ de ye an kanu.’ (1 Yuh. 4:19) Jehowa ye fɛn caman di an ma. N’an bɛ miiri olu bɛɛ la, o b’an fana bila ka waleɲumandɔnba jira a la. A kɛtɔ ka seereya kɛ Ala tɔgɔ an’a ka Masaya ko la ni kanminɛ ye, Yesu kɛra ɲɛjirabaga ye an ye. (Yuh. 14:31) Nafa b’a la an ka cogo dɔw mafilɛ, cogo minnu fɛ an bɛ se k’an ka waleɲumandɔn jira Jehowa ka kanuya ko la, ani dugawu minnu bɛ bɔ o la.

² Ka taa du ni du: Masaya baara wajuli bɛ kɛ cogo min na, Yesu y’a ka kalandenw kalan o la. A ye ci minnu fɔ u ye, u b’a jira ka jɛya k’u tun bɛ taa du ni du ka kibaru duman jɛnsɛn. (Luka 9:1-6; 10:1-7) Ala kanuya ani an mɔgɔ ɲɔgɔn kanuya ka kan walasa an ka se ka t’a fɛ da ni da baara la hali ni mɔgɔ si t’i mago don cikan na, ani n’an bɛ kɛlɛ fana sɔrɔ. Nka, n’an bɛ taa du ni du, an yɛrɛ fana bɛ nafa sɔrɔ o la bawo an ka dannaya bɛ sinsin, dɔ bɛ fara an ka daŋaniya kan, ani an ka jigiya bɛ bonya fana.

³ Mɔgɔ caman minnu bɛ baara kɛ, mɛlɛkɛw ka ɲɛminɛ fɛ, olu ye dugawuw sɔrɔ katuguni u ye mɔgɔw sɔrɔ, kɔngɔ ni minnɔgɔ bɛ minnu na tiɲɛ ta fan fɛ. (Jir. 14:6) Duden dɔw y’a fɔ k’u tun b’a la ka dɛmɛ ɲini Ala fɛ delili la tuma min na seere dɔ nana u ka da la. Antiye gun dɔ kan, Jehowa Seere fila ni den fitinin dɔ tun bɛ wajuli kɛ du ni du. Tuma min na mɔgɔkɔrɔbaw y’a latigɛ ka wajuli jɔ o don na, den fitinin tɛmɛna u ɲɛ, a yɛrɛma, ka da nata kɔnkɔn. Muso dɔ ye da yɛlɛ. Tuma min na mɔgɔkɔrɔbaw y’o ye, u taara muso ma, ka kuma a fɛ. A y’a fɔ u ye k’u ka don so kɔnɔ. A y’a jira k’a tun tilatɔla de filɛ nin ye ka Ala deli walasa a ka Seerew ci a ma k’a kalan Bibulu la!

⁴ Ka seereya kɛ nbɛdaw la: Ikomi yɔrɔ dɔw la a ka gɛlɛn ka mɔgɔw sɔrɔ u ka so, ka wajuli kɛ nbɛdaw la o ye cogo nafama ye ka se k’o mɔgɔw ye. Ka fara o kan, mɔgɔ caman sigilen bɛ yɔrɔw la mɔgɔ bɛɛ tɛ se ka don yɔrɔ minnu na. Yɔrɔw wɛrɛ kɔlɔsilen bɛ kosɛbɛ fo an tɛ se ka taa ka wajuli kɛ da ni da o yɔrɔw la. Nka, an ka waleɲumandɔn Jehowa ka kanuya ko la, o b’an bila ka cogo sɔrɔ ko kelen-kelen bɛɛ la walasa k’o mɔgɔw ye ka Masaya kuma fɔ u ye. Ka seereya kɛ nbɛdaw la, o sen bɛ o kow la.— Nta. 1:20, 21.

⁵ Ka segin-ka-bɔnyew kɛ: Ikomi an bɛ ka mɔgɔ ɲini, mɔgɔ minnu b’a “dɔn k’u ye faantanw ye alako ta fan fɛ,” an b’a fɛ k’an seko bɛɛ kɛ walasa k’o mɔgɔw mago ɲɛ. (Mat. 5:3, NW) O b’a wajibiya an ma an ye tiɲɛ kisɛw minnu da, an ka segin ka taa u sɔn. (1 Kɔr. 3:6-8) Ostarali jamana na, an balimamuso dɔ ye sɛbɛndennin di muso dɔ ma. Nka, a tun bɛ iko o muso m’i mago don a la. O n’a ta o ta, an balimamuso y’i timinandiya ka muso sɔrɔ so ko kura. A y’a sɔrɔ tuma min na, an balimamuso y’a ye k’u ka baro fɔlɔ kɔfɛ, muso tun ye Bibulu sɔngɔ gɛlɛn dɔ san. An balimamuso ye kalan daminɛ a fɛ.

⁶ Ka Bibulu kalanw ɲɛminɛ: O bɛ se ka kɛ an ka cidenyabaara kɔnɔko dɔ ye min nisɔndiya n’a baraji ka bon kosɛbɛ. Hɛrɛkoba don ka mɔgɔw dɛmɛ u ka kalan Jehowa ko la, ka ye k’u ye yɛlɛmaw kɛ u ka ɲɛnamaya kɔnɔ walasa k’u kodiya a ye, ani ka ye k’u bɛ ka Krecɛn batɛmu ta, batɛmu min b’a jira k’u y’u yɛrɛbakun di Ala ma.—1 Tes. 2:20; 3 Yuh. 4.

⁷ Sɛbɛn in bɔko nata la, an bɛna cogo caman wɛrɛw lajɛ, cogo minnu fɛ an bɛ dugawu sɔrɔ k’a masɔrɔ an bɛ waleɲumandɔn jira Jehowa ka kanuya ko la.