“Ne bɛ se ka waati sɔrɔ min?”
1 An caman b’o fɔ k’an makasi, katuguni fɛn caman de b’an bolo ka kɛ an ka ɲɛnamaya kɔnɔ. A fɔra ko fɛn minnu b’an bolo, k’olu bɛɛ la, fɛn min nafa ka bon kosɛbɛ nka min bɛ tɛmɛ joona, o ye an ka waati ye. O la sa, an bɛ se ka waati sɔrɔ min walasa ka fɛnw kɛ, fɛn minnu nafa ka bon tiɲɛ yɛrɛ la, i n’a fɔ Ala ka kuma kalan n’a sɛgɛsɛgɛli?—Fil. 1:10.
2 A gundo ye an t’a ɲini ka waati caman sɔrɔ, nka waati min b’an bolo, an ka kan k’a latigɛ fana an b’a fɛ ka min kɛ o la. Lɛrɛ 168 de b’an bɛɛ bolo dɔgɔkun o dɔgɔkun. Olu la, an bɛ se ka 100 ɲɔgɔn kɛ sunɔgɔ ni baara la. O la sa, an bɛ se ka baara kɛ ni lɛrɛ tɔ tolen ye cogo di walasa ka nafaba sɔrɔ o la? Efesekaw 5:15-17 b’a fɔ ka gɛlɛya ko an kana taama ‘iko hakilintan, nka iko hakilitigi, ka waati kunmabɔ . . . Matigi sago ye min ye, k’o dɔn.’ O b’a jira ko an ka kan ka nafa sɔrɔ ko kelen-kelen bɛɛ la walasa Jehowa ko fɛn minnu nafa ka bon, an k’olu kɛ.
3 Yesu ye an ka donw suma ni Nuhun tile ye. (Luka 17:26, 27) O waati la, mɔgɔw tun bolo degunnen bɛ don o don kow fɛ. Nka, Nuhun ye waati sɔrɔ ka kurun belebeleba dɔ jɔ, ka wajuli kɛ. (Heb. 11:7; 2 Piɛ. 2:5) A y’o waati sɔrɔ cogo jumɛn na? A ye Ala sago bila jɔyɔrɔ fɔlɔ, wa, Ala ye fɛn minnu fɔ a ye, a y’a kanminɛ k’olu kɛ “ten.”—Jen. 6:22.
4 Mun ka kan ka bila jɔyɔrɔ fɔlɔ la? Yesu ko: “Dumunifɛn dama tɛ mɔgɔ balo, kuma o kuma bɛ bɔ Ala da la, a bɛ balo o de la.” (Mat. 4:4) Dɔgɔkun o dɔgɔkun, an bɛ “dumuni” sɔrɔ Ala sira la a “waati la.” (Luka 12:42) N’an bɛna an nafa koɲuman, an ka kan k’o bɛɛ faamuya. O b’a wajibiya an ka waati boloda ka kalan kɛ an yɛrɛ kun, k’a sɛgɛsɛgɛ tuma bɛɛ. Ikomi an bɛ nafaba don alako ta fan fɛ dumuni na, o dumuni man kan ka kɛ an bolo iko dumuni min bɛ kɛ joona, min bɛ kɛ teliya la. Sanni a ka kɛ o cogo la, waleɲumandɔn bɛnnen b’an bila ka waati ta ka kalan kɛ, ka nisɔndiya sɔrɔ Ala sira la fɛnw na.
5 Ka alako ta fan fɛ dumuni kɛ, o bɛ se k’an lase ɲɛnamaya banbali ma. (Yuh. 17:3) A ka kan ni jɔyɔrɔ fɔlɔ ye an ka don o don baara bolodalen na. Yali an bɛ se ka waati sɔrɔ walasa k’o bila don o don Bibulu kalan kama, ani Krecɛn lajɛw labɛnni kama wa? Ɔwɔ, an bɛ se. O la sa, an bɛna “barajiba” sɔrɔ Ala sago dɔnni ani a kɛli la. —Zab. 19:7-11.