An ka dannaya da Jehowa kan walasa ka fanga sɔrɔ
1 An ka kan ka dannaya da Jehowa kan ka da kun caman kan. Ka kibaru duman wajuli kɛ “dugukolo yɔrɔ bɛɛ la,” o ye baara gɛlɛn ye. (Mat. 24:14) An b’an farikolo dafabali kɛlɛ tuma bɛɛ. (Rom. 7:21-23) Ka fara o kan, ‘an bɛ bari ta minnu fɛ o ye kuntigiw ni fangatigiw ye, ani nin diɲɛ dibima kunna sigibagaw ye.’ (Efe. 6:11, 12) A jɛlen don k’an mago bɛ dɛmɛ na. An bɛ se ka fanga sɔrɔ ka bɔ Jehowa yɔrɔ cogo di?
2 Delili fɛ: Jehowa b’a ka hakili senu barikama di fu a ka baarakɛlaw ma, a ka baarakɛla minnu b’a ɲini a fɛ. (Luka 11:13) Yali i dalen t’a la k’i bɛ se ka seereya kɛ da ni da, sira kan, walima telefɔni fɛ wa? Yali i bɛ maloya ka senfɛ seereya kɛ wa? N’i bɛ mɔgɔw waju minnu t’i ka kuma lamɛn, yali o bɛ dɔ bɔ i ka timinandiya la wa? Ni degun kɛra i la walasa i k’i ka dannaya sɔsɔ, walima i k’i ka dafalenya tiɲɛ dun? I ka dannaya da Jehowa kan. I ka delili kɛ walasa i ka fanga sɔrɔ.—Fil. 4:13.
3 Yɛrɛkalan fɛ: N’an bɛ dumuni kɛ, an bɛ fanga sɔrɔ an farikolo kama. O cogo kelen na, an bɛ fanga sɔrɔ alako ta fan fɛ n’an bɛ Ala ka Kuma kalan tuma bɛɛ ani sɛbɛn minnu bɛ bɔ “jɔnkɛ dannamɔgɔ hakilima” yɔrɔ. (Mat. 4:4; 24:45) Tuma min na Stanley Jones ɲininkala ko mun ye fanga di a ma a ka se ka muɲu kaso la san caman kɔnɔ Sin jamana na k’a sɔrɔ Bibulu tun t’a bolo, a ko: “An banbannen bɛ se ka to dannaya la. Nka, siga t’a la k’an ka kan ka kalan kɛ fɔlɔ. N’an tɛ kalan kɛ, dusu tɛna kɛ an na cogo si la ka se k’an kologɛlɛya.”
4 Lajɛ taali fɛ: Krecɛn lajɛ dɔ senfɛ san kɛmɛ fɔlɔ la, Juda ni Silasi ‘ye balimaw waju ni kuma caman ye k’u sabati.’ (Kɛw. 15:32) O cogo kelen na bi fana, an bɛ min mɛn lajɛw la, o bɛ dɔ fara an ka waleɲumandɔn kan ka ɲɛsin Jehowa ma, k’an ka dannaya jɔ, ka dusu don an kɔnɔ cidenyabaara kama. Lajɛw bɛ kɛ sababu ye jɛɲɔgɔnyasira ka to tuma bɛɛ anw ni an ‘baarakɛɲɔgɔnw cɛ Ala ka masaya kosɔn,’ olu minnu ye ‘dɛmɛ ye min b’an sabati.—Kol. 4:11, NW.
5 An mago bɛ dɛmɛ na nin ‘waati gɛlɛnw na.’ (2 Tim. 3:1) Mɔgɔ minnu bɛ fanga sɔrɔ ka bɔ Jehowa yɔrɔ, an dalen b’a la, ko: ‘U bɛna pan ni kamanfuraw ye i n’a fɔ bon. U bɛna boli, u tɛna sɛgɛn. U bɛna taama, u barika tɛna ban.” —Esa. 40:31.