Weleweledalaw magoba bɛ yɔrɔ min na, yali i bɛ se ka taa baara kɛ yen wa?
1 Yali i delila k’a miiri i tagali ma yɔrɔ la, yɔrɔ min na Masaya weleweledalaw mago bɛ yen wa? N’i wele bilala i ma k’i ka “na . . . an dɛmɛ,” yali i na o weleli jaabi iko ciden Pol y’a kɛ cogo min na wa? (Kɛw. 16:9, 10) Jɛkulu caman mago bɛ denbaya mɔlenw na alako ta fan fɛ; walima tutigɛbagaw de ko bɛ u la walasa ka wajulikɛyɔrɔ baara, walima u mago bɛ maakɔrɔ faamuyalenw ni cidenyabaara magannaw na ka dɛmɛ don ɲɛminɛni ta fan fɛ. Wajulikɛyɔrɔ bɛ se ka kɛ dugu misɛnw ye minnu yɛrɛkɛlen don sɛnɛkɛyɔrɔw la. Olu ni Masaya So min ka surun, o mabɔlen bɛ se ka sɔrɔ ni kilomɛtɛrɛ caman ye. A bɛ se ka kɛ ko dahirimɛ ɲini baara man ca. Waaticogoya tɛ ɲɛ tuma bɛɛ. Yali i na sɔn k’i kundon o gɛlɛya sugu kɔrɔ wa? Cogo jumɛn na taɲɛ bɛ se ka sɔrɔ a la?
2 Limaniya ni dannaya wajibiyalen don: Ala kɛlen k’a ɲini a fɛ, Abrama bɔra a ka dugu la Ur, ka kilomɛtɛrɛ 1 000 taama kɛ fo Karan, ale n’a furumuso, n’a balimakɛ den, n’a wolofa kɔrɔlen, Tɛrak. (Jen. 11:31, 32; Neh. 9:7) Tɛrak salen kɔfɛ, Jehowa y’a fɔ Abrama ye k’a n’a somɔgɔw ka bɔ Karan ka taa jamana na Ala tun ye min ko fɔ a ye; o y’a sɔrɔ Abrama si tun bɛ san 75 la. Abrama ni Sarayi ni Lɔt y’u ka ‘sira minɛ ka taa.’ (Jen. 12:1, 4, 5) Tiɲɛ don, Abrama ma sigiyɔrɔ yɛlɛma weleweledaw dɛsɛ kosɔn. Nka, a ka sigiyɔrɔ yɛlɛma tun bɛ ko dɔ wajibiya. O ye mun ye?
3 Walasa Abrama k’a ɲini ka sigiyɔrɔ yɛlɛma, limaniya ni dannaya tun ka kan ka ye a la. A miiricogo n’a balocogo tun ka kan ka yɛlɛma. A tun bɛ lakana min na a somɔgɔw cɛla, a tun ka kan ka taa ka o to a kɔ. Nka, a tun dalen b’a la ko Jehowa tun bɛ na i janto ale n’a ka denbaya la. Mɔgɔ caman bɛ k’u ka dannaya jira Jehowa la bi o cogo kelen na.
4 Waati-kuntaala surun ciw: Ka baara kɛ wajulikɛyɔrɔ tigintan na, yali i delila k’i miiri duba caman ma minnu bɛ sɔrɔ o la wa? O kɔrɔ ye ko dɔw tun ka kan ka taama janw kɛ. Mun de bɔra o cɛsiri la?
5 Togo jamana na, an balimakɛ dɔ y’a latigɛ ka segin a ka dugu la a bangera yɔrɔ min na katuguni mɔgɔ si ma kibaru duman wajuli kɛ yen fɔlɔ. Dugu in tun bɛ wajulikɛyɔrɔ tigintan kɔnɔ. Fo ka se o waati ma, ale kelen sɔnna tiɲɛ ma a ka denbaya kɔnɔ. A sera dugu la tuma min na, a y’i yɛrɛ jira a ka denbaya la ka Bibulu kalan kɛ a kun, wa, a taara ɲɛ ka wajuli kɛ u sigiɲɔgɔnw ye. A tora wajuli la, ka se dafɛla duguw fana na. Kalo kɔnɔntɔn bannen kɔ, a bɔra o wajulikɛyɔrɔ tigintan na, mɔgɔ 18 delila ka na lajɛw la cogo basigilen na, wa, kabini o waati la, jɛkulu kura sigira. Sisan, Masaya So bɛ ka jɔ o dugu in na. Balimakɛ nisɔndiyara fana sabu a ka denbaya kɔnɔmɔgɔ 12 sɔnna tiɲɛ na, a ba sen fana tun b’u la. A kɛtɔ ka ko in filɛ, a ko: ‘Jehowa ye duba kɛ an ka baara ye ne ka dugu la cogo min na, ne bolo bonya tun don k’o ye. A diyara ne ni ne muso ye ka kibaru duman wajuli kɛ mɔgɔw ye minnu ma tiɲɛ kumaw mɛn fɔlɔ, ani k’a ye o tiɲɛ y’u kun minɛ cogo min na. An n’an hakili jigin nin ko la tuma bɛɛ ni nisɔndiya ye. Ni wajulikɛyɔrɔ tigintan wɛrɛ baara kɛli se kɛra an ye, an tɛna siga-siga k’o kɛ.’ Kamɛruni jamana na, an balimamuso dɔ min ye wajulikɛyɔrɔ tigintan baara, a y’a sɛbɛn ko: “Ne ye daamu sɔrɔ ka n sɛbɛkɔrɔ-jija kibaru duman fɔli la mɔgɔw ye nin wajulikɛyɔrɔ in na cidenyabaara kɛcogo caman sababu fɛ. . . . Ikomi ne ye Bibulu kalan caman to yen, wa, mɔgɔ caman wɛrɛ tun b’a la ka sɔn an ka cikan ma, . . . ne bɛ aw waleɲumandɔn kosɛbɛ ni balimakɛ dɔ bɛ se ka ci o dusujɛlentigiw ma walasa k’u dɛmɛ.”
6 Ka sɔn a ma ka baara kɛ weleweledalaw magoba bɛ yɔrɔ min na hali waati surun kɔnɔ, o bɛ kuntilenna wɛrɛ timɛ. Minnu b’o kɛ, olu bɛ kunnafoni nafamaw sɔrɔ minnu b’u dɛmɛ “ka jatebɔ kɛ” walasa ka yɛlɛma jamana fan wɛrɛ la. —Luka 14:28, NW.
7 Weleweledalaw magoba bɛ yɔrɔ min na, i ka yɛlɛma yen: Jehowa y’a latigɛ an ka kibaru duman kofɔ “dugukolo yɔrɔw bɛɛ la” sanni laban ka se. (Mat. 24:14) K’a sɔrɔ o dɔnniya b’a la, n’i bɛ se k’a kɛ, yali i b’a fɛ ka yɛlɛma yɔrɔ la cidenyabaarakɛlaw mago bɛ yɔrɔ min na wa? Jamana caman mago bɛ weleweledalaw la.
8 Yali i lasigira k’i bolobɔ baara la wa? Yali sɔrɔ basigilen b’i bolo wa? N’o tɛ, yali i bɛ se k’i labɛn ka baara kɛ i yɛrɛ ye wa? Yali i bɛ se k’i dahirimɛ ɲini yɔrɔ bɛɛ telefɔni walima ɔrdinatɛri sababu la wa? N’i tɛ se ka yɛlɛma, yali i bɛ se k’i ka denbaya kɔnɔmɔgɔ dɔ dɛmɛ ka taa baara kɛ yɔrɔ wɛrɛ la wa?
9 I kɛlen kɔ ka ko lajɛ delili kɔnɔ, n’i y’a ye ko i bɛ se k’i kun don yɔrɔ wɛrɛ tagali gɛlɛya kɔrɔ, baaraba bɛ yɔrɔ min na, e n’i ka denbaya ka kuma o la. E n’i ka jɛkulu maakɔrɔw fana ka kuma o la. O kɔfɛ, i ka bataki labɛn ka di maakɔrɔw ma walasa sanni u ka bataki ci Tɔnbolofara ma, u k’u hakililataw fara a kan.
10 Mun ka kan ka sɔrɔ i ka bataki kɔnɔ? I wolo san, i batisera san min na, i jɔdaw jɛkulu kɔnɔ; i k’a fɔ n’i furulen don walima n’i ma furu, ni den fitininw b’i bolo. I b’a fɛ ka taa baara kɛ duguba, dugunin, walima dugumisɛn min na ka kɛɲɛ n’i ka kow ye, i k’o tɔgɔ sɛbɛn. Misali la, yali i bɛ se ka balo funtenimayɔrɔ la wa? Yali i bɛ fonɛnɛ kun wa? Yali i bɛ se ka sigi yɔrɔ la min bɛ kuluw kan? Yali i bɛ se ka kan wɛrɛw fɔ wa?
11 Yali cɛsiri b’i la wa? Yali i bɛ se ka dabaliw tigɛ wa? Yali i ka cogoyaw b’i yamaruya i ka taa baara kɛ yɔrɔ la, weleweledala ko bɛ min na wa? N’o don, i k’a kɔlɔsi cogo min na Jehowa bɛ t’a fɛ ka duba caman lajigin mɔgɔw kan minnu dalen bɛ ale la k’u to jɛn-n-yɛrɛ-kɔ jogo jira la!—Zab. 34:9; Mal. 3:10.