Kafo ka jamalajɛ kalan bolodalen kura

Siran ɲɛfɔcogo dɔ ye nin ye: “bonya dunba, walima bonyaba kɛrɛnkɛrɛnnenya la ka ɲɛsin Ala ma.” O bɛ siran ɲuman, walima alaɲɛsiranyɛ de jira min kofɔlen bɛ Sɛbɛnniw kɔnɔ i n’a fɔ “hakilitigiya daminɛ.” (Zab. 111:10) Nka, siran sugu wɛrɛ barika ka bon Sitanɛ ka diɲɛ kɔnɔ min b’an lamini. An bɛ se k’an tanga o siran jugu ma cogo di, ka Jehowa ɲɛsiranyɛ bonya an na? An ka ala-ka-marako san 2002 kafo ka jamalajɛ kalan bolodalen kura bɛna o ɲɛfɔ. A kumakun ye ko: “A’ ye siran Ala ɲɛ, ka nɔɔrɔ da a kan.” (Jir. 14:7, ABU) Sira caman minnu fɛ Jehowa ɲɛsiranyɛ b’an kelen-kelen bɛɛ nafa, ani a b’an bɛɛ lajɛlen nafa cogo min na iko jɛkuluba, an bɛna olu faamuya.

Hali ni siran kɔrɔ bɛ se ka kɛ k’an jɔrɛlen don, walima ko dusu t’an na tun ka cogo gɛlɛnw kɛlɛ, walima k’an t’a fɛ k’u kɛlɛ, Bibulu b’a fɔ ko: ‘Mɔgɔ minnu bɛ siran Jehowa ɲɛ, olu de ye dubadenw ye.’ (Zab. 128:1) An bɛ se ka taɲɛ sɔrɔ cogo min na gɛlɛyaw kɛlɛliw la, gɛlɛya minnu sirilen don bato lakika la, jamalajɛ kalan bolodalen bɛn’o jira an na. An bɛ se ka mɔgɔ kuraw dɛmɛ cogo min na fana walasa u ka alaɲɛsiranyɛ baara u la, alaɲɛsiranyɛ sugu min bɛna u bila tiɲɛ yɛrɛ la u ka kɛ a fɛ ka baara kɛ Ala ye n’u dusukun bɛɛ, u ni bɛɛ, u hakili bɛɛ, ani u fanga bɛɛ ye, an bɛna o fana ye. (Mar. 12:30) Jamalajɛ don fɔlɔ bɛ ban ni kafo lakɔlɔsibaga ka jɛmukan ye ko: “I bɛ mɔgɔ minnu kanu, i ka gɛrɛ olu la kosɛbɛ.” Sitanɛ bɛ dabali minnu kɛ walasa k’an yɔrɔ janya Jehowa la, an ka denbaya la, an’an Krecɛn ɲɔgɔn na, kafo lakɔlɔsibaga bɛna olu ɲɛfɔ. An bɛ se ka to an ɲɛ na cogo min na o kow la, a bɛna o fana jira.

Tile filanan bɔɲɔgɔnkɔrɔ jɛmukan yɔrɔ naani kumakun ye ko: “I ka siran Jehowa ɲɛ, i kana siran hadamadenw ɲɛ.” O bɛn’a jira an na mun na, ani cogo di an ka kan ka siran sugu bɛɛ kɛlɛ, n’o siran b’an bali k’an ka cidenyabaara kɛ a ɲɛ ma, walima k’an ka dafalenya, ni kɔnɔnahakili jɛlen mara kalanso la, ani baarakɛyɔrɔ la. Foroba jɛmukan bɛna nin fana ɲɛfɔ: “A’ ye siran Jehowa ɲɛ k’a ka ci fɔlenw mara.” A sinsinnen bɛ Jirali sigida 14 na kow kan, ko minnu bɛ tugu-tugu ɲɔgɔn kɔ. Kafo ka jamalajɛ bɛna laban ni dusulamin kuma ye ko: “A’ ye taama Jehowa ɲɛsiranyɛ kɔnɔ ka t’a fɛ.”

Ala-ka-marako Cidenyabaara Kalan, Baara ka Lajɛ ɲɛjirali, batɛmu jɛmukan, ani La Tour de Garde bakurubafɔli ye kalan bolodalen yɔrɔkoloma dɔ wɛrɛw ye, i t’a fɛ o minnu ka fɔ i kɔ. I ka wele bila i ka Bibulu kalandenw ma u ka ye jamalajɛ kɛnɛkan i fɛ. Mɔgɔ o mɔgɔ b’a fɛ ka batise, o tigi ka kan k’o fɔ lakɔlɔsibaga ɲɛmɔgɔ ye joona. An kelen-kelen bɛɛ b’a fɛ k’an ka alaɲɛsiranyɛ jira Jehowa ta fan fɛ, ka nɔɔrɔ da a kan. An b’o jira n’an bɛ fɛn bɛɛ kɛ walasa kalan bolodalen yɔrɔ si kana fɔ an kɔ.