An kana an yɛrɛminɛ wajuli kɛ la!

¹ N’an b’an labɛn ka taa da-ni-da wajuli baara la, an bɛ se ka gɛlɛyaw bɛɛ la belebele min sɔrɔ, a bɛ se ka kɛ k’o tɛ ka taa mɔgɔ dɔ ka soda la walasa ka wajuli kɛ dɛ, nka o ye k’an yɛrɛw ka soda sagon walasa ka taa wajuli kɛ. N’an bɛ miiri k’an tɛ se, o bɛ se k’an bila an k’an yɛrɛminɛ ka kuma tiɲɛ ko kan ‘mɔgɔ sugu bɛɛ’ fɛ. (1 Tim. 2:4) Nka, a kun tɛ an ka sigasiga ka kibaru duman fɔ. Mun na o kun tɛ?

² Jehowa ka cikan don: Jehowa y’a ka kuma lase an ma Bibulu sababu fɛ. N’an b’o ci fɔ mɔgɔ wɛrɛw ye, an b’a ka miiriyaw de lase, an ta tɛ. (Rom. 10:13-15) Ni mɔgɔw bɛ ban Masaya cikan na, tiɲɛ yɛrɛ la, u bɛ ka ban Jehowa de la. O n’a ta o ta, an dusu tiɲɛnen tɛ. A negeba bɛ mɔgɔ minnu na yɛlɛma ka don diɲɛ cogoyaw la, ani mɔgɔ minnu b’u mago dɔn alako ta fan fɛ kow la, an dalen b’a la k’o Masaya cikan bɛna o mɔgɔw dusukunw bila u ka sɔn.—Eze. 9:4; Mat. 5:​3, 6.

³ Jehowa bɛ mɔgɔw sama ka na a ma: Mɔgɔ min tun banna k’an lamɛn waati tɛmɛnnen na, laala o tigi bɛ se ka sɔn sisan bawo a ka cogoyaw yɛlɛmana, a dusu fagara fana. Jehowa bɛ se sisan k’a ka ɲumanya jira o tigi fan fɛ, k’a “sama” ka na ale ma. (Yuh. 6:​44, 65) N’o kɛra tuma min na, an b’a fɛ an labɛnnen ka kɛ walasa ka kɛ baarakɛminɛnw ye Jehowa bolo, ka sɔn fana mɛlɛkɛw ka ɲɛminɛni ma walasa k’o mɔgɔ suguw ɲini k’u ye.— Jir. 14:6.

⁴ Ala b’a ka hakili senu di an ma: Hakili senu bɛ se k’an dɛmɛ an ka se ka kuma ‘ni jagɛlɛya ye, Jehowa ka se fɛ.’ (Kɛw. 14:​1-3, NW) N’an b’an hakili to a la ko o dɛmɛ barikama b’an fɛ an ka cidenyabaara la, a tɛna gɛlɛya an ma ka kuma tiɲɛ kan an sigiɲɔgɔnw, an baarakɛɲɔgɔnw, an kalandenɲɔgɔnw, ani an balimaw fɛ, walima mɔgɔ kalannenw, walima nafolotigiw fɛ.

⁵ Yesu b’an kalan a kɛcogo la: Yesu ye baara kɛ ni ɲininkaliw ye minnu tun bɛ mɔgɔ bila ka miiri, ni misali nafamaw ye, ani ni Bibulu tɛmɛsiraw fana ye minnu tun bɛ mɔgɔ bila hakilijakabɔ la. A tun ye tiɲɛ ɲɛfɔ cogo nɔgɔn na, min tun ka di mɔgɔw ye, n’a tun bɛ bɔ a dusukun na. O kɛcogow de ye u bɛɛ la ɲumanw ye hali bi. (1 Kɔr. 4:17) An bɛ wajuli kɛ cogo minnu kɔnɔ, a bɛ se ka kɛ k’olu tɛ kelenw ye, nka Masaya cikan barikama ye kelen de ye tuma bɛɛ.

⁶ Bonya b’an bolo ka kɛ baarakɛminɛnw ye Jehowa bolo walasa ka mɔgɔw dɛmɛ cogo kɛrɛnkɛrɛnnen ni cogo nafama na. An kana an yɛrɛminɛ wajuli kɛ la! An ka kisɛya, k’a to Jehowa ka “da yɛlɛ an ɲɛ a ka kuma kosɔn” walasa an ka kibaru duman fɔ mɔgɔ wɛrɛw ye.—Kol. 4:2-4, ABU.