I labɛnnen ka kɛ walasa ka Esayi ka kiraya kuma sɛgɛsɛgɛ
1 “Batobaga kantigiw bɛ se ka daŋaniya a la ko Jehowa tɛn’a to don kelen ka fara Sitanɛ ka diɲɛ ka donw kan ka kɛɲɛ ni ko wajibiyalen ye tilennenya sira la.” Nin ye dusulamin kuma ye dɛ! O kuma dun tara min? A tara La prophétie d’Isaïe, lumière pour tous les humains I gafe kɔnɔ. Yali Esayi ka kiraya kuma bɛ kun di an ma k’o dusulamin kuma ɲɔgɔn fɔ wa? Ɔwɔ. O Bibulu kitabu in kɔnɔ, kumakun min fɔlen bɛ ni barika ye, cogo jɛlen na, o ye kisili ye. (Esa. 25:9) O la sa, a bɛna kɛ dusulaminba ye an bolo k’o Bibulu yɔrɔ sɛgɛsɛgɛ Jɛkulu ka Gafe Kalan na. Yali an bɛna kɛ Jɛkulu ka Gafe Kalan na walasa ka nafa sɔrɔ o la dɔgɔkun o dɔgɔkun wa? Mun na an ka kan k’o kɛ?
2 Esayi 30:20 na, Jehowa welela ko an “Karamɔgɔba.” Jehowa b’an kalan a ka Kuma fɛ, ani sɛbɛnw fɛ, sɛbɛn minnu sinsinnen bɛ Bibulu kan, ni “jɔnkɛ dannamɔgɔ hakilima” b’u di an ma. Krecɛn kelen-kelen bɛɛ ka kan k’i ɲɛmajɔ kosɛbɛ o kalan fɛ. (Mat. 24:45; Esa. 48:17, 18) A jɛlen don ko La prophétie d’Isaïe I gafe sen b’o kalan na. An bɛ se ka nafaba sɔrɔ o sɛgɛsɛgɛli la cogo di?
3 I labɛn k’i ta fɔ: Dɔgɔkun o dɔgɔkun, waati ɲɛnama bila gafe kalan labɛnni kama. Yɔrɔ min ka kan ka kɛ, i k’o kalan dakun ni dakun. I k’i hakili sigi ɲininkali kelen-kelen bɛɛ fɛ. Taamasiyɛn kɛ jaabiw kɔrɔ i ka gafe kɔnɔ. Tilayɔrɔdennin minnu bɛ bɔ Esayi ka kitabu kɔnɔ, olu de ye sɛbɛnni kunbaba finmanw ye. U kalan ni ɲɛmajɔ ye. Min ye tɛmɛsira kofɔlen tɔw ye, i k’olu lajɛ walasa k’a dɔn u ni kalan bɛ ɲɔgɔn minɛ cogo min na. I bɛ ka min kalan, i ka taasi o la. O kɔ, i ye min sɔrɔ i ka labɛn kɔnɔna na, i k’o fɔ i ka gafe kalan lajɛ la.
4 Balimakɛ min bɛ gafe kalan ɲɛminɛ, o ka kan ka lamɛnbagaw bɛɛ dɛmɛ u ka baara ɲuman kɛ ni Bibulu ye. Nafa min bɛ kalan kɛlen na, a b’u dɛmɛ fana o ko ka bonya u bolo kosɛbɛ. N’a ɲinina e de fɔlɔ fɛ ka kuma, i tilen ka jaabi jɔnjɔn di, fɔcogo nɔgɔn na. Ni dɔ y’o kɛ kaban, baro bɛ fɛn min kan, i bɛ se k’o walanwalan. A dɔ rɔ, tɛmɛsira kɛrɛnkɛrɛnnen bɛ barokun kɔkɔrɔdon cogo min na, i bɛ se k’o ɲɛfɔ. I jija ka ɲɛfɔli kɛ n’i yɛrɛ ka kumaw ye, ka tila ka nisɔndiya sɔrɔ o la bawo e fana y’i ta fɔ baro la.
5 A negeba ka kɛ an na ka Esayi ka kitabu cikan nafama sɛgɛsɛgɛ ɲɔgɔn fɛ. O bɛna dusu don an bɛɛ kɔnɔ ka balo don o don nisɔndiya la kisili makɔnɔni na, kisili min bɛna kɛ Jehowa fɛ.—Esa. 30:18.