I ka kalan ka se i ka kalanden dusukun na
1 Sanni Yesu ka yɛlɛn sanfɛ, a y’a fɔ a ka kalandenw ye k’a ye ci minnu bɛɛ fɔ u ye, k’u ka mɔgɔ wɛrɛw kalan u ka “tugu” olu la. (Mat. 28:19, 20) Ni mɔgɔ dɔ bɛna “tugu” Krista ka ciw la, dɔnniya ka kan ka se a tigi dusukun na. (Zab. 119:112) I bɛ Bibulu kalan min kɛ mɔgɔ dɔ kun, o bɛ se o tigi dusukun na cogo di?
2 Jehowa deli a ka ɲɛminɛ na: Ka mɔgɔw kɛ kalandenw ye, o ye Ala ka baara ye. Ale de ka duba jɔyɔrɔ ka bon taɲɛ na, an sekow tɛ. (Kɛw. 16:14; 1 Kɔr. 3:7) O la sa, ka Jehowa ka dɛmɛ ɲini mɔgɔ wɛrɛw kalanni na, o nafa ka bon kosɛbɛ.—Esa. 50:4.
3 Kalanden dalen bɛ min na, i k’o faranfasi: Mɔgɔw dalen bɛ min na, ani mun na u dalen bɛ o la, o dɔnniya sɔrɔli bɛ se ka faamuya di an ma an ka kuma fɔta kan walasa o ka se u dusukunw na. Kalanden ɲɛ na, mun na kalansira dɔ ka ɲi? Mun b’a daŋaniya a la ko fɛn don mɔgɔ bɛ se ka da min na? O dɔnniya sugu bɛ se k’an dɛmɛ ka kuma ni faamuya ye.— Kɛw. 17:22, 23.
4 I ka hakilijakabɔ sira nafama dɔ labɛn Bibulu kan: Kalanden ka kan ka se ka tiɲɛ faamu. (Kɛw. 17:24-31) An ka kan ka kun ɲɛnama di an ka jigiya ko la. (1 Piɛ. 3:15) Nka, an k’o kɛ tuma bɛɛ ni ɲumanya ni sabali ye.
5 I ka kalan barika bonya ni misaliw ye: Misaliw tɛ faamuyali dɔrɔn nɔgɔya kalanden bolo, nka u b’a bila wale la. U bɛ nɔ bila mɔgɔ hakili n’a dusukun na. Yesu ye baara kɛ n’u ye tuma caman na. (Mar. 4:33, 34) Walasa nafa ka kɛ misali la, a jɛlen don ko baro bɛ kɛ fɛn min kan, a ni o ka kan ka bɛn ɲɔgɔn ma, wa, a ka kan ka se ka waleya kalanden ka ɲɛnamaya kɛcogo fana kan.
6 Ka sɔn tiɲɛ na, o nafaw jira: Mɔgɔ bɛ fɛn min kalan, u b’a fɛ k’a dɔn nafa min bɛ a sirataamani na. Hakilitigiya min bɛ ye Pol ka kumaw na minnu bɛ 2 Timote 3:14-17 la, kalanden dɛmɛ a k’o faamu.
7 I dusu kana tiɲɛ ni mɔgɔ dɔw tɛ sɔn i ka kalan na. Dusukunw bɛɛ tɛna sɔn. (Mat. 13:15) Nka, mɔgɔ dɔw bɛna kɛ dannabagaw ye. (Kɛw. 17:32-34) I bɛ cɛsiri minnu kɛ walasa kibaru duman ka se mɔgɔ dusukunw na, Ala k’a to o cɛsiriw ka mɔgɔ caman wɛrɛw dɛmɛ u ka sɔn Yesu ka ci fɔlen na ka tila ka “tugu” o la.