I janto a la ka mɛnnikɛbaliw ɲini i ka wajulikɛyɔrɔ la

¹ Jehowa bɛ ka weledali kɛ, ko: “ ‘Na!’ . . . Min b’a fɛ, o ka ɲɛnamaya ji min gansan.” (Jir. 22:17) Mɔgɔ minnu bɛ o wele jaabi, olu cɛma, mɛnnikɛbaliw hakɛ bɛ ka caya. O de kosɔn, san 13 tɛmɛnenw kɔnɔ, mɛnnikɛbaliw ka kan taamasiyɛnma jɛkulu 27 ani kulunin 43 de sigira Ameriki tɔnbolofara ka yamaruya kɔnɔ. Togo jamana fana na, Lomé dugu la, Ameriki kan taamasiyɛnma jɛkulunin dɔ bɛ yen.

² Hali ni o jɛkuluw n’o kuluninw bɛ cɛsiri bɛɛ kɛ walasa ka mɛnnikɛbaliw ni tulogerenw sɔrɔ u bɛɛ kelen-kelen ka wajulikɛyɔrɔw la, o tigilamɔgɔ caman ma sɔrɔ fɔlɔ ka wajuli kɛ u ye jamana in na.

³ I bɛ se ka dɛmɛ don cogo di? N’i bɛ fɛrɛ la, yali i bɛ mɔgɔw kɔlɔsi minnu bɛ kuma ni taamasiyɛnw ye wa? Yali i bɛ mɔgɔ dɔn i ka baarakɛyɔrɔ walima i ka kalankɛyɔrɔ la min sɔmɔgɔ dɔ ye mɛnnikɛbali ye wa? I janto a la ka mɛnnikɛbaliw ɲini i ka don o don baara senfɛ. Nka, i bɛ se ka mun kɛ walasa i jɛyalen k’a dɔn ko Masaya seereya bɛna kɛ u ye?

⁴ Ka seereya kɛ: Jateminɛ kɛlenw b’a jira ko mɛnnikɛbali caman bɛ ɲɛtaa kɛ teliya la tiɲɛ dɔnniya kalanni na ni u ni Jehowa Seere mɛnnikɛbaliw bɛ se ka don jɛɲɔgɔnya la jɛkulu lajɛw kɔnɔ, kan taamasiyɛnma bɛ fɔ minnu na. K’o to i hakili la, ni i ni mɛnnikɛbali dɔ bɛ bɛn wajuli la, i k’a tɔgɔ n’a jamu n’a ka sɔrɔyɔrɔ sɛbɛn n’o ye a ka so jateden ye ani nbɛda walima sira jateden walima sira tɔgɔ ka fara kunnafoni wɛrɛw kan minnu bɛ se ka o mɔgɔ sɔrɔli nɔgɔya. I jija k’a dɔn ni mɛnnikɛbali bɛ kan taamasiyɛnma dɔ faamu. I ka kunnafoni bɛɛ di i ka jɛkulu sɛbɛnnikɛla ma walasa kalo sa o kalo sa, a ka se ka Tɔn ladɔnniya mɛnnikɛbali bɛɛ ko la minnu bɛ i ka jɛkulu ka wajulikɛyɔrɔ la. O cogo la, Tɔn na se ka fɛɛrɛw tigɛ ka ɲɛsin mɛnnikɛbaliw ma wajulikɛyɔrɔ la.

⁵ Nka, sanni o fɛɛrɛw ka sigi sen kan, mun bɛ kɛ ni mɔgɔ si man surun i sigida la min bɛ se ka mɛnnikɛbaliw dɛmɛ alako ta fan fɛ? E bɛ se ka dɛmɛ don cogo jumɛn na? Mun na i tɛna segin ka bɔnye kɛ walasa ka kuma a somɔgɔ mɛnnikɛlaw fɛ? I bɛ se k’u ɲininka n’a ka di u ye ka videyo kasɛti lajɛ kan taamasiyɛnma na min bɛ se ka dusu don mɛnnikɛbali kɔnɔ a ka nafa don an ka cikan na. Weleweledala dɔw y’u timinandiya kan taamasiyɛnma dege la walasa ka kuma mɛnnikɛbaliw fɛ ka ɲɛ. (Kɛw. 16:​9, 10) Wajibiya gafenin ani Dɔnniya gafe fila bɛɛ bɛ sɔrɔ videyo kasɛti kan Ameriki kan taamasiyɛnma na. Ka Bibulu kalan kɛ mɔgɔ kun ni nin baarakɛminɛnw ye, o nana ni taɲɛ ɲumanba ye.

⁶ N’i b’i janto a la ka mɛnnikɛbaliw ɲini i sigida la, i bɛ se ka cogo di u ma ka ɲɛnamaya ji min gansan.—Mat. 10:11.