An ka kow labɛn sini kama kuntilenna jumɛn nɔfɛ?

¹ An kelen-kelen bɛɛ b’a fɛ ka ko minnu kɛ waati nata la, an bɛ miiri o la. Mɔgɔ minnu jigiya ye ka to dugukolo kan, olu bɛ miiri ka ɲɛnamaya banbali kɛ Ala ka diɲɛ tilennen kɔnɔ. Nka, fɛn barikama dɔw bɛ yen minnu bɛ se k’o jigiya ta ka bɔ an dusukun na. Walasa Masaya kunkankow ka to jɔyɔrɔ fɔlɔ la an ka ɲɛnamaya kɔnɔ, ani walasa u kana se ka bila farisogo negebaw kɔfɛ, o bɛ cɛsiriba de wajibiya.—1 Yuh. 2:15-17.

² Mɔgɔ minnu b’u ka ɲɛnamaya sinsin alako ta fan fɛ kuntilennaw kan, diɲɛ tɛ se k’o mɔgɔw kuntilennaw faamu. (1 Kɔr. 2:14) Tuma min na mɔgɔ tɔw bɛ ka cɛsiri sugu bɛɛ kɛ walasa ka tɔgɔ, fanga, walima nafolo sɔrɔ, an kɔni bɛ k’an cɛsiri alako ta fan nafolow de nɔfɛ. (Mat. 6:19-21) N’an b’a ɲini k’an miiricogo bɛn diɲɛ miiricogo ma sini ko ta fan fɛ, yali an bɛna se k’an kuntilennaw sɔrɔ alako ta fan fɛ wa? Ayi, a tɛ mɛn an dusukun bɛɛ bɛna kɛ diɲɛ fɛnw na. O la sa, an bɛ se ka mun kɛ walasa k’o bali?

³ “Aw ka Matigi Yesu don aw la”: Cogo minnu dɔ la kelen fɛ an bɛ se k’a dɔn n’an bɛ k’an ka sini labɛn walasa ka Masaya kunkankow bila jɔyɔrɔ fɔlɔ la an ka ɲɛnamaya kɔnɔ, o ye k’an ka barow jateminɛ. Yali an bɛ kuma tuma bɛɛ nafolo kow ni ko gansanw de kan wa? N’an b’o de kɛ, an ka kan k’a lajɛ ni alako ta fan fɛ kunkankow tɛ ka bɔ an dusukun na. A dɔ rɔ, an mago b’a la k’an jija kosɛbɛ walasa ka ‘Matigi Yesu Krista don an na,’ sanni an ka ‘farisogo negekow ɲɛsigi.’—Rom. 13:14.

⁴ Funankɛw bɛ se ka ‘Krista don u la’ n’u bɛ kow labɛn walasa ka kɛ waati dafalen cidenyabaarakɛlaw ye don dɔ. Funankɛ dɔ tun b’a fɛ ka kɛ tutigɛbaga basigilen ye. Nka, a lamɔna yɔrɔ min na, tuma caman na o yɔrɔ mɔgɔw miiricogo ye ko funankɛw ka kan ka se u yɛrɛ kɔrɔ. O la sa, a y’i yɛrɛ di a ka baara ma ka se yɔrɔ dɔ la fo n’a tun bɛ lajɛw la, walima n’a tun bɛ cidenyabaara la, a dusukun tun tɛ o kow la bilen, a tun bɛ k’u kɛ ten dɔrɔn. Nka, a y’a daminɛ tuma min na k’a ka dannaya da Yesu ka kumaw kan minnu bɛ Matiyu 6:33 la, ka tila k’i sen bɔ baara la min tun bɛ k’a ka waati n’a ka fanga bɛɛ ta, a y’i sen don waati dafalen wajulibaara la walasa k’o kɛ a ka baara ye kudayi. Sisan, a dusukun jɛlen de bɛ ka baara kɛ Jehowa ye, iko a yɛrɛ b’a fɔ cogo min na, n’a ‘seko bɛɛ ye.’

⁵ Bibulu b’a fɔ ko hakilitigiyako don ka kow labɛn sini kama. (Nta. 21:⁠5) An kelen-kelen bɛɛ k’o ɲɔgɔn kɛ, ka Ala sago to jɔyɔrɔ fɔlɔ la an hakili la.—Efe. 5:15-17.