Ɲininkaliw Jaabi — Watchtower BIBILIYOTƐKI INTƐRINƐTI KAN

Ɲininkaliw Jaabi

◼ Mɔgɔ min kɛra walekɛbali ye waati jan kɔnɔ, o bɛ se ka dɛmɛ cogo di walasa a ka kɛ kibaru duman weleweledala ye ko kura?

Ni walekɛbali dɔ y’a jira k’a negeba b’a la ka baara kɛ Jehowa ye, o ye nisɔndiyako ye. (Luka 15:4-6) A ka c’a la k’o tigilamɔgɔ y’a to diɲɛ degunkow walima diɲɛ gɛlɛyaw k’a bali ka yɛrɛkalan kɛ, ka taa lajɛw la ani k’i sen don foro cidenyabaara la. O tigi bɛ se ka dɛmɛ ka ɲɛ cogo di walasa a ka ɲɛtaa kɛ hakili ta fan fɛ?

An bɛɛ bɛ se k’a bɔ an yɛrɛ la k’an ka balimaya kanu jira o tigi la. A mago bɛ min na tigitigi hakili ta fan fɛ, maakɔrɔw bɛna u teliya k’o jateminɛ. (Yak. 5:14, 15) N’a ma mɛn walekɛbaliya la, weleweledala min bɛ se kosɛbɛ, o ka dɛmɛ bɛ se ka wasa kɛ walasa a ka kɛ walekɛla ye ko kura foro baara la. Nka, ni walekɛbali mɛnna k’a sɔrɔ a sen tɛ jɛkulu ka ko si la, fɛn wɛrɛ wajibiyalen don. Walasa ka dɔ fara a ka limaniya n’a ka waleɲumandɔn kan, a fɔra k’a gɛlɛya k’o tigi ka kan ka Bibulu kalan kɛ gafe bɛnnen dɔ kan. O la sa, Baara Lakɔlɔsibaga bɛna ko labɛn walasa weleweledala faamuyalen dɔ k’a ka kalan ɲɛminɛ. (Heb. 5:12-14; san 1998 Nowanburukalo An ka Masaya Cidenyabaara Ɲininkaliw jaabi lajɛ.) N’i bɛ mɔgɔ dɔ dɔn min mago bɛ o dɛmɛ sugu la, o fɔ i ka jɛkulu Baara Lakɔlɔsibaga ye.

Weleweledala min mɛnna a ka walekɛbaliya la, sanni k’a ɲini o fɛ a k’i sen don ko kura cidenyabaara la, a fɔra k’a gɛlɛya ko maakɔrɔ fila ka kan k’o tigi ye walasa k’a sɛgɛsɛgɛ n’a bɛ cogow dafa ka kɛ Masaya weleweleda ye ko kura. U bɛn’a kɛ i n’a fɔ u b’a kɛ cogo min na ni mɔgɔ kura dɔ b’a ɲini ka cogo dafa walasa ka kɛ kibaru duman weleweledala ye. (San 1988 Nowanburukalo tile 15 La Tour de Garde ɲɛ 17 lajɛ.) A nɛgɛba ka kan ka kɛ walekɛbali la ka kibaru duman fɔ mɔgɔ wɛrɛw ye. Ka fara o kan, cogo wajibiyalen minnu bɛ Notre ministère gafe kɔnɔ, a ɲɛ 99 na, a ka kan k’olu dafa ani a ka kan ka deli ka taa jɛkulu lajɛw la cogo basigilen na.

Ka delinako ɲumanw sɔrɔ hakili ta fan fɛ, o bɛ mɔgɔ seginnen dɛmɛ kosɛbɛ k’a ni Jehowa cɛjuru kologɛlɛya, ka bɛn to o tigi ni Jehowa cɛ, ani ka to taama na ɲɛnamaya banbali sira kan. (Mat. 7:14; Heb. 10:23-25) O delinako ɲumanw b’a dɛmɛ fana a k’i “jija kosɛbɛ” ka Krecɛn jogow bonya a yɛrɛ la, Krecɛn jogo minnu bɛ mɛn. Olu ye fɛnw ye minnu bɛna a bali ka kɛ Krista ka kalanden ‘walekɛbali, walima nafantan’ ye tuguni.—⁠2 Piɛ. 1:5-8, NW.