Magojirabaga minnu sɔrɔla Nouvelles du Royaume No. 36 sababu fɛ, an ka dɔ fara olu ka magojira kan
1 Nouvelles du Royaume No. 36 hakɛ min dira i ma, yali i y’o bɛɛ tilatila kaban wa? A bɛ ɲininkali bɛnnen lawuli, n’an bɛɛ ka kan ka taasi o la. O ye ko “San ba kelen kura—I ka siniɲɛsigi bɛna kɛ mun ye?” San 2000 tun bɛ ka surunya tuma min na, san ba kelen kura nana ni jigiya sugu caman ye. Nouvelles du Royaume No. 36 b’o jigiya dɔw jateminɛ, k’an hakili jigin ko diɲɛ cogow tɛ dalilu di an ma ka hakili ɲuman sɔrɔ. Mɔgɔw fanba bɛ hɛrɛ ni lafiya minnu ɲini, san ba kelenpe min bɛ na n’o ye, o ye Yesu Krista ka san ba kelen mara ye. Dannaya min b’an na k’o Masaya ye tiɲɛ ye, o de y’an bila an ka Nouvelles du Royaume No. 36 di mɔgɔw ma, an sera ka mɔgɔ o mɔgɔ lasɔrɔ.
2 Mɔgɔw ka kɛwalew kɛra minnu ye, Nouvelles du Royaume ko la: Nouvelles du Royaume minnu tilatilara ka kɔrɔ, o ye fɛn ɲuman ye min b’an dusu lamin an ka baara la. Nouvelles du Royaume No. 35 ko la, tɔnbolofara min bɛ Kanada, o y’a sɛbɛn ko: “O jɛnsɛnni baara kɔkɔrɔdonna ni nisɔndiya ye weleweledalaw ni tutigɛbagaw fɛ foro la, wa, u caman ye dusulaminkow sɔrɔ o la.” Siga t’a la k’i ye o nisɔndiya kelen jira Nouvelles du Royaume No. 36 tilatilali la.
3 A bolodara ko nin Nouvelles du Royaume jɛnsɛnni ka kan ka ban san 2000 Nowanburukalo tile 17 la. Wajulikɛyɔrɔ min dira i ka jɛkulu ma, yali o bɛɛ kɛra kaban wa? N’o ma ban, maakɔrɔw bɛ se k’a ɲini i fɛ i ka taa a tilatilali fɛ fo Nowanburukalo laban na.
4 I sigida la, mɔgɔw ka kɛwalew kɛra mun ye fo sisan Nouvelles du Royaume No. 36 tilatilali la? A dɔ rɔ, mɔgɔ damadɔw bɛna sɛbɛn ci an ka ladɛrɛsi ma min bɛ sɛbɛndennin kɔkan walasa ka Wajibiya gafenin ani Bibulu kalan ɲini, walima o fila dɔw la kelen. Nka, mɔgɔ minnu ye magojira kɛ san ba kelen barokun ko la, a ka c’a la k’olu fanba tɛna fosi kɛ fo ni Jehowa Seere dɔ seginna ka taa bɔ u ye. Mɔgɔ minnu ye magojira kɛ, an ka kan ka taa bɔ u bɛɛ ye ko kura. O kɛwaati ɲuman ye tuma jumɛn ye? O ye k’o kɛ joona-joona.
5 Nin ko kɛlen minnu sɔrɔla Nouvelles du Royaume No. 35 tilatilali la, i k’olu jateminɛ. Irilandi tutigɛbaga dɔ tun ye Nouvelles du Royaume kelen to dumunikɛyɔrɔ dɔ tigi bolo. Kuma min fɔra, o ye fɛn kɛ muso la fo a y’a ɲini balimamuso fɛ a ka segin ka na. An balimamuso seginna tile fila kɔnɔ, o kɛra Bibulu kalan dɔ daminɛ ye. Danemarki, Nouvelles du Royaume kelen bilara soda dɔ la min tigi tun tɛ yen. O don kelen yɛrɛ la, muso min tun bɛ o so kɔnɔ, a ye sɛbɛn ci tɔnbolofara ma min y’o lase jɛkulu ma, jɛkulu min tun bɛ o muso ka sigida la. Sanni dɔgɔkun ka dafa, balimamuso fila taara bɔ a ye, kalan dɔ sigira sen kan, muso taara fana a ka lajɛ fɔlɔ la Masaya So kɔnɔ.
6 I bɛ min fɔ n’i seginna ka taa: Ka segin-ka-bɔnyew kɛ Nouvelles du Royaume bilalen kɔfɛ, o ka nɔgɔn, wa o y’an ka cidenyabaara yɔrɔ duman dɔ ye. N’i b’o kɛ tuma min na, a ka ɲi i ka taa ni Nouvelles du Royaume No. 36 kelen ye i bolo n’a nana kɛ k’i barokɛɲɔgɔn ta tɛ a bolo tun. I bɛ se ka nin hakilinataw lajɛ:
7 I kɛlen kɔ k’i kofɔ i barokɛɲɔgɔn ye, i bɛ se k’a fɔ ko:
◼ “N tun ye sɛbɛndennin dɔ to i bolo min tɔgɔ ye ko ‘San ba kelen kura—I ka siniɲɛsigi bɛna kɛ mun ye?’ K’a kalan ko Yesu Krista ka san ba kelen mara bɛna daminɛ sɔɔni, ani ka Alijinɛ sigi dugukolo kan, yali o tɛ nisɔndiyako ye wa? [Alijinɛ ja minnu bɛ Nouvelles du Royaume No. 36 la, olu jira.] Ɲɛ laban b’a jira k’i bɛ se ka Ala bɛ mun wajibiya an ma? gafenin ɲini.” O gafenin jira a la. A kalansen 5 nan ta ka ɲininkali fɔlɔ ani dakun fɔlɔ ni filanan kalan. A ɲini i barokɛɲɔgɔn fɛ a k’a hakilinata fɔ. Tɛmɛsira kelen walima fila kalan, ka kuma o kan. N’a bɛ se ka kɛ, baro kɛ ɲininkali wɛrɛ ani dakun wɛrɛ kan, ka tila ka fɛɛrɛw tigɛ walasa ka segin ka na, ani ka t’a fɛ ni baro ye.
8 Ikomi Nowanburukalo sɛbɛn jirata bɛna kɛ “Wajibiya” gafenin ye, walima “Dɔnniya” gafe ye, i bɛ se k’a fɔ ko:
◼ “N nana bɔ i ye tuma min na, n ye sɛbɛn to i bolo, n’o tun ye ko ‘San ba kelen kura—I ka siniɲɛsigi bɛna kɛ mun ye?’ A jiralen bɛ o kɔnɔ ko mɔgɔ bɛ se ka kalan Bibulu la a ka so fu. N seginna ka na walasa ka sɛbɛn jira i la min b’an dɛmɛ k’o kɛ. [Wajibiya gafenin ta k’a ɲɛ laban jira a la, walima Dɔnniya gafe ta k’a ɲɛ 188-9 jira a la.] Bibulu bɛ kuma san ba kelen min kan, o bɛna na ni nin cogoya ɲɔgɔnw de ye iko i ɲɛ b’a la cogo min na nin ja kan. Walasa ka se ka balo alijinɛ kɔnɔ, fo an ka Ala dɔnniya jɔnjɔn sɔrɔ. N’i bɛ jɛn n’a ye, n bɛ se k’a jira i la Bibulu kalan bɛ kɛ cogo min na.”
9 Nouvelles du Royaume No. 36 tilatilali y’an bila k’an ka cidenyabaara barika bonya, n’o bɛna kɛ seereyaba ye. A dɔ rɔ, o ye wajulikɛyɔrɔ mɔgɔ caman bila u ka magojira kɛ. Jehowa ka dɛmɛ barika la, n’an bɛɛ jɛra k’an cɛsiri walasa ka dɔ fara u ka magojira kan, an bɛna nisɔndiya sɔrɔ ka mɔgɔ caman sɔrɔ minnu bɛ iko sagaw.—Mat. 10:11; Kɛw. 13:48, 49, 52.