An ka siran Jehowa ɲɛ tile kuuru bɛɛ la
1 “Ka siran Jehowa ɲɛ, o ye hakilitigiya daminɛ de ye.” (Zab. 111:10) A b’an bila ka ko ɲuman kɛ, k’an kɔdon ko jugu la. (Nta. 16:6) O siran ye bonya dunba ye ka ɲɛsin an Dabaga ma, siran min b’an bali k’an mangoya a ye ani k’a kanbila. O siran ye fɛn ye an b’a fɛ ka min don an na, ka min jira tile kuuru bɛɛ la.—Nta. 8:13.
2 Don o don, Sitanɛ ka diɲɛ bɛ digili jugumanbaw da an kan walasa an ka tugu a ka sira juguw la. (Efe. 6:11, 12) An farisogo dafabali ye jurumutɔ ye ani a taalan ye ka sama ko jugu nɔfɛ. (Gal. 5:17) O la sa, walasa ka Jehowa ka ci fɔlenw mara, ka kɛ hɛrɛ la ani ka ɲɛnamaya sɔrɔ, an ka kan ka siran a ɲɛ tile kuuru bɛɛ la.—Dut. 10:12, 13.
3 Heburuw 10:24, 25 kɔnɔ, a ɲininen don an fɛ an ka ɲɔgɔn lajɛ walasa ka dusu don tɔw kɔnɔ, “janko” an bɛ nin waati min na sisan. Tuma bɛɛ lajɛ la taali nafa ka bon kosɛbɛ walasa ka kisi nin don labanw na. Ala ka mangoya ɲɛsiran b’an bila ka ɲɔgɔn lajɛ, a b’an dɛmɛ k’a dɔn mun kosɔn lajɛw nafa ka bon. Minnu bɛ siran Ala ɲɛ, u b’u sen don Krecɛn lajɛw la, bawo o ye bonya senuma de ye u ɲɛ na.
4 Ka tugu ci fɔlen na min ye ka Masaya kibaru duman weleweleda, o ye cogo wɛrɛ ye an b’an ka Ala ɲɛsiran jira min fɛ. (Mat. 28:19, 20; Kɛw. 10:42) An ka wajuli kuntilenna fɔlɔ ye ka tɔw dɛmɛ u ka tugu Jehowa ɲɛsiran na ani ka sɔn a sago kɛli ma. An b’o dafa segin-ka-bonyew sababu fɛ, n’an b’an jija fana ka Bibulu kalanw daminɛ, ani ka tɔw kalan Ala ka ci fɔlenw bɛɛ la. An b’a jira o cogo la k’an bɛ siran Jehowa ɲɛ, ko an b’an mɔgɔɲɔgɔn fana kanu.—Mat. 22:37-39.
5 Minnu tɛ siran Ala ɲɛ, olu bɛ dɛsɛ ka waleɲumandɔn yiriwa u dusukun na ka ɲɛsin hakili ta fan fɛ kow ma, wa, diɲɛ ka mɔgɔfaga fiɲɛ, n’o ye a ka miiricogo ye, o bɛ laban ka se u la. (Efe. 2:2) O la sa, an jɔlen ka to a kan ka “baara kɛ Ala ye a diyanye cogo la ni Ala bonyali ni Ala ɲɛsiran ye.” (Heb. 12:28) O cogo la, an na dubaw sɔrɔ, duba minnu bɛ di mɔgɔw ma minnu bɛ siran Jehowa ɲɛ tile kuuru bɛɛ la.