‘Aw sinsinnen bɛ miirili kelen kan’

¹ Diinɛ lakika bɛ dɔn taamaseere minnu fɛ, o dɔ ye kelenya ye. Tuma min na Sitanɛ ka diɲɛ bɛ ka fara-fara ka t’a fɛ, Jehowa ka mɔgɔw bɛ to u ka kelenya na walasa u ka se k’u mago don koɲuman Masaya wajulibaara la. Kira Esayi y’a fɔ a san kɛmɛ caman filɛ nin ye, ko: “An tulo ye aw ka kɔlɔsilikɛlaw kan mɛn, u bɛ pɛrɛn ka ɲagalikan bɔ ɲɔgɔn fɛ.”​—⁠ Esa. 52:⁠8.

² Ka jɛ k’an cɛsiri ɲɔgɔn fɛ, o bɛ dɔ fara yiriwali kan: K’a daminɛ san 2000 Zanwuyekalo tile fɔlɔ la, walima waati dɔɔnin dɔrɔn o kɔfɛ, magojirabaga kɔnɔnajɛlenw tun bɛ se ka sɛbɛnw sɔrɔ, wa, n’u b’a fɛ fana, u bɛ se ka bolomafara di ka Bibulu kalan baara kɔkɔrɔdon min bɛ ka kɛ diɲɛ bɛɛ la. Faantanya tɛ se ka mɔgɔ bali tuguni ka Ala ka siraw dɔn. “Sumantigɛta ka ca” yɔrɔ minnu na, o yɔrɔw de la mɔgɔw mago bɛ sɛbɛn caman na. (Mat. 9:37) Walasa k’a jan to magow la minnu bɛ ka bonya ka t’a fɛ an ka foro la, Ɲɛmɔgɔ Kulu y’a latigɛ ko Angiletɛri tɔnbolofara bɛna kɛ Afiriki tilebin yanfan n’a cɛmancɛ yanfan jamanaw “sɛbɛnmarayɔrɔ” ye. O kɔrɔ ye mun ye?

³ O kɔrɔ ye ko sɛbɛn minnu ka kan ka bila ka taa o jamanaw na, o sɛbɛnw bɛɛ bɛna mara Angiletɛri, ka tila ka ci jɛkuluw ma n’u mago b’u la tuma min na. Angiletɛri tɔnbolofara ye sɛbɛndilanyɔrɔba dɔ de ye min ka sɛbɛnw mara yɔrɔ ka bon kosɛbɛ n’a ka baarakɛlaw fana ka ca walasa ka Afiriki tɔnbolofara kofɔlenw magow ɲɛ. Yen fana na, sɛbɛnw man teli ka tiɲɛ fɛnɲɛnamaninw ni sumayaba fɛ.

⁴ I ka jɛkulu ka sɛbɛnw ani a ka sɔn-ni-sɔn gafeninw ɲinisɛbɛnfuraw bɛna sɛgɛsɛgɛ a ka tɔnbolofara fɛ, ka tila ka ci ɔrdinatɛri fɛ Angiletɛri tɔnbolofara ma walasa a ka o ko ɲɛnabɔ. O kɔfɛ, i ka sɛbɛn ɲininenw bɛna ci i ma i ka tɔnbolofara fɛ. O bɛn’a to tɔnbolofaraw ka dɔ bɔ u ka baarakɛlaw hakɛ la, ani sɛbɛnw bɛ mara yɔrɔ minnu na, ka dɔ bɔ fana olu sɔngɔ la.

⁵ Jamana minnu bɛ Afiriki tilebin yanfan n’a cɛmancɛ yanfan na, olu ka An ka Masaya Cidenyabaara bɔko: Jehowa ka jamakulu ‘y’a kɔnɔ kɛ kelen ye ŋaniya kelen, miirili kelen.’ (1 Kɔr. 1:10) Sisan, An ka Masaya Cidenyabaara ye Afiriki tilebin yanfan n’a cɛmancɛ yanfan jamanaw bɔko ye min bɛ bɛn an bɛɛ lajɛlen magow ma. Mɔgɔ caman nisɔndiyara siɲɛ fɔlɔ min na u ye Afiriki tilebin yanfan n’a cɛmancɛ yanfan jamana caman ka baara dantigɛli ye san 2000 Sɛtanburukalo An ka Masaya Cidenyabaara kɔnɔ. Yali aw ka jɛkulu ka kan ka yɔrɔ dɔw baara ka ɲɛ wa?

⁶ Ikomi an bɛ ka surunya kow sigicogo in laban na, Masaya welewedalaw bɛ ka taa ɲɛ Ala ka cikan fɔli la kelenya kɔnɔ. An bɛɛ ka t’a fɛ ka nin kɛ: k’an ‘sinsinnen to miirili kelen na, k’a ɲɔgɔn dɛmɛ kɛlɛ la Kibaru Duman dannaya kosɔn ni dusu kelen ye.’​—⁠Fil. 1:27.