An ka dɔ fara ko faranfasi dɔnniya kan

¹ An bɛ ɲankata don laban minnu na nin ye, u ye sababu ye ka degunw ni kɔrɔbɔli gɛlɛnw sugu caman lase Ala ka mɔgɔw ma, yɔrɔ bɛɛ la. (2 Tim. 3:1-5) An bɛɛ mago bɛ dusulamin na walasa an banbannen ka to dannaya la. (1 Kɔr. 16:13) An bɛ se k’o kɛ Jehowa ka dɛmɛ barika la, n’an bɛ t’a fɛ ka a ka Kuma kalan tuma bɛɛ, k’an jigi da a ka hakili senu kan, ani k’an nɔrɔlen to a ka jɛkuluba la.—Zab. 37:28; Rom. 8:38, 39; Jir. 2:10.

² Ka da kun ɲɛnamaw kan, salon don kelen jamalajɛ kɛrɛnkɛrɛnnen kalan bolodalen kumakun min tun walawalanna, o ye ko: “Hakili ta fan fɛ, aw ka kɛ mɔgɔ ɲɛnatigɛlenw ye.” A tun sinsinnen bɛ 1 Kɔrɛntekaw 14:20 kan. An bɛ ciden Pol ka kumaw kalan o yɔrɔ la, ko: “Balimakɛw, aw kana kɛ denmisɛnw ye hakili ta fan fɛ. Juguya ta fan fɛ kɔni, aw ka kɛ denmisɛnw ye, nka hakili ta fan fɛ, aw ka kɛ mɔgɔ ɲɛnatigɛlenw ye.” Aw hakililataw tun ye mun ye kalanbolodalen ko la?

³ “A kɛra dusulamin ye dɛ!” “An mago tun bɛ o yɛrɛ de la.” Ninnu tun ye hakililata fila dɔrɔn ye. Hali mɔgɔ dɔ min tun tɛ seere ye, a y’a fɔ ko a kabakoyara kosɛbɛ kalan fɛ, wa, k’a sera k’a ye fana o bɛ se k’a ka denbaya nafa cogo min na; a tun nana don kelen jamalajɛ kɛrɛnkɛrɛnnen na walasa k’a denmuso san 12 lajɛ a ka batise. Yali aw miirinata ye o ye fana wa? An ka an hakilijigin kalan yɔrɔ koloma dɔw la.

⁴ Dɔnniya jɔnjɔn ka kan walasa an ka se ka ko faranfasi: Jamalajɛ daminɛ jɛmu na, n’o tun ye ko: “A’ y’aw jija ka se ka kow faamuya kosɛbɛ.” O jɛmu na, kumana y’i sinsin fɛn jumɛn nafa kan walasa ka bi gɛlɛyaw kunbɛn? A y’i sinsin fɛn wɛrɛ kan min tɛ mɔgɔ hakili se dɔrɔn ye. An ka kan ka se ka Bibulu faamuya, k’o dɔnniya bonya, ka sinsin. N’o tɛ, kojugu minnu bɛɛ b’an da la, olu bɛ se sɔrɔ an kan. O la sa, fo Ala k’an ɲɛminɛ walasa an k’o faamuyali sɔrɔ. Iko Zaburu sɛbɛnbaga tun b’a kɛ cogo min na, an fana ka kan k’a ɲini Jehowa fɛ delili la, a k’an dɛmɛ an k’a ka sariyaw n’a ka hakilijiginw faamu walasa an ka se ka baara kɛ a ye n’an dusukun bɛɛ ye.— Zab. 119:1, 2, 34.

⁵ Barokun min dara o kan, o kɔnɔna na, kafo lakɔlɔsibaga y’a jira ko Jehowa bɛ dɛmɛ di an ma a ka Kuma n’a ka jɛkuluba sababu fɛ, “Dɛmɛ min bɛ se k’a to mɔgɔ ka ɲɛnatigɛ Bibulu faamuyali la.” Faamuyali ɲɛfɔra iko ‘seko min b’a to mɔgɔ bɛ koɲɛ dɔ faamuya ka ɲɛ, k’a kɔnɔkow kelen-kelen bɛɛ ni ko mumɛ cɛ siraw faamu, ani o cogo la ka o ko kɔrɔ faamu.’ Jɔn bɛ se k’an dɛmɛ ka dɔ fara o seko kan? Jehowa ye cɛw di an ma ninifɛn ye walasa k’an dɛmɛ an ka taa ɲɛ alako ta fan fɛ. (Efe. 4:11, 12) A ka dugukolo kan jɛkuluba bɛ dusu don an kɔnɔ walasa an ka Ala ka Kuma kalan don o don, ka taa jɛkulu lajɛw la tuma bɛɛ fana. (Zab. 1:2) An bɛ se ka baara kɛ ni Bibulu ani an ka Krecɛn sɛbɛnw ye cogo min na an ka yɛrɛkalan na ani denbaya ka kalan na walasa ka lajɛw ni foro baara labɛn, an kalanna o la. Yali i ye nafa sɔrɔ o ko labɛnnenw na wa? Yali i bɛ t’a fɛ i yɛrɛ ka Bibulu kalan bolodalen na wa? O wajibiyalen don walasa an ka tanga diɲɛ fɛn janw ma, i n’a fɔ a ka sangawuliw, a ka hakilimayasiraw, ani a ka lafilidabaliw.—Kol. 2:6-8.

⁶ An ka kan ka dɔ fara ko faranfasi dɔnniya kan: Kumana nabaga ka jɛmu fɔlɔ tun ye: “Aw kɛtɔ ka dɔ fara ko faranfasi dɔnniya kan, a’ b’aw ka alamɔgɔya lakana.” A y’a jira ko diɲɛ mɔgɔw tɛ se ka ɲuman faranfasi ka bɔ juguman na. (Esa. 5:20, 21) O kun ye k’u ma sɔn Ala ka namu tilennenw n’u sirataamani na. Nka, an minnu kalanna Ala sira la Jehowa ka jɛkuluba kɔnɔ, an bɛ Ala ka namuw dɔn. O namuw b’an ɲɛminɛ an ka ko kɛtaw n’an taamacogo la. O la sa, an bɛ se k’a dɔn an yɛrɛma, fɛn min ka ɲi Jehowa ɲɛ na, ani a bɛ sɔn min fana ma, ani min bɛnnen don a sago dafalen ma.— Rom. 12:2.

⁷ Walasa k’an tanga diɲɛ hakililataw ma minnu bɛ ɲɔgɔn sɔsɔ, ani a kɔmana juguw fana ma, fo an ka to ka dɔ fara ko faranfasi dɔnniya kan tuma bɛɛ. O bɛ se ka kɛ cogo di? Iko a sɛbɛnnen bɛ cogo min na Heburuw 5:​12-14 la, ciden Pol y’i sinsin a nafa kan ko an k’an balo fɛn na min tɛ dan a ka Kuma “nɔnɔ” dɔrɔn ma. An mago bɛ alako ta fan fɛ dumuni barikama na, i n’a fɔ an bɛ min sɔrɔ Esayi ka kiraya kuma kalan na, n’o bɛ kɛ Jɛkulu ka Gafe kalan na. O la sa, an bɛ min kalan, an k’o sirataama an ka ɲɛnamaya kɔnɔ teliya la. N’an b’a kɛ o cogo la, an na jɛya a la ko Jehowa ka sariyaw ni a ka naamu tilennenw don. O ko kɛli bɛna an dege ko faranfasi la walasa an ka se ka ɲuman faranfasi ka bɔ juguman na, cogo jɛlen na.

⁸ Nimisako don k’a fɔ ko dɔw barika dɔgɔyara Ala sira la. Mun na? Fɛn min ka ɲi ani min tilennen don Jehowa ɲɛna, u m’u hakili sinsinnen to o kan. O la sa, arajɔ ni telewisiɔn bɛ mɔgɔ welelenw ka kɛnɛkan baro minnu jira, ni Sɛbɛnniw ma jɛn n’o kumaw ye, u binna o jan kɔnɔ, ani fɔlikolon ni ɔrdinatɛri fɛ barokɛyɔrɔ nɔ juguw fana jan kɔnɔ. N’an bɛ hakilitigiya baara kɛ, an bɛna tanga kakalaw ma walasa u kana nɔ bila an na, ani hakilintanw ma, walima mɔgɔ juguw ma.— Nta. 13:20; Gal. 5:7; 1 Tim. 6:20, 21.

⁹ Funankɛw ka kan ka kɛ “denmisɛnw ye juguya ta fan fɛ”: Kalanbolodalen in na, yɔrɔ fila tun bɛ dusu don kɛrɛnkɛrɛnnenya la funankɛw kɔnɔ walasa u k’u jija a fɛ ka dɔ fara ko faranfasi dɔnniya kan. Kumanaw y’a jira ko ka kɛ “denmisɛnw ye juguya ta fan fɛ,” o kɔrɔ ye ka to kodɔnbali ye, ka kɛ jalakintan ye iko denmisɛnw, min ye ko nɔgɔlenw ta fan ye Jehowa ɲɛna. (1 Kɔr. 14:20) An b’an ka waati tɛmɛ fɛn minnu na, dusu donna an bɛɛ kɔnɔ ka to an ɲɛna tuma bɛɛ o ko la. O kun ye an ka se k’an kologɛlɛya walasa an kana an yɛrɛ bila farati la kojugu sugu bɛɛ ta fan fɛ, ani ka se k’an yɛrɛ lakana walasa o ko juguw kana nɔ bila an na. (Efe. 5:15-17) An bɛ waati hakɛ min kɛ ka fɛn wɛrɛ kalan fɛn min t’an dɛmɛ ka dɔ fara an ka alako ta fan fɛ fɛnw faamuyali kan, dusu donna an kɔnɔ fana walasa an ka o jate. Yali i y’o de kɛ wa? O ye mun jira? Ka fara an ka don o don Bibulu kalanni kan, jɛkuluba bɛ sɛbɛn minnu di an ma, an jɔlen ka to a kan ka t’a fɛ olu fana kalanni na. N’an b’o kɛ, o bɛna an bɛɛ dɛmɛ ka “faamuyali sɔrɔ,” denmisɛnw fana sen b’o la.— Nta. 4:7-9, NW.

¹⁰ “Ka Bibulu sariyakolow sirataama ni faamuyali ye, an ka nafa sɔrɔ o la”: Don kelen jamalajɛ kɛrɛnkɛrɛnnen jɛmu laban kumakun tun y’o de ye. Kumana nabaga y’a jira ko faamuyali min bɛ na ni ɲɛnamaya ye, o dibaga ye Jehowa ye. O faamuyali ka bon kosɛbɛ ni hadamaden bɛɛ ta ye. I k’i miiri cogo la min b’i bolo ka se ka Jehowa ka dɔnniya dɔn hali dɔɔnin! Mɔgɔ min b’o ɲini a fɛ ni kɔnɔnajɛya ni dannaya ye, Jehowa b’i bololabila k’a di o tigi ma. (Nta. 2:3-5, 9; 28:5) A y’o cogo min di an ma nin ye, yali i ye nafaba sɔrɔ o la wa?

¹¹ Dusu donna an kɔnɔ fana ko an bɛ Bibulu kalanna tuma min na, an ka dege ka sariyakolow lasaa. (2 Tim. 3:16, 17) An k’u sɛgɛsɛgɛ ni ɲɛmajɔ ye walasa an ka se ka Jehowa ka kuma fɔlenw faamuya ka ɲɛ. An ka waati ta ka taasi o sariyakolow kan, k’u sinsin an hakili n’an dusukun na. O bɛna an dege ka se ko faranfasi la walasa an ka se ka dondala sɔrɔ n’an bɛ latigɛw kɛ minnu b’an ka ɲɛnamaya kan. (Jos. 1:8) Ko minnu b’an caman da la, an ka o dɔw mafilɛ walasa k’a dɔn Bibulu sariyakolow bɛ sirataama cogo min na walasa o ka se k’an dɛmɛ an ka taɲɛ sɔrɔ.

¹² ‘Yali n ka kan ka fini doncogo dɔ ni kun labɛncogo dɔ ta wa?’ Diɲɛ sangawuliw ye min ye fini doncogo ni kun labɛncogo ta fan fɛ, tuma caman o bɛ murutili de jira. O miiri sugu bɛ nɔ bila mɔgɔw la, ka kɛ sababu ye u ka finiw don minnu bɛ yɛrɛlabila jira, sara tɛ minnu na, walima minnu bɛ u ka cɛya, walima u ka musaya jira. Bibulu sariyakolo jumɛnw bɛna an dɛmɛ ka se k’o ko suguw kɛlɛ? N’an y’an jija a fɛ ka dɔ fara ko faranfasi dɔnniya kan ka tɛmɛ, an bɛna sɔn sariyakolo la min bɛ 1 Timote 2:9, 10 la, ka fini ‘bɛnnen don minnu bɛ mɔgɔ sutura . . . , [mɔgɔ] minnu ko u bɛ siran Ala ɲɛ.’ Sariyakolo wɛrɛ minnu fana bɛ sirataama, olu kofɔlen bɛ 2 Kɔrɛntekaw 6:3 ani Kolosekaw 3:18, 20 na.

¹³ ‘N bɛ se ka mun kɛ walasa ka n ka denbaya cɛjuru kologɛlɛyalen to?’ Kumaɲɔgɔnya ɲuman denbaya kɔnɔmɔgɔ ni ɲɔgɔn cɛ, o nafa ka bon. Yakuba 1:19 b’a fɔ an ye ko: “Mɔgɔ bɛɛ ka lamɛnni kɛ joona, nka u kana kuma joona, u kana dimin joona.” Denbaya kɔnɔmɔgɔw ka kan ka ɲɔgɔn lamɛn, ka kuma ɲɔgɔn fɛ katuguni denbaya kɔnɔ kumaɲɔgɔnya bɛ kɛ fan fila de fɛ. Hali n’a y’a sɔrɔ i bɛ ka min fɔ, o ye tiɲɛ ye, n’i b’o fɔ ni juguya ye, ni kuncɛbonya ye, walima ni hinɛntanya ye, a ka c’a la, o bɛna mɔgɔ tɔɔrɔ, o tɛn’a dɛmɛ. O la sa, i kɛra cɛ ye, walima muso ye, bangebaga, walima den ye, an bɛ kuma cogo min na, o ka kan “ka kɛ ni nɛɛma ye tuma bɛɛ, kɔgɔ ka kɛ a la.”— Kol. 4:6.

¹⁴ ‘Yali fɛnnadiya ye nɔ bila n na wa?’ Fɛnnadiya ye digili dɔ ye diɲɛ bɛ min kɛ mɔgɔ la, k’a ka ɲɛnamaya gɛlɛya a bolo. A tɛ mɔgɔ dɛmɛ ka hɛrɛ sɔrɔ. Ɲɛnamaya hɛrɛma ma bɔ nafolo sɔrɔli la. (Waj. 5:10; Luka 12:15; 1 Tim. 6:9, 10) Walasa k’an dɛmɛ an k’an tanga fɛnnadiya ma, Yesu y’an kalan nin sariyakolo nafama na: ka to ɲɛ nɔgɔn ye. K’i ka ɲɛnamaya kɛ cogo bɛrɛ bɛnnen na, walima k’i ka ɲɛnamaya kɛcogo nɔgɔya i bolo, o kɔrɔ ye k’i hakili sigilen to Masaya kunkankow la, ka fɛn tɔw bɛɛ bila jɔyɔrɔ filanan na, o kɔfɛ.— Mat. 6:22, 23, 33.

¹⁵ An kuntilenna ka kan ka kɛ mun ye: Sariyakolo tilennenw sun jɔnjɔn b’an bolo Ala ka Kuma kɔnɔ walasa k’an ɲɛminɛ n’an bɛ latigɛw kɛ tuma min na. An ka kan k’o sariyakolow kalan, ka taasi u la, ka faamu u bɛ sirataama cogo min na an ka ɲɛnamaya kɔnɔ. O cogo la, ‘an na se ko faranfasi la walasa ka ɲuman faranfasi ka bɔ juguman na’, wa, o bɛna an nafa, ka bonya da Jehowa kan.—Heb. 5:14.