Yali e yɛrɛ bɛ nafa sɔrɔ u la wa?
1 An bɛ don min na iko bi, mɔgɔ miliyɔn caman b’a fɛ ka kunkow kunbɛncogo ani hɛrɛ sɔrɔcogo dɔn u ka diɲɛnatigɛ kɔnɔ. U bɛ mago sɛbɛ don bilasirali gafew kalanni na walasa k’u yɛrɛ dɛmɛ u ka ɲɛtaa la; walima u b’u ɲɛsin jɛkulu ni tɔn dɔw ma walasa ka laadilikan sɔrɔ k’u ka diɲɛnatigɛ ɲɛ. U ye nafa minnu sɔrɔ u la, i b’a sɔrɔ mɔgɔ dɔw bɛ se k’olu fɔ. Nka, n’an bɛ mɔgɔw ka diɲɛnatigɛ lajɛ bi, yali tuma caman na hadamadenw ka laadili siraw ye mɔgɔw dɛmɛ u ka hɛrɛ ni wasa sɔrɔ u ka diɲɛnatigɛ kɔnɔ wa? A ka gɛlɛn an ka se k’o fɔ.—1 Kɔr. 3:18-20.
2 Nka, an Dabaga bɛ kalan bɛɛ la nafama di mɔgɔ bɛɛ ma minnu bɛna lamɛnni kɛ k’a sɔrɔ wari tɛ bɔ a la. Jehowa b’a fɛ mɔgɔ bɛɛ ka nafa sɔrɔ a ka kalan na. A ka bololabila kɔnɔ, a y’a ka Kuma fiyɛlen di hadamadenw ma walasa k’u bilasira tilennenya sira kan. Ale de fana b’a to Masaya kibaru duman bɛ weleweleda dugukolo yɔrɔ bɛɛ la. (Zab. 19:7, 8; Mat. 24:14; 2 Tim. 3:16) Ka diɲɛnatigɛ kɛ hɛrɛ la, o bɛ bɔ min na, o ye k’an janto Jehowa ka cikanw na. —Esa. 48:17, 18.
3 Jehowa ka bilasirali ka fisa kosɛbɛ ni bilasirali ye min bɛ sɔrɔ bilasirali gafew kɔnɔ. A ka fisa fana ni yɛrɛdɛmɛ fɛɛrɛw ye minnu bɛ di diɲɛ mɔgɔw fɛ walasa ka ɲɛtaa sɔrɔ. Jehowa ka fɛɛrɛ tigɛlenw ɲɛfɔlen don a ka kuma kɔnɔ, wa, a ka jɛkuluba b’an kalan olu la. N’an bɛ baara kɛ n’olu ye cogo dafalen na, an bɛ se ka dɛmɛ lakika ni nafa mɛntaw sɔrɔ.—1 Piɛ. 3:10-12.
4 E yɛrɛ ka nafa sɔrɔ jɛkulu ka lajɛw la: Bi bi in na, Jehowa b’an kalan a ka siraw la, k’a jira k’a bɛ mago sɛbɛ don an na. An bɛ nafa sɔrɔ o la n’an b’an janto a ka kalan na. An ka dɔgɔkun lajɛ duuru b’a jira ko Jehowa bɛ hami an na ni kanuya ye. N’an bɛ na jɛkulu lajɛw la, an ka Ala dɔnniya bɛ bonya. N’an b’an madon Jehowa la, an bɛ se k’a dege k’an yɛrɛ tanga kojugu ma, ka dusulamin sɔrɔ.
5 Nka, o dɔrɔn tɛ. An bɛ se fana ‘k’an ka kanuya bonya’ jɛkulu ka lajɛw la. (2 Kɔr. 6:13, ABM) O cogo dɔ ye ka ɲini ka mɔgɔ wɛrɛw dɔn jɛkulu kɔnɔ. An bɛ nafa min sɔrɔ o la, o ye ɲɔgɔn jijali ye iko ciden Pol y’a sɛbɛn cogo min na a ka bataki kɔnɔ ka ɲɛsin Romɛkaw ma. (Rom. 1:11, 12) A tun y’a ka bataki sɛbɛn Heburuw ma tuma min na, a ye mɔgɔw lasɔmi kosɛbɛ, mɔgɔ minnu tun b’a kɛ u delinako ye ka Krecɛn ka jɛɲɔgɔnya dabila.—Heb. 10:24, 25.
6 Ka diɲɛnatigɛ kɛ nisɔndiya la ani wasa kɔnɔ, o bɛ bɔ min fana na, o ye ka tɔw ka hɛrɛ ɲini. Dusu donnen bɛ an kɔnɔ an ka cogow ɲini ka dɔ fara tɔw ka hɛrɛ kan. Siga t’a la, an ka Krecɛn lajɛw kɛkun ye ko an yɛrɛw ka nafa sɔrɔ u la, ani jɛɲɔgɔnya ɲuman bɛ an ni minnu cɛ, olu fana ka nafa sɔrɔ u la. Fɛn min ɲininen bɛ an fɛ, o ye an ka fɛn dɔ sɔrɔ k’a fɔ lajɛw la, k’o kɛ n’an dusukun bɛɛ ye.
7 Ciden Pol y’o kuma sugu de fɔ a ka laadilikan na ka ɲɛsin Timote ma tuma min na a y’a sɛbɛn ko: “I yɛrɛ dege alaɲɛsiranyakow la.” (1 Tim. 4:7) An fana bɛ se k’an yɛrɛw ɲininka ko: ‘Yali n bɛ n yɛrɛ dege wa? N bɛ fɛn minnu mɛn jɛkulu ka lajɛw la, yali n b’o waleya walasa ka se ka nafa sɔrɔ u la wa?’ An ka jaabiw bɛna kɛ ɔwɔ ye n’an b’an janto an ka fɛn mɛntaw la jɛkulu ka lajɛw la, ani n’an b’an cɛsiri k’an ka fɛn kalannenw fana sirataama. An ɲɛ kana an balimakɛw dɔrɔn ye minnu b’an kalan, nka, limaniya fɛ, an ɲɛ ka Jehowa de ye iko a ka jama ka karamɔgɔba.—Esa. 30:20.
8 Ala-ka-marako Cidenyabaara Kalan ani Baara ka Lajɛ: O lajɛ fila kun ye k’an dɛmɛ ka kɛ Krecɛnw ye minnu bɛ se kosɛbɛ cidenyabaara la. Ala-ka-marako Cidenyabaara Kalan ye kalan ye tigitigi, kalan min na kalandenw bɛ dɔnniya ni laadilikan sɔrɔ cogo basigilen na. I bɛ cogo sɔrɔ k’a jira k’i taara ɲɛ foroba jɛmuw kɛli la, ani mɔgɔw kalanni na Ala ka Kuma na. Nka, walasa ka nafaba sɔrɔ o kalan na, i ka kan k’i tɔgɔ di o la, ka na o la, ani ka kuma o la tuma bɛɛ. I ka kan fana k’i ka kalansenw kɛ n’i dusukun ye. Laadilikan minnu bɛ di i ma, ni sɔnna olu la, ani k’u sirataama, o bɛna i dɛmɛ ka taa ɲɛ.
9 Baara ka lajɛ b’an kalan ka Krecɛn ka cidenyabaara nafa dɔn. An bɛ se k’an ka baara kɛ cogo min na walasa ka mɔgɔw kɛ kalandenw ye, a b’o fana jira an na. Fɛn minnu bɛ fɔ o lajɛ fila la, yali e n’i ka denbaya bɛ nafa sɔrɔ u la kosɛbɛ wa? Krecɛn cɛ dɔ n’a muso ko: “Baara ka lajɛ dɔ la, an y’a mɛn k’an ka kan ka don o don Bibulu tɛmɛsira lajɛ an ka denbaya kɔnɔ. An tun t’o kɛ fɔlɔ la, nka sisan an b’o kɛ.” U ye nafa sɔrɔ o la cogo di? U sɔnna a ma ko: “An y’a ye k’an ka baro minnu bɛ kɛ dumunikɛ tabali la, olu ka di sisan ka tɛmɛ fɔlɔ kan. Ɲɔgɔn sɔsɔ minnu tun bɛ kɛ surɔfana duntuma na, olu tɛ kɛ tun.” Yali denmisɛnninw yɛrɛ bɛ nafa sɔrɔ lajɛw la wa? Ɔwɔ. Denba ko: “A jɛlen don ko lajɛw bɛ nɔ bila denmisɛnninw na kosɛbɛ. Dɔgɔkun dɔ kɔnɔna na, san wɔɔrɔ denkɛ min b’an bolo, an y’a minɛ nkalonw tigɛ la. Nka o dɔgɔkun yɛrɛ la, Ala-ka-marako Kalan jɛmu fɔlɔ tun bɛ nkalontigɛ kan. Ka jalaki to a ɲɛ kan, an denkɛ y’a fa lajɛ, k’a ɲini k’a yɛrɛ dogo a ka sigilan kɔnɔ walasa a fa kana a ye. A tun y’o yɔrɔ faamu, wa, an ma gɛlɛya si sɔrɔ o kɔfɛ tun.”
10 An balimamuso tutigɛbaga dɔ y’a fɔ k’ale nisɔn ka di k’a ye ko hakilinaw bɛ di Baara ka Lajɛ la walasa k’an ka cidenyabaara ɲɛ. Mun na? A y’a ɲɛfɔ ko: “N tun bɛ wajuli kɛ cogo kelen de la tuma bɛɛ. Hakilina minnu bɛ di An ka Masaya Cidenyabaara kɔnɔ, n tun bɛ miiri tuma dɔw la k’o hakilinaw bɛnnen tɛ. Nka, Baara ka Lajɛ la, n y’a mɛn tuma min na k’an ka kan k’a ɲini k’o kɛ, a diyara n ye kosɛbɛ k’o hakilinaw sirataama. A bɛ dɔ fara cidenyabaara diya kan kosɛbɛ yɛrɛ de.” A kɛlen kɔ k’o hakilina sirataama dɔgɔkun caman kɔnɔ, n’o ye k’a ɲini ka Bibulu kalan dɔ daminɛ siɲɛ fɔlɔ min na a ni mɔgɔ dɔ bɛ bɛn, a sera k’o kɛ ni npogotiginin dɔ ye min tun ye Ala deli walasa ka dɛmɛ sɔrɔ.
11 N’i bɛ jɛmu dɔ lamɛn min bɛ kuma Bibulu laadilikan kan ka ɲɛsin an ka sugandiliw ma, yali i bɛ miiri ko Jehowa yɛrɛ de bɛ ka kuma i fɛ wa? Balimakɛ dɔ bɛ miiri o cogo de la. A ko: “Kɔsanna lajɛ dɔ la, balimakɛ dɔ ye jɛmu kɛ ɲɛnajɛw kan minnu tun bɛnnen bɛ Krecɛnw ma, ani minnu tun bɛnnen tɛ u ma. A tun ka di n ye ka to ka bolokurunkɛlɛ lajɛ telewisiɔn na. Nka, o lajɛ kɔfɛ, n y’a ye ko bolokurunkɛlɛ tun ye ɲɛnajɛ ye min bɛnnen tɛ Krecɛnw ma. O la sa, n m’o filɛ tun.” Ɔwɔ, hali ni balimakɛ kɛra fɛn dɔ fɛ min ka jugu, a sɔnna Jehowa ka bilasirali ma ni majiginnenya ye.—Zab. 11:5.
12 Foroba jɛmu lajɛw, La Tour de Garde kalan, ani jɛkulu ka gafe kalan: An bɛ foroba jɛmu minnu lamɛn dɔgɔkun o dɔgɔkun, u bɛ Bibulu barokun caman de ɲɛfɔ. An bɛ mun de sɔrɔ u la? Krecɛn cɛ furulen dɔ ye nafa minnu sɔrɔ u la, a kumana o nafaw kan ko: “Foroba jɛmu dɔ tun ye hakili senu denw bɛɛ ɲɛfɔ ka jɛya. Kumana y’a yɛrɛ ka misali di. A y’a jira ko walasa k’o denw yiriwa a yɛrɛ la, a tun bɛ mankutu kɛrɛnkɛrɛnnen dɔ sugandi, k’a ɲini k’o waleya kosɛbɛ dɔgɔkun kelen kɔnɔ. Dɔgɔkun laban na, a tun y’o mankutu dankɛnɛmaya cogo min na a ka don o don kow la, a tun b’i miiri o la. O kɔfɛ a tun bɛ baara kɛ mankutu wɛrɛ kan dɔgɔkun nata la. O hakilina diyara n ye, wa, n yɛrɛ y’a daminɛ k’o kɛ.” Nin kɛra a ka fɛn mɛnnenw waleyacogo ɲuman dɔ ye dɛ!
13 La Tour de Garde kalan bɛ dɔnniya di an ma walasa ka Bibulu sariyakolow waleya diɲɛnatigɛ ko caman na. O b’an dɛmɛ ka hakilisigi ni dusukun lafiya sɔrɔ, hali ni diɲɛ jɔrɔnankow ka ca. La Tour de Garde b’an dɛmɛ fana ka tiɲɛ dɔn, ka bɔ faamuyali kuraw kala ma, faamuyali minnu bɛ di dɔɔnin-dɔɔnin. Misali la, yali an ma nafa sɔrɔ san 1999 Mɛkalo tile fɔlɔ La Tour de Garde barokunw na minnu tun ye ko: “Il faut que ces choses arrivent,” (Wajibi don o kow ka kɛ) ani “Soyons vigilants et diligents!” (An ka kɛ mɔgɔw ye minnu b’u ɲɛna ani minnu timinan ka di). O kalanw ye nɔ bila i la cogo di? Yali i b’a jira i ka walew fɛ ko Yesu ye laadilikan min di i ka sini ko la, k’i b’o ta i sɛbɛ la wa? Yali i y’i yɛrɛ labɛn kɔrɔbɔliw kama wa, kɔrɔbɔli minnu b’an ɲɛ tuma min na an bɛna “fɛn haramuyalen ye min bɛ tiɲɛni kɛ . . . k’o jɔlen ye yɔrɔ senuman la”? (Mat. 24:15-22 ) Yali i kuntilennaw an’i ka diɲɛnatigɛ kɛcogo b’a jira ko ka bolofɛnw fara ɲɔgɔn kan, o tɛ fɛn bɛɛ la nafama ye i bolo, fo Jehowa tɔgɔ saniyali wa? La Tour de Garde kalan na, yali an yɛrɛ tɛ nafa sɔrɔ o la sisan wa?
14 An bɛ fɛn caman minnu kalan dɔgɔkun o dɔgɔkun jɛkulu ka gafe kalan na, i ka miiri o la. An bɛ ka Daniɛl ka kitabu kalan sisan. An ye min kalan kalo naani kɔnɔ o kitabu kan, yali an m’a ye k’o ye dɔ fara an ka limaniya kan dɔgɔkun o dɔgɔkun wa? Iko Daniɛl, Jehowa ka kira kanulen y’a kɛ cogo min na, an fana b’an ka limaniya kologɛlɛya walasa an fana ka se ka kow muɲu.
15 Jehowa b’an kalan an k’an ka diɲɛnatigɛ kɛ nisɔndiya la: An bɛna an yɛrɛ tanga dusukasi ma n’an b’an janto Ala ka cikanw na. Ka fara o kan, ka diɲɛnatigɛ kɛ nisɔndiya la, o ye min ye an b’o dɔn. Ni Jehowa b’an ɲɛminɛ, n’an bɛ tugu a kɔ, an tɛna kɛ lajɛbagaw dɔrɔn ye, nka an bɛ kɛ mɔgɔw ye minnu b’u sen don a ka baara la. Wa, mɔgɔ minnu bɛ Ala ka baara kɛ, olu ye mɔgɔw ye minnu nisɔn ka di.—1 Kɔr. 3:9; Yak. 1:25.
16 I bɛ fɛn minnu mɛn jɛkulu ka lajɛw la, i bɛna olu waleya cogo min na, i ka miiri kosɛbɛ o la. (Yuh 13:17) I ka baara kɛ Jehowa ye ni nisɔndiya ye ani n’i dusukun bɛɛ ye. I ka nisɔndiya bɛna bonya kosɛbɛ. I ka diɲɛnatigɛ bɛna ɲɛ ka t’a fɛ. Kɔrɔ fana bɛ na kɛ a la kosɛbɛ. Ɔwɔ, e yɛrɛ bɛna nafa sɔrɔ u la.