Yali aw bɛ ka kow muɲu wa?
1 ‘Ɲagali si tɛ ne fɛ ka tɛmɛ nin kan, k’a mɛn ko ne denw bɛ taama tiɲɛ sira kan.’ (3 Yuh. 4) Alasira la, Yuhana denw ye nisɔndiyaba lase a ma u ka muɲuni fɛ. A ka kan ka kɛ nisɔndiyako ye an sankolola Fa fana bolo ka den miliyɔn caman ye minnu bɛ ka “taama tiɲɛ sira kan.”—Nta. 23:15, 16; 27:11.
2 Jehowa ka jamakulu bɛ timinandiya baara la ka t’a fɛ, n’o ye Krecɛn ka baara ye. Nka, ka ɲɛsin o baara ma, a mɔgɔ dɔw bɛ ka dɔ bɔ u ka baara la dɔɔnin dɔɔnin. Hali n’a y’a sɔrɔ u tun ka kisɛ tuma min na u tun ye tiɲɛ dɔn a daminɛ daminɛ na, ikomi san bɛ ka tɛmɛ, a kɛra u bolo delinako ye ka dɔɔnin dɔrɔn kɛ baara la min ɲɛsinnen bɛ mɔgɔw kalanni ma k’u kɛ kalandenw ye, walima k’u sen don o baara la tuma ni tuma dɔrɔn.
3 A bɛ se ka kɛ ko dɔ bɔra dɔw ka baara la k’a sababu kɛ farikolo dɛsɛ ni kɔrɔya ye. O bɛ faamu, wa u ka kan ni foli ye u ka muɲuni na bawo u bɛ k’u seko kɛ. Nka, an kelen o kelen min y’i yɛrɛbakun di Ala ma, an ka kan k’an yɛrɛw ɲininka ko: ‘N ka diɲɛnatigɛ kɔnɔna na, yali ne ye n yɛrɛdi kosɛbɛ n yɛrɛ kuntilennaw de ma fo yɔrɔ fitinin dɔrɔn de dilen bɛ Masaya kunkankow ma wa? Yali n bɛ iko ji “wɔlɔkɔlen,” walima n bɛ ka n “sɛbɛkɔrɔ-jija” wa?’ (Jir. 3:15, 16; Luka 13:24, NW) An kelen-kelen bɛɛ ka miiri k’a lajɛ delili la an bɛ ka min kɛ. O kɔ, an mago b’a la ka yɔrɔ minnu ɲɛ, an k’o ɲɛ, k’a to an hakili la ko Jehowa ka layiduw bɛ na ni ‘nɔɔrɔ ni bonya ni hɛrɛ ye koɲumankɛlaw kelen-kelen bɛɛ ma.’—Rom. 2:10.
4 Mɔgɔ bɛ kow muɲu cogo min na: Mun ye Yesu dɛmɛ ka kow muɲu? Pol y’a ɲɛfɔ ko: “Ɲagali min dara a ɲɛ, o de kosɔn a ye a gengen jiri muɲu, a ma maloya jati fɛn ye. O kɔ a y’i sigi Ala ka masa sigilan kinibolo fan fɛ.” (Heb. 12:1-3) Ɲagali min tun dara Yesu ɲɛ, o nafa tun ka bon kosɛbɛ ka tɛmɛ waatinin kɔrɔbɔliw kan, a tun ka kan ka minnu kun. Nisɔndiya min dara an ɲɛ, n’an b’an hakili to o la, o bɛ se k’an fana dɛmɛ ka kow muɲu. (Jir. 21:4, 7; 22:12) N’an b’an ɲɛsin Jehowa ma walasa a ka fanga di an ma yɛrɛkalan ni lajɛw matarafali ni timinandiya delili fɛ, a ye baara min di an ma k’a kɛ, an bɛna se k’an timinandiya o la.
5 Jehowa bɛ nisɔndiya a ka kantigiw ka muɲuni na. O la sa, an ka dɔ fara a ka nisɔndiya kan ka “taama tiɲɛ sira kan” tuma bɛɛ.