“I ka dannaya kɛlɛ ɲuman kɛ”

¹ Ciden Pol ye Timote laadi k’a “ka dannaya kɛlɛ ɲuman kɛ.” (1 Tim. 6:12) Pol yɛrɛ y’a ka diɲɛnatigɛ kɛ ka bɛn o kumaw ma. A ka ɲɛnamaya bantuma na, a kumana ni dannaya ye ko ale yɛrɛ ye kɛlɛ ɲuman kɛ. (2 Tim. 4:​6-8) A taara a ka cidenyabaara fɛ ni jagɛlɛya, dusu ni muɲuni ye ko bɛɛ la. N’an y’a ka misali ladege, o dannaya kelen bɛ se ka kɛ an na fana k’an b’an seko bɛɛ kɛ Krecɛn dannaya kɛlɛ la.

² Cɛsiri minnu ka kan ka kɛ, an k’olu kɛ: Pol ye baara kɛ yɛrɛ de cidenyabaara la. (1 Kɔr. 15:10) O la sa, an fana k’o kɛ n’an bɛ k’a ɲini ka mɔgɔ bɛɛ sɔrɔ minnu ka kan n’a ye. (Mat. 10:11) K’olu dɔw lasɔrɔ, o kɔrɔ bɛ se ka kɛ soli ka wuli ye walasa ka seereya kɛ mɔgɔw ye, an ni minnu bɛ bɛn sira kan. Walima, o kɔrɔ bɛ se ka kɛ ka baara kɛ wuladanin, walima fitirida fɛ walasa ka mɔgɔw sɔrɔ minnu bɛ segin ka na u ka so.

³ Ka na gafe kalan ka foro baara lajɛ la, o bɛ yɛrɛkolon ni waatibolodacogo ɲuman de wajibiya walasa ka na ka bɛn waati ma. Misali la, Bɛtɛl mɔgɔ dɔw bɛ lɛrɛ kelen kɛ u taali n’u seginni na walasa ka cidenyabaara kɛ u ka jɛkulu mɔgɔw fɛ dɔgɔkun labanw na. An bɛ se ka bonya da fana jɛkulu kɔnɔ weleweledalaw ni a denbayaw kan minnu bɛ sira jan boli, nka n’u bɛ na ka bɛn waati fɔlen ma. Nin timinandiya ni nin yɛrɛlabɛn suguw ye misaliw ye minnu ka kan ka ladege.

⁴ An ye magojirabaga minnu sɔrɔ, k’an mago don olu bɛɛ la, o dusu ka kan ka kɛ an na. Hali n’an ye sɛbɛn dɔw bila mɔgɔw bolo sira kan, walima senfɛ seereya la, an ka kan k’a ɲini k’o mɔgɔw ka ladɛrɛsi, walima u ka telefɔni nimɔrɔ sɔrɔ walasa ka se k’u lasɔrɔ ka dɔ fara u ka mago jiralen kan, ani k’an cɛsiri ka Bibulu kalan dɔ daminɛ.

⁵ An ka kɛ foro baara la tuma bɛɛ: Pol ye wajuli baara kɛ sɛbɛ ni basigilenya la. (Rom. 15:19) E dun? Yali i sen bɛ cidenyabaara la tuma bɛɛ wa? Yali i y’i sen don foro baara la kaban nin kalo in na wa? Jɛkulu ka gafe kalan ɲɛminɛbagaw bɛ nafa don a la k’u ka kulu kɔnɔmɔgɔ kelen-kelen bɛɛ ye u k’u sen don cidenyabaara la Utikalo kɔnɔna na. U bɛna i dɛmɛ k’o kɛ.

⁶ An ka Pol ka misali ladege ka kibaru duman kɔkɔrɔdon cogo dafalen na. O cogo la, an bɛna “dannaya kɛlɛ ɲuman kɛ” ka t’a fɛ.