Yali i bɛ nafa don Jehowa ka muɲuni na wa?

¹ Ni Jehowa tun ma muɲu san 10, san 20, ani sanw kɔnɔ minnu ka ca n’olu ye, walasa seereya baara ka bonya ka se hakɛ dɔ ma, yali i tun bɛ na tiɲɛ dɔn wa? An ka waleɲumandɔn ka bon kosɛbɛ ko Ala y’a to mɔgɔ caman wɛrɛw ka se “ka nimisa.” O n’a ta o ta, Jehowa ka kiritigɛ donba “bɛna na iko nson.” (2 Piɛ. 3:​9, 10) O la sa, Ala ka muɲuni man kan ka jateminɛ i n’a fɔ fɛn dɔ min bɛna nin kow sigicogo banni bila kɔfɛ.​—⁠Hab. 2:⁠3.

² Mɔgɔw hinɛ ka don an na: Jehowa ka muɲuni bɛ tɛmɛ an ka faamuyali kan kosɛbɛ. An man kan ka ɲinɛ a kun kɔ. (Jon. 4:​1-4, 11) Hadamadenw bɛ maɲumantɔya min na, Jehowa ɲɛ b’o la, wa, an hinɛ b’a la. O hinɛ kelen de fana bɛ Yesu la. A tun bɛ mɔgɔ minnu waju, olu hinɛ tun b’a la. A tun b’a fɛ kibaru duman wajuli baara ka jɛnsɛn walasa mɔgɔ caman ka se ka cogo sɔrɔ ka ɲɛnamaya banbali sɔrɔ. ​—⁠ Mat. 9:​35-38.

³ Ni kasaaraw ni bɔnɛkow kɛra, yali an hakili tɛ taa mɔgɔw la minnu tɛ tiɲɛ dɔn wa? K’a sɔrɔ u b’a ɲini ka diɲɛ kɔnɔ ɲagami faamu, ani k’a kɛlɛ, bi mɔgɔw bɛ iko sagaw, ‘gɛnbaga tɛ minnu na.’ (Mar. 6:34) N’an b’an timinandiya ka kibaru duman weleweleda, an bɛ mɔgɔw dusu saalo, mɔgɔ minnu labɛnnen don ka sɔn tiɲɛ na, wa, an b’a jira o cogo la fana k’an bɛ nafa don Jehowa ka muɲuni na. ​—⁠Kɛw. 13:⁠48.

⁴ An ka baara ye kɔrɔtɔko de ye: Salon, mɔgɔ 323 439 de batisera. Minnu nana Hakilijigin don na, olu cayara ni mɔgɔ 14  000  000 ye. O b’a jira ko mɔgɔ minnu bɛna se ka kisi diɲɛ jugu in halakituma na, olu hakɛ bɛna caya kosɛbɛ dɛ! “Jamaba” mɔgɔw hakɛ bɛna kɛ min ye, an t’o dɔn. (Jir. 7:⁠9) An ka wajuli baara bɛna mɛn ka se waati hakɛ min ma, an t’o fana dɔn. Nka, Jehowa b’o dɔn. Kibaru duman wajuli bɛna kɛ fo ka Jehowa wasa, ‘o kɔ, laban na se.’​—⁠Mat. 24:⁠14.

⁵ Waati min tora, o ka surun. Ala ka don sera. (1 Kɔr. 7:29a; Heb. 10:37) Siga t’a la, “an kisili ka surun sisan ka tɛmɛn waati kan, waati min na an kɛra dannabagaw ye.” (Rɔm. 13:​11, NW) An kana Ala ka muɲuni kun jɛ. Nka, an ka wajuli baara kɛ kɔrɔtɔko ye walasa mɔgɔ minnu bɛ tilennenya fɛ, olu caman ka se ka Jehowa ka makariba dɔn.