‘An tɛ se k’o fɔli dabila’
1 Yesu Krista bɛ wajuli baara kɔlɔsi ni ɲɛmajɔ ye. (Mat. 28:20; Mar. 13:10) Hali n’an ye weleweledalaw ye minnu hakɛ ka surun mɔgɔ miliyɔn wɔɔrɔ ɲɔgɔn na, hali n’an bɛ ka seereya kɛ jamana 234 na, an man kan k’a miiri k’an ka seereya baara banna. An kalanna kibaru duman min na, ‛an tɛ se k’o fɔli dabila’ fo ni Ala y’a fɔ tuma min na k’o baara banna.—Kɛw. 4:20, NW.
2 An k’an jigi da Ala ka hakili senu kan: Sitanɛ b’an degun kosɛbɛ walasa k’an dusu tiɲɛ. (Jir. 12:17) An farisogo dafabali bɛ kunko caman fana lase an ma. O ko suguw bɛ se k’an hakili ta ka bɔ wajuli baara nafamaba in kan. Nka, n’an y’an ka dannaya da Jehowa kan, a ka hakili senu bɛna an dɛmɛ k’o gɛlɛya suguw bɛɛ kunnasagon.
3 San kɛmɛ fɔlɔ Krecɛn jɛkulu tɔɔrɔla kosɛbɛ waati min na, balimakɛw ye Ala deli walasa a k’u dɛmɛ u k’a ka kuma fɔ ni jagɛlɛya ye ka t’a fɛ. Jehowa y’u ka delili lamɛn. A ye hakili senu di u ma. U mago tun bɛ timinandiya ni dusu min na walasa ka wajuli kɛ ka t’a fɛ, a y’o di u ma. O la sa, u ye kibaru duman wajuli kɛ ni jagɛlɛya ye k’a sɔrɔ u ma dabila.— Kɛw. 4:29, 31; 5:42.
4 An kana siran kumaw ɲɛ minnu bɛ mɔgɔ dusu tiɲɛ: Mɔgɔ fanba bɛ min miiri, walima nkalon minnu bɛ da an na, o fɛnw bɛ se k’an lasiran. Nka, i hakili to Piɛrɛ ni ciden tɔw ka jagɛlɛya kumaw na ka ɲɛsin Sanhedrin mɔgɔw ma, iko a ɲɛfɔlen bɛ cogo min na Kɛwalew 5:29-32 la. I n’a fɔ Tɔn karamɔgɔ Gamaliɛl sɔnna a ma cogo min na, Ala ka baara tɛ se ka tiɲɛ. A tɛ kɛ n’an yɛrɛ fanga ye. Ala de bɛ baaraba in kɔkɔrɔdon, wa, ale kelenpe de bɛ se k’o kɛ k’a dafa!— Zak. 4:6.
5 An ka Jehowa deli don o don walasa a ka hakili senu k’an dɛmɛ ka kibaru duman weleweleda ni timinandiya ye. Iko Jeremi y’a fɔ cogo min na, a bɛnnen don an fana ka se k’a fɔ ko Masaya cikan bɛ i n’a fɔ tasuma an kolow la. (Jer. 20:9) An tɛ se k’an dade!