“Ko bɛɛ ka kɛ ɲɔgɔn lasabatili kama”

¹ An n’an balimaw cɛ, an ka kan ka fɛn kɛ min bɛ u lasabati. O kɔrɔ ye k’an mago don u ka hakili ta fan fɛ nafaw la walasa k’olu lakana. N’an bɛ jago dɔ la min bɛ fɛn dilannen dɔ, walima baara dɔ yiriwa, an ka kan k’an kɔlɔsi walasa an kana fɛn si kɛ min bɛna an balimaw labin.​—⁠2 Kɔr. 6:3; Fil. 1:​9, 10.

² An balima dɔw donna jago dɔw la. U kuntilenna tun ye k’u Krecɛnɲɔgɔnw kɛ u ka sannikɛlaw ye. Jagokɛla tɔn dɔw bɛ dusu don u ka cidenw kɔnɔ walasa u ka mɔgɔ kelen-kelen bɛɛ mafilɛ iko mɔgɔ min bɛ se ka kɛ u ka sannikɛla ye. U ni minnu bɛ diinɛ kelen na, olu fana sen bɛ o mɔgɔw la. An balima dɔw ye Seere caman lajɛ walasa ka dusu don u kɔnɔ u n’u ka ciyakɛdaw ka baara kɛ ɲɔgɔn fɛ. Walasa k’u ka jago yiriwa, dɔ wɛrɛw fana bɛ fɛnw ni gafeninw ci u dannayakɛɲɔgɔnw ma, walima u bɛ kunnafoniw di u ma intɛrnɛti, walima odiyo, walima videyo kasɛtiw fɛ, k’a sɔrɔ balimaw m’a ɲini u fɛ u k’o fɛnw di u ma. Yali a bɛnnen bɛ Krecɛn ka ala-ka-marako siraw kɛ sababu ye walasa a ka nafa sɔrɔ a Krecɛnɲɔgɔnw na wa? Ayi.​—⁠ 1 Kɔr. 10:​23, 24, 31-33.

³ Balimaw ka kan k’u yɛrɛw kɔlɔsi: O kɔrɔ tɛ ko jagoko tɛ se ka don Krecɛn n’a balima dɔ cɛ. O ye an kelen-kelen bɛɛ ka ko ye. Nka, dɔw bɛ wariɲini fɛɛrɛw tigɛ minnu bɛ natabaya dusu don mɔgɔ wɛrɛw kɔnɔ, k’u dannayakɛɲɔgɔnw bila u ka baara kɛ ɲɔgɔn fɛ, walima u ka wari hakɛ dɔ bɔ walasa ka don u ka tɔn na. Nka, o wariɲini fɛɛrɛ caman bɛ tiɲɛ, k’o tigiw bila wariba bɔ la fu. Hali n’a y’a sɔrɔ mɔgɔ minnu y’u sen don o ko sugu la, u tun b’a fɛ ka wari sɔrɔ teliya la, o ko labɛnbaga man kan k’a miiri ko jalaki si t’a la n’u ka ko tiɲɛna. Ni o ciyakɛda ko ma ɲɛ, o bɛna min kɛ a balimaw na hakili ta fan fɛ, an’u ka nɛɛma na farikolo ta fan fɛ, a ka kan ka kɔn k’o jateminɛ kosɛbɛ. Sangatigiya bɛ minnu bolo ala-ka-marako ta fan fɛ, olu ka kan k’u ɲɛmajɔ kosɛbɛ u ka jago la bawo balima tɔw b’u bonya, u bɛ dannayaba da u kan fana. A bɛna kɛ kojugu ye k’o dannaya tiɲɛ. Ala ka baara senuman bonya minnu b’u bolo, olu bɛ se ka tiɲɛ ni mɔgɔ tɔw tigɛra balimakɛ la.

⁴ An kuntilenna ka kan ka kɛ ko “ko bɛɛ ka kɛ ɲɔgɔn lasabatili kama.” (1 Kɔr. 14:​26, LK) An ka kan k’an yɛrɛw tanga fɛn dɔ kɛli ma min bɛ se ka jagoko don jɛkulu kɔnɔ, walima min bɛ se k’a yiriwa a kɔnɔ. Sɛbɛnniw bɛ dalilu minnu di an ma an ka ɲɔgɔn lajɛw ko la, o kow sugu ni o daliluw tɛ ɲɔgɔn ɲɛ sira la.​—⁠Heb. 10:​24, 25.