“Ne bɛ se . . . cogo di ni mɔgɔ ma a kɔrɔ fɔ ne ye?”
1 Kibaru duman fɔbaga Filipe ye Ecopi kuntigi ɲininka k’a bɛ ka min kalan Ala ka Kuma kɔnɔ, ko yali a bɛ k’o faamu wa, cɛ y’a jaabi ko: “Ne bɛ se k’a faamu cogo di, ni mɔgɔ ma a kɔrɔ fɔ ne ye?” Filipe y’a dɛmɛ ni nisɔndiya ye a ka kibaru duman faamu Yesu ko la. O nana laban cɛ ka batɛmu ma o yɔrɔnin bɛɛ la. (Kɛw. 8:26-38) Ci min bɔra Yesu yɔrɔ, n’o ye ka ‘taa siyaw bɛɛ la k’u kɛ a ka kalandenw ye, ka u batise, k’u kalan’, Filipe sɔnna o ci ma.—Mat. 28:19, 20.
2 Iko Filipe y’a kɛ cogo min na, an fana ka kan ka sɔn ci ma, ka kalandenw kɛ. Nka Ecopi kuntigi ye ɲɛtaa min kɛ teliya la, tuma caman na o ye man di an ka Bibulu kalandenw na. O cɛ tun ye Yahutu tuubilen ye. A tun bɛ Sɛbɛnniw dɔn kosɛbɛ, wa, a dusukun tun labɛnnen don walasa ka sɔn. A mago tun bɛ min dɔrɔn na, o ye ka sɔn a ma ko Yesu ye Masiya ye min kofɔra. A man nɔgɔn n’a y’a sɔrɔ an bɛ kalan kɛ mɔgɔ minnu kun, n’u tɛ Bibulu kɔnɔko dɔn, walima n’u lafililen bɛ nkalon diinɛ ka kalansiraw fana fɛ, walima n’u yɛrɛw ka kunko kɛlen bɛ u bolo doniba ye. Mun bɛna an dɛmɛ ka dondala sɔrɔ n’an bɛ Bibulu kalandenw ɲɛminɛ fo u ka se yɛrɛbakun dili ni batɛmu ma?
3 An ka Bibulu kalandenw magow dɔn alako ta fan fɛ: San 1998 Utikalo An ka Masaya Cidenyabaara ka farankan kumana waati hakɛ kan min ka kan ka kɛ walasa ka mɔgɔw kalan ni Wajibiya gafenin ani Dɔnniya gafe ye. A tun ye nin fɔ: “A wajibiyalen don ka kalan teliya hakɛ jateminɛ ka kɛɲɛ ni kow cogoyaw ni kalanden se ye. . . . An t’a fɛ ka kalanden bali ka dɔnniya jɔnjɔn sɔrɔ teliya kojugu kosɔn. Kalanden kelen-kelen bɛɛ mago bɛ jujɔ kologɛlɛn na a ka limaniya kura ko la ka ɲɛsin Ala ka Kuma ma.” O la sa, barokun minnu bɛ Dɔnniya gafe kɔnɔ, olu man kan ka kɛ harabaharaba la walasa k’a ɲini ka gafe ban kalo wɔɔrɔ kɔnɔ. Walasa ka mɔgɔ dɔw dɛmɛ u ka ɲɛtaa kɛ fo ka se batɛmu ma, o bɛ se ka waati ta min ka ca ni kalo wɔɔrɔ ye. Ikomi i bɛ kalan kɛ dɔgɔkun o dɔgɔkun, waati o waati ka kan walasa ka kalanden dɛmɛ ka faamuyali sɔrɔ, ani ka sɔn fɛn kalannen ma minnu bɛ Ala ka Kuma kɔnɔ, i k’o waati kɛ. Tuma dɔw la, dɔgɔkun fila walima saba bɛ se ka ta walasa ka masalakun kelen kɛ Dɔnniya gafe kɔnɔ. O bɛn’a to waati ka sɔrɔ ka tɛmɛsira kofɔlenw kalan ani k’u ɲɛfɔ.— Rom. 12:2.
4 Nka, Dɔnniya gafe bannen kɔfɛ, n’i y’a kɔlɔsi ko kalanden ka faamuyali ka kan ka dafa tiɲɛ ko la, walima ko ka tiɲɛ kɛ a ta ye, ani k’a ka ɲɛnamaya di Ala ma, o dusu t’a kɔnɔ kosɛbɛ fɔlɔ, mun bɛ se ka kɛ? (1 Kɔr. 14:20) I bɛ se ka mun wɛrɛ kɛ walasa k’a bila sira kan, sira min bɛ na ni ɲɛnamaya ye?—Mat. 7:14.
5 Bibulu kalandenw mago ɲɛ alako ta fan fɛ: N’a jɛlen don ko mɔgɔ dɔ bɛ ka ɲɛtaa kɛ, hali n’a ka suma, a bɛ ka min kalan fana, n’o nafa bɛ ka bonya a bolo, o tuma na Wajibiya gafenin, walima Dɔnniya gafe bannen kɔfɛ, i bɛ se ka taa Bibulu kalan fɛ gafe filanan kan. O tɛ wajibi ye tuma bɛɛ, nka n’a ka kan, taa kalan fɛ Paix véritable, Unis dans le culte, walima Parole de Dieu gafew kan. N’u tɛ sɔrɔ jɛkulu kɔnɔ, weleweledalaw fanba b’u yɛrɛw tɔgɔla gafew ta walasa ka kalan kɛ u kan. Nka, o gafe saba bɛ sɔrɔ Tɔn bolofara la. A kɛra cogo o cogo, Wajibiya gafenin, ani Dɔnniya gafe de ka kan ka kalan fɔlɔ. Hali ni kalanden ye batɛmu ta sanni gafe filanan ka ban, Bibulu kalan, segin-ka-bɔnyew, ani waati min bɛ kɛ walasa kalan ka taa ɲɛ, olu bɛɛ ka kan ka jate, ka sɛbɛn.
6 Yali o kɔrɔ ye ko mɔgɔ minnu ye batɛmu ta kɔsa in na, nka n’u ye gafe kelen dɔrɔn kalan, olu ka kan sisan ka dɛmɛ ko kura ka kitabu filanan kalan wa? Wajibi tɛ. Nka, n’u kɛra walekɛbaliw ye, walima n’u tɛ ka taa ɲɛ tiɲɛ kɔnɔ, walima n’u yɛrɛ b’a dɔn k’u mago bɛ dɛmɛ na walasa ka tiɲɛ waleya kosɛbɛ u ka ɲɛnamaya kɔnɔ, o la sa, Baara lakɔlɔsibaga ka kan ka ɲininka fɔlɔ sanni ka weleweledala batiselen ka kalan kɛ ko kura. Nka, n’i bɛ mɔgɔ dɔw dɔn minnu ye Dɔnniya gafe kalan ka tɛmɛ, nka n’u ma taa ɲɛ fo ka se yɛrɛbakun dili ni batɛmu ma, i bɛ se k’a bɔ i yɛrɛ la k’a lajɛ n’u b’a fɛ ka Bibulu kalan ko kura.
7 Kalan bɛ kɛ magojirabaga minnu kun, kanuya taamasiyɛn don Krecɛn fɛ ka mago kɛrɛnkɛrɛnnen don u kelen-kelen bɛɛ la. An kuntilenna ye ka kalanden dɛmɛ a ka faamuyaliba sɔrɔ tiɲɛ ko la min bɛ Ala ka Kuma kɔnɔ. O tuma na sa, k’a to dɔnniya b’a la, a bɛ se ka tiɲɛ kɛ a ta ye, k’a ka ɲɛnamaya di Jehowa ma, k’o jira batɛmu fɛ.—Zab. 40:9; Efe. 3:17-19.
8 Yali i hakili b’a la min kɛra tuma min Ecopi kuntigi ye batɛmu ta ka ban wa? “A ɲagalilen ye sira minɛ ka taa” a kɛlen Yesu Krista ka kalanden kura ye. (Kɛw. 8:39, 40) Anw, ani an bɛ minnu kalan tiɲɛ sira la, an ka nisɔndiyaba sɔrɔ haali ka baara kɛ Jehowa Ala ye, sisan ani fo abada!