Ɲininkaliw Jaabi

◼ Jɔn ka kan ka delili kɛ jɛkulu lajɛw la?

Delili minnu bɛ kɛ jɛkulu kɔnɔ, o ye an ka bato yɔrɔba dɔ ye. Ka kuma mɔgɔ wɛrɛw tɔgɔ la Jehowa ɲɛkɔrɔ, o ye bonyaba ni sangatigiyaba ye. K’a da a nafa kan, maakɔrɔw ka kan ka jateminɛ kɛ koɲuman n’u bɛ balimakɛw sugandi minnu bɛ se ka delili kɛ lajɛw la. Balimakɛ batiselen minnu bɛna delili kɛ jɛkulu tɔgɔ la, u ka kan ka kɛ Krecɛn cidenyabaarakɛla mɔnenw ye minnu dɔnnen don misali ɲumanw ye, ni bonya b’u kan fana jɛkulu kɔnɔ. Bonya ni karama minnu bɛ u ka delili la, o b’a jira ko cɛsira ɲuman bɛ u ni Jehowa Ala cɛ. Sariyakolo nafama minnu bɛ san 1986 Mɛkalo tile 15 La Tour de Garde kɔnɔ, u bɛna balimakɛw dɛmɛ kɛrɛnkɛrɛnnenya la, balimakɛ minnu bɛ delili kɛ jama na, jɛkulu tɔgɔ la. O sariyakolow bɛ barokun min kɔnɔ, o ye “Des prières publiques qui viennent d’un coeur humble” (Delili minnu bɛ kɛ jama na, n’u bɛ bɔ mɔgɔ majiginnen dusukun na).

N’a dɔnnen bɛ ko siga bɛ balimakɛ min ka ko la, walima ni mɔgɔ sɛbɛ tɛ, maakɔrɔw man kan k’o sugandi walasa o ka deliliw kɛ. Ka ɲɛsin deliliw ma minnu bɛ kɛ jama na, balimakɛ min ka teli k’o kɛ sababu ye walasa ka kuma bɛnbaliyakow kan minnu bɛ ale ni tɔw cɛ, walima min ka teli ka dusumangoya, o balimakɛ man kan ka sugandi. (1 Tim. 2:⁠8) Hali ni balimakɛ batiselen dɔ ye funankɛ ye, maakɔrɔw bɛn’a lajɛ n’a mɔnen don hakili ta fan fɛ walasa a ka delili kɛ jɛkulu tɔgɔ la.​—⁠Kɛw. 16:​1, 2. 

Foro baara ka lajɛw la, n’a y’a sɔrɔ balimakɛ mankutulen tɛ yen walasa ka delili kɛ, tuma dɔw la nafa bɛ se ka kɛ a la balimamuso batiselen dɔ k’o kɛ kulu tɔgɔ la. A ka kan k’a kun datugu cogo bɛnnen na. N’a ka c’a la ko balimakɛ mankutulen dɔ tɛna kɛ foro baara ka lajɛ dɔ la, maakɔrɔw ka kan ka balimamuso mankutulen dɔ sugandi walasa a k’o ɲɛminɛ.

Fɛn min bɛ deli ka kɛ, o ye ko balimakɛ min bɛ foroba lajɛ ɲɛminɛ, o tigi de ka kan ka delili kɛ a daminɛ na. Nka, jɛkulu ka lajɛ tɔw la, ni balimakɛ mankutulenw ka ca, balimakɛ min bɛ lajɛ daminɛ, walima balimakɛ min sugandira ka barokun laban kɛ, a ma se olu ka delili kɛ. Balimakɛ mankutulen wɛrɛ bɛ se ka lajɛ daminɛ walima k’a kuncɛ ni delili ye. A ko mana kɛ fɛn o fɛn ye, a bɛ ɲini balimakɛ min fɛ ka delili kɛ jɛkulu ka lajɛ la, o ka kan ka kɔn ka fɔ a ye. O cogo la, a bɛna min fɔ, a ka se ka miiri o la. O la sa, a bɛna se ka delili sɛbɛ kɛ, delili min bɛ bɛn o lajɛ in ma, n’a miiriyaw bɛ ɲɔgɔn minɛ koɲuman.

O delili sugu man kan ka janya. Ni balimakɛ dɔ bɛ ka delili kɛ jama na, tuma caman na, a ka kuma bɛna faamuya ka ɲɛ n’a b’i jɔ ka kuma kosɛbɛ, ani k’o fɔ cogo jɛlen na. O bɛn’a to mɔgɔ minnu bɛɛ lajɛlen don, olu ka se ka delili lamɛn, ani a laban na, u ka se k’a fɔ n’u dusukun bɛɛ ye “Amiina!”​—⁠1 Ti. Ki. 16:36; 1 Kɔr. 14:16.