Yali an bɛ fɛn senumanw bonya wa?
1 Dɔ mana an ɲininka ko yali an bɛ fɛn senumanw bonya wa, a ka c’a la k’an b’a jaabi ko ɔwɔ, k’a sɔrɔ an ma tamaki. An bɛ Ala ka fɛɛrɛ senuman minnu bonya, olu dɔw ye jumɛnw ye?
2 An sankolo la Fa b’a to an ka teriyasira min don an n’a cɛ, an b’o kanu kosɛbɛ dɛ! A b’a jɛya an ye ko n’an ‘y’an magɛrɛ ale la, a n’i magɛrɛ an na.’ (Yak. 4:8) Ni Yesu Krista ka kunmabɔli saraka tɛ, mɔgɔ si tun tɛ na se ka ɲɛnamaya banbali sɔrɔ. (Yuh. 3:16) Kɔnɔnajɛya waleɲumandɔn kosɔn, an bɛ barika dunba da Ala ye delili kɔnɔ don o don o bonya sɔngɔ gɛlɛn ko la.
3 Ala ka Kuma fiyɛlen, Bibulu Senuman, o fana ye fɛn senuman ye an bolo, ka fara Jehowa ka dugukolo kan jɛkuluba kan. An bɛ waleɲumandɔn bɛnnen jira ka ɲɛsin Ala ka nin fɛɛrɛw ma, n’an bɛ nin kow kɛ: ka tugu Bibulu ka sariyakolow la an ka diɲɛnatigɛ la, ka an balimaw kanu sinsin an na, kanu min b’an ka kelenya fana sinsin, ka ala-ka-marako jɔyɔrɔw bonya sɛbɛ la, ani k’an tɛgɛ di an ɲɛminɛbagaw ma jɛ-ka-baara kɔnɔna na.—1 Piɛ. 1:22.
4 An bɛ alako dumuni caman sɔrɔ jɔnkɛ dannamɔgɔ hakilima bolo fɛ. A bɛna kɛ ten ko kura ɲinan kafoba ka jamalajɛ la, n’o kumakun ye “Ala ka Kuma kɛbagaw” ye. An na kalan sɔrɔ yen an tɛ ɲɛ min kɔ, ka jɛɲɔgɔnya duman tɔnɔbɔ yen, jɛɲɔgɔnya min ko bɛ an ye kosɛbɛ. Kɔnɔnajɛya bonya bɛ se ka jira ka ɲɛsin nin fɛɛrɛ senuman in ma cogo di?
5 An kana Jehowa ka so bila k’a to yen: Mɔgɔ minnu y’u magan ka Jerusalɛm kogow jɔ ko kura, Nehemi ye dusu don u kɔnɔ walasa u ‘kana u ka Ala ka so bila k’a to yen’. (Neh. 10:39) Bi, Jehowa ka “so” bisigi ye fɛɛrɛw ye a bɛ minnu tigɛ bato ta fan fɛ. An ka kafoba jamalajɛw sen b’o la. Walasa an kana o fɛɛrɛw kɛ bolokɔfɛko ye, an ka kan ka kɛ yen, ka lamɛnni kɛ kosɛbɛ. O cogo la, an bɛn’a jira Jehowa la k’an bɛ nafaba don a ka fɛɛrɛw la. (Heb. 10:24, 25) An ka kan ka dabali jumɛnw kɛ kabini sisan walasa k’a seereya ko an bɛ bonya dunba da o ko senuman kan?
6 An ka kɛ yen a tile saba bɛɛ la: An bɛɛ kelen-kelen ka kan k’an labɛn walasa ka kɛ jamalajɛ kɛnɛ kan a tile saba kuuru bɛɛ la. Yali i ŋaniya ye ka se yen joona don o don ani ka to yen fo Karidon delili laban na wa? N’o don, o tuma na i na nafaba sɔrɔ a la. A man nɔgɔn tuma bɛɛ ka kɛ jamalajɛ la. Walasa ka yɛlɛmaw don i ka baara kɛ donw na, tuma dɔw la fo i jɔlen ka to i ŋaniya kan. Bolifɛnw sɔrɔli tɛ ko nɔgɔn ye tuma bɛɛ. Nka, an kana o koɲɛw to u k’an dusu faga jamalajɛ taali ma.
7 An ka taasi nin misali ɲuman na: Salon, Afriki jamana dɔ la, fasodenkɛlɛ tun bɛ min na, balima kulu dɔ tun bɛ ka taa kafoba ka jamalajɛ. U ye sɔrɔdasiw kunbɛn minnu y’u ɲininka ko: “Aw ye jɔn ye, ani aw bɛ taa min?” Balimaw y’u jaabi ko: “An ye Jehowa Seerew ye. An kundalen bɛ kafoba ka jamalajɛ kan.” Sɔrɔdasiw dɔ la kelen ko: “Aw Jehowa Seerew kana siran foyi ɲɛ. A’ ye taa aw ka jamalajɛ kɛ hɛrɛ la. Nka, aw k’a dɔn k’aw ni sɔrɔdasi caman na bɛn. A’ ye taama sira cɛmancɛ la tuma bɛɛ sa! N’aw ye jama lajɛlen ye, aw ka to sira cɛmancɛ la ka t’a fɛ.” Balimaw y’a kɛ ten, wa, u ɲuman sera jamalajɛ yɔrɔ la. O la, balimaw ladiyara katuguni u ye fɛn senumanw bonya.
8 Gɛlɛyaw bɛ bɛɛ da la. Nka, siga si t’a la k’an bɛ se ka o balimaw ka limaniya ladege, k’a latigɛ ka ye an ka kafoba ka jamalajɛ kalanw bɛɛ la. N’o b’an bila an ka jɛn fɛn wɛrɛw kɔ, an ka Jehowa ka bilasirali ɲini. An ka d’a la fana k’an bɛna cɛsiri minnu kɛ walasa an ka kɛ jamalajɛ la, k’a na duba an ye o la.
9 An ka kodumanw sɔrɔ: Ala ka Kuma negeba de b’an na, ka d’a kan an bɛ labonya ale sababu fɛ ka kisili sɔrɔ. (1 Piɛ. 2:2) An mana taa kafoba ka jamalajɛ la, ka jɛmukanw lamɛn, an na dɔ fara an ka dannaya kan Ala ka Kuma la, wa, o n’an labɛn cogo fisaman na walasa an k’an kologɛlɛya Sitanɛ ka binnkanniw na. Ka fara o kan, an n’a jira Jehowa an’an filɛbagaw la, k’an bɛ fɛn senumanw bonya kosɛbɛ, ani ko mɔgɔ “minnu bɛ segin kɔ . . . an kɔni tɛ u dɔw ye, nka minnu bɛ dannaya kɛ ka u niw kisi, an ye olu dɔw ye.”—Heb. 10:39; 12:16; Nta. 27:11.
10 An ka d’a la ko Jehowa na sankolo finɛtiriw dayɛlɛ ka a ka dubaw lajigin an kan iko sanjibaw. (Mal. 3:10) An k’a kɛ an kuntilenna ye ka ye kafoba ka jamalajɛ la, min kumakun ye “Ala ka Kuma kɛbagaw” ye. An ka kɛ yen kabini a daminɛ na, Jumadon sɔgɔma fo ka taa se Karidon wula delili n’o “amiina” laban ma. An tɛna nimisa o la.