An k’an tulomajɔ kuma senumanw na
1 An man kan k’an tulomajɔ kosɛbɛ mɔgɔw ka kuma fɔtaw bɛɛ la. Nka, ni Ala de bɛ ka kuma, kun sɛbɛw b’an bolo k’an tulomajɔ. (Dut. 28:1, 2) Hɛrɛ la, hakili senu fɛ, sɛbɛnnikɛlaw ye “Ala ka kuma senumanw” sɛbɛn an nafa kama. (Rom. 3:2) An ka kafoba ka jamalajɛ nata bɛna cogo nafamaw di an ma k’o kumaw mɛn. O kumaw bɛna kalan, ka ɲɛfɔ. An bɛ se k’an tulomajɔ kosɛbɛ cogo di?
2 An ka na joona don o don: I ka miiri Israɛldenw tun bɛ cogo min na tuma min na u welela ka taa Jehowa kunbɛn Sinayi kulu la walasa k’a ka sariya mɛn! (Eki. 19:10, 11, 16-19) N’o hakilina ɲɔgɔn ye, n’an b’a fɛ Jehowa k’an kalan kafoba ka jamalajɛ la, an bɛna fɛɛrɛw tigɛ walasa ka na joona don o don sɔgɔma. N’an bɛ na kalan daminɛnen kɔfɛ, an tɛ se ka kalan mumɛ lamɛn, wa, an kɛtɔ k’an ka sigiyɔrɔ ɲini, an bɛna tɔw fana tɔɲɔ. Jamalajɛ kɛyɔrɔ bɛna dayɛlɛ don o don sɔgɔma nɛgɛ kan ɲɛ 8 na, sɔgɔma kalan bɛna daminɛ nɛgɛ kan ɲɛ 9 tɛmɛnen ni sanga 30 ye.
3 Dɔw bɛ kɔn ka na, nka kalan daminɛtuma b’a sɔrɔ u sigilen tɛ. Mun na? U b’u jɔ fo kalan ɲɛmɔgɔ k’a fɔ kalan bɛna daminɛ ni dɔnkili min ye. O tuma de la u b’u ka barow jɔ u teriw fɛ, ka taa u sigi. An bɛn’a kɔlɔsi ko ɲɛmɔgɔ sigilen bɛ banbali kan sanga caman kɔnɔ sanni kalan kelen-kelen bɛɛ ka daminɛ, k’o tuma na fana Masaya fɔlikan bɛ senna. O ye fɛn ye min b’a jira an na ko an ka an sigiyɔrɔ magɛn! O cogo la, dɔnkili data bɛ fɔ tuma min na, o b’a sɔrɔ an labɛnnen bɛ walasa tanuni dɔnkili minnu bɛ da Jehowa ye, an ka se k’olu da.
4 Denbayaw k’u tulomajɔ ɲɔgɔn fɛ: Tuma min na Kuma senumanw tun bɛ kalan Israɛldenw lajɛlenw ye, denbayaw tun ka kan k’u tulomajɔ, ka kalan, “denminsɛnw” sen fana tun b’o la. (Dut. 31:12) Jamalajɛ kɛtuma na, denmisɛnw man kan ka ‘bila u yɛrɛma’. (Nta. 29:15) Bangebagaw, aw k’a sɛgɛsɛgɛ ko denbaya kɔnɔmɔgɔw sigilen bɛ ɲɔgɔn fɛ, funankɛw fana sen b’o la. Bangebaga dɔw bɛ dɔnkili makɔnɔ kalan daminɛ na k’a sɔrɔ u bɛ taa n’u denw ye ɲɛgɛn na. Nka, o tɛ cogo ɲuman ye k’u kalan dɔnkiliw ni deliliw nafa la ka ɲɛsin an ka bato ma. N’a bɛ se ka kɛ kɔni, a ka fisa ka taa ɲɛgɛn na sanni kalan ka daminɛ.
5 N’an b’an lafiɲɛ koɲuman su o su, ani n’an tɛ dumuniba kɛ tile kɔnɔna na, a bɛna nɔgɔya an ma kosɛbɛ k’an tulomajɔ. An k’an hakili sigi kumanaw ka kumaw na. An kana kɛ ɲɛmajɔbaliw ye. Ni Bibulu tɛmɛsiraw bɛ kalan tuma min na, an k’o lajɛ an ka Bibulu kɔnɔ. An ka kumaw sɛbɛn k’u surunya. Jɛmu kelen-kelen bɛɛ kɛtuma na, an ka miiri kumana ka kumaw na, k’a lajɛ an bɛ se k’o waleya cogo min na. Kalan bannen kɔfɛ, an ka baro kɛ o kan an ka du kɔnɔ. Miiriya jumɛnw diyara u kelen-kelen ye? An ka denbaya bɛ se ka nafa sɔrɔ o hakilina dilenw na cogo di?
6 An ka jira ko an bɛ Ala ka Kuma bonya: Jamalajɛw ye cogo ɲumanw ye walasa ka baro kɛ an teriw fɛ, ani ka baro nafamaw sɔrɔ. N’an kɔnna ka na, an bɛna waati sɔrɔ ka kuma sanni kalan ka daminɛ. Nka tuma dɔ la, dɔw bɛ kuma kalan kɛtuma na. U bɛ miiri k’u bɛ soba dɔ kɔnɔ minkɛ, u tɛna mɔgɔ tɔw tɔɲɔ. Nka, u bɛ fili la. Lajɛ minnu bɛ kɛ yɔrɔbaw la, olu fana ye waati ye walasa ka lamɛnni kɛ iko n’an tun bɛ Masaya So lajɛw la. An man kan ka sɔn an ka telefoni tata, pager, camescope walima fototalan ka kɛ sababu ye ka tɔw hakili ta ka bɔ kalan kan.
7 Jehowa tun bɛ k’a ka Sariya di Musa ma tuma min na, o waati kɔnɔna na, Musa “ma dumuni kɛ, a ma ji min.” (Eki. 34:28) O cogo kelen na fana, a tɛ bɛn ka dumuni kɛ, ani ka ji min kalan kɛtuma na. Fo n’a kɛra bana gɛlɛn dɔ ye, an ka “a waati” kɔnɔ k’o kɛ.—Waj. 3:1.
8 An bɛ gɛlɛya dɔw sɔrɔ hali bi jamalajɛ dɔw la bawo balimakɛw ni balimamuso caman, ani denmisɛnninw fana bɛ yaala-yaala tɛmɛyɔrɔw la k’a sɔrɔ kalan bɛ senna. Ci bɛna bin mɔgɔw kunbɛnbagaw kan walasa u k’a ɲini o mɔgɔw fɛ, u ka don so kɔnɔ. Mɔgɔ minnu bɛ dɛmɛ don walasa ka baara sugu dɔ kɛ, n’o baara banna dɔrɔn u ka kan ka taa u sigi u sigiyɔrɔw la. U ka kan ka kɛ u sigiyɔrɔw la so kɔnɔ walasa ka kalan lamɛn, fo n’a y’a sɔrɔ baara nafama dɔ kalifara u ma kalan kɛtuma na. U man kan ka to jamalajɛ baarakɛyɔrɔw la, walima ka baro kɛ ni dɛmɛdonbaga wɛrɛw ye kalan tuma na.
9 N’an bɛ ka Ala ka Kuma lamɛn, an t’a fɛ abada ka kɛ mɔgɔw ye minnu “tulow gerenna.” (Heb. 5:11) O la sa an ka kafoba ka jamalajɛ nata la, an jɔlen ka to a kan ka bonya jira, bonya min bɛ bɛn, an ka tulomajɔ fɛ Jehowa ka kuma senumanw sɛgɛsɛgɛli la.