Awirilikalo: Waati min na an ka kan k’an jija kɛwale ɲumanw na
1 Ni fununfununba dɔ natɔ don yɔrɔ dɔ la, o mɔgɔw ka kan ka lasɔmi o la. N’a bɛ ka surunya, o kojugu fɔli bɛ kɛ kɔrɔtɔko ye. N’o fununfununba surunyara kosɛbɛ, lasɔminikan bɛ fɔ ka bonya kosɛbɛ fana. Mun na? Bawo ni caman b’o da fɛ. Mɔgɔ dɔw ma lasɔminikan tɛmɛnenw lamɛn. Dɔw ye u mɛn, nka u ma fosi kɛ. A bɛ ten fana Ala ka lasɔminikan ko la, an cira ka taa mɔgɔ lasɔmi o min na sanni Ala ka diminya tilennen fununfunun ka diɲɛ jugu in fɛnw bɛɛ halaki. (Nta. 10:25) Mɔgɔ miliyɔnw ka ɲɛnamaya banbali b’o da fɛ. Lasɔminikan ka kan ka fɔ. An ka kan k’an “jija kɛwale ɲumanw na.”—Tite 2:11-14.
2 San caman kɔnɔ, Jehowa ka jama dusu laminna ka Hakilijigin waati kɛ cɛsiri kɛrɛnkɛrɛnnen waati ye cidenyabaara la. San 1939 daminɛ na, L’informateur, (Ladɔnniyabaga) min bɔra An ka Masaya Cidenyabaara ɲɛ, a ye nin dusulamin kuma fɔ ko: “Ikomi tarabamakɔnɔ natɔ don, ani waati cogo fana ka ɲi, an jigi b’a la ko jɛkulu weleweledalaw bɛna lɛrɛ minnu kɛ foro la, k’olu bɛna caya ni kɔrɔlen ye fo siɲɛ fila ɲɔgɔn, ani ko tutigɛbagaw bɛna dɔ fara u ka lɛrɛ kɛtaw kan sɛbɛ yɛrɛ la. Kari duuru de bɛ Awirilikalo la. Sibiri duuru fana b’a la. Awirilikalo la, an ka Sibiri ni Kari kelen kelen bɛɛ kɛ . . . seereya kɛrɛnkɛrɛnnen waati ye.” O kuntilenna min tun sigira an balimaw ɲɛ a san 60 filɛ nin ye, o tun bɛ cɛsiriba de wajibiya u ma walasa u tun ka se k’o sɔrɔ. Sibiri duuru ani Kari duuru de bɛ Awirilikalo la ɲinan fana iko san 1939 na. I bɛna mun kɛ kalo kɔnɔna na? I bɛna mun sɛbɛn Awirilikalo yɔrɔ la, san 2000 donjatelan kan? I k’i labɛn walasa i k’i niyɔrɔ sɛbɛ kɛ kɛwale ɲumanw na Jehowa ka jama tɔw fɛ, katuguni Awirili ye kalo kɛrɛnkɛrɛnnen ye hakili ta fan fɛ baara caman ka kan ka kɛ min na.
3 An jigi b’a la ka fɛn min kɛ: San 2000 don min nafa ka bon n’a don tɔw bɛɛ ye, o bɛ bɛn o kalo de ma. O don ye Awirilikalo tile 19 ye, n’o ye Yesu ka saya Hakilijigin ye. An ka cɛsiri kɛrɛnkɛrɛnnen kɛ walasa ka mɔgɔ caman wele ka na Hakilijigin na. Iko a fɔra cogo min na kalo tɛmɛnnen na, mɔgɔ minnu bɛ se ka na Hakilijigin na, an k’olu tɔgɔw sɛbɛn, ka tila k’a lajɛ n’an ma ɲinɛ u si kɔ. Weleweledala walekɛbaliw, Bibulu kalandenw, segin-ka-bɔnyew, ani minnu ye Bibulu kalan kɛ ka kɔrɔ, an baarakɛɲɔgɔnw, an kalandenɲɔgɔnw, an sigiɲɔgɔnw, an balimaw, an’an dɔnbaga wɛrɛw, olu tɔgɔw ka kan ka sɔrɔ an ka mɔgɔ welelenw na. Mɔgɔ minnu b’a fɛ ka na, yali nacogo b’u bɛɛ bolo wa? Ni nacogo t’u bolo, yali i bɛ se k’u dɛmɛ ni kanuya ye wa? Hakilijigin don su, bonya dalen bɛ an bɛɛ kan, walasa mɔgɔ minnu bɛna na Hakilijigin na, an k’a kɛ u k’a ye k’u kunbɛnna ni nisɔndiya ye. Hakilijigin don kɔfɛ, an bɛ se ka mɔgɔw sirataama, mɔgɔ minnu nana o la walasa ka dɛmɛ wɛrɛ lase u ma hakili ta fan fɛ.
4 K’an “jija kɛwale ɲumanw na” sanni Hakilijigin ka se, an’o kɔfɛ, o bɛna kɛ cogo ɲuman ye walasa k’a jira Jehowa la k’a ye fɛn minnu bɛɛ kɛ an ye, k’an bɛ nafaba don o fɛnw na tiɲɛ na. Ikomi tile tɛ bin joona, ani waati cogo ka ɲi fana jamana caman na, an caman bɛna se ka dɔ fara an ka cɛsiriw kan an ka kibaru duman fɔli baara la. N’i ye tutigɛbaga farankan ye, i bɛn’a ŋaniya k’i seko bɛɛ kɛ cidenyabaara la walasa ka lɛrɛ 50 kɛ, walima ka lɛrɛw kɛ min ka ca n’o ye. (Mat. 5:37) I ye waati min boloda kabini kalo daminɛ na, i nɔrɔlen ka to o la. (Waj. 3:1; 1 Kɔr. 14:40) An tɔw fana k’an seko kɛ ka kɛɲɛ n’an ka kow ye walasa ka tutigɛbagaw bɛɛ kɔkɔrɔdon kosɛbɛ, k’u dusu lamin, ani ka baara kɛ u fɛ foro la. (A suma ni 2 Masakɛw 10:15, 16 ye.) N’an bɛ danni caman kɛ Awirilikalo la ni timinandiya ye, an bɛ se ka sigi n’a ye ka nisɔndiyaba ni duba sɔrɔ ka bɔ Jehowa yɔrɔ. (Mal. 3:10) O bɛna kɛ sababu ye k’i dɛmɛ walasa i ka se ka kɛ tutigɛbaga farankan baara la kalo o kalo, walima tutigɛbaga basigilen baara la. Iko Masaya weleweledala basigilenw, an ye fanga min sɔrɔ, fo o ka to an na kalo nataw la.
5 Siga t’a la ko Jehowa ka jamakulu mɔgɔ miliyɔn caman bɛna so kɔnɔ Bibulu kalanw caman daminɛ. Yali i fana b’a fɛ ka Bibulu kalan dɔ daminɛ wa? I ka Jehowa deli walasa k’o kelen sɔrɔ, wa i ka baara kɛ ka kɛɲɛ n’i ka deliliw ye. I bɛ majiginnenya delili minnu kɛ walasa Jehowa k’i dɛmɛ ka mɔgɔ dusukun jɛlen dɔ sɔrɔ k’a kalan, i bɛ se ka da a la k’o deliliw bɛna diya Ala ye.— 1 Yuh. 3:22.
6 Nin ye kuma kuntacogo dɔ ye min ye nafaba sɔrɔ baro daminɛcogow kan. I ka daminɛ ka ɲininkali kɛ ko: “Farinya ko minnu bɛɛ bɛ k’a kɛ gɔfɛrɛnaman lakɔliw la, n’an y’olu lajɛ, e hakili la, yali o ye jinɛw ka baara nɔ dɔ de ye wa, walima bangebagaw nɔ don, bangebaga minnu m’u denw kolon?” A to a k’i jaabi. N’a tigi ko “jinɛw ka baara nɔ don”, Jirali 12:9, 12 kalan. Sendonbaga sen bɛ kojuguw cayali la cogo min na diɲɛ kɔnɔ, i k’o jira. O kɔfɛ, Wajibiya gafenin dayɛlɛ kalansen 4 nan yɔrɔ la. A ɲininka n’a ma deli k’a yɛrɛ ɲininka nin na: ‘Sendonbaga bɔra min?’. Dakun fɔlɔ ni filanan kalan, ka baro kɛ u kan. N’a tigi dun ko “bangebagaw de m’u denw kolon,” o la sa, 2 Timote 3:1-3 kalan. Jogo minnu ye farinya sababu ye, olu jira. O kɔfɛ, Wajibiya gafenin dayɛlɛ kalansen 8 nan yɔrɔ la, ka dakun 5 nan kalan. I ka t’a fɛ baro la. N’i bɛ se ka ɲɔgɔnye dɔ boloda walasa ka segin ka na, o bɛna kɛ ko ɲuman ye walasa ka Bibulu kalan dɔ daminɛ n’a tigi ye. Bɔnye nata la, a ɲininka n’a y’a sɔrɔ a bɛ mɔgɔ wɛrɛ dɔn, a ka fɛn kalanta lamɛnni bɛna diya min ye.
7 Ka “jija kɛwale ɲumanw na” Awirilikalo la, o bɛ kɛ cogo min fana fɛ, o ye ka wajuli kɛ cogo caman na. Yali i miirila a la ka seereya kɛ mobiliw jɔyɔrɔw la wa? Karibaw, walima tɛrɛngari la wa? Yali a bɛna diya i ye k’a lajɛ ka seereya kɛ telefɔni fɛ, siraw kan, walima jagokɛyɔrɔw la wa? Mun na i tɛn’a lajɛ ka seereya kɛ o cogow fɛ? I mago bɛ jagɛlɛya min na, Jehowa bɛna i dɛmɛ k’o sɔrɔ. (Kɛw. 4:31; 1 Tes. 2:2) I bɛ se ka ɲɔgɔnye dɔ boloda walasa ka baara kɛ tutigɛbaga, walima weleweledala dɔ fɛ min bɛ cidenyabaara ɲɛ caman dɔn.
8 Mɔgɔ o mɔgɔ b’a fɛ ka dɔ fara a ka baara kan seereya la, a bɛn’a ŋaniya k’a sen don senfɛ seereya la. Tuma caman na, walasa o ka kɛ fo an ka teriya baro dɔ daminɛ ni mɔgɔ dɔ ye. Bɛɛ ka nafa bɛ ko min na, i ka ɲininkali dɔ lawuli dɔrɔn o kan. I bɛ se ka baara kɛ ni hakilina ye min jiralen bɛ dakun 6 nan na. Waati kunkurunnin minnu b’i bolo, i jija ka baara ɲuman kɛ n’u ye walasa u kana tiɲɛ. An tɛ sɔn ka dɔrɔmɛ kelen, dɔrɔmɛ fila, walima dɔrɔmɛ duuru fili katuguni u tɛ dɔrɔmɛ mugan bɔ. O cogo kelen na fana, hali n’a y’a sɔrɔ sanga duuru dɔrɔn, walima sanga tan, walima sanga 15 de b’an bolo, mun na an tɛna o waati ta ka senfɛ seereya kɛ?
9 Miiri waati don: Kafoba ka jamalajɛ tɛmɛnnen kumakun tun ye “Ala ka kiraya kuma” ye. Yɔrɔ nafama minnu jirala a daramu na, an k’an hakili to olu la. Daramu barokun tun ye ko An ka nafaba don an ka alako ta fan fɛ ciyɛn na. O y’an bila ka miiri danfara la, danfara min tun bɛ Yakuba ni Esau cɛ. Esau y’a fɔ cogo o cogo k’a bɛ nafa min don hakili ta fan fɛ fɛnw na, k’o ni Yakuba ta ye kelen ye, nka Esau ka walew m’o jira. (Jen. 25:29-34) O ye lasɔminikan ɲumanba ye an ma dɛ! Iko Yakuba, an labɛnnen ka to walasa ka siyɛn ta Jehowa ka duba kama. (Jen. 32:24-29) Walasa an kana an ka alako ta fan fɛ ciyɛn kɛrɛnkɛrɛnnen minɛ iko fɛn gansan dɔ, mun na an tɛna an ka timinandiya kuraya Awirilikalo la, ani kalo minnu bɛ tugu o la?
10 “Jehowa ka donba surunyara, a surunyara, a bɛ teliya hali.” (Sof. 1:14) Ala ka Masaya kibaru duman weleweledali ka kan ka kɛ. Niw b’a da fɛ. Nin kalo in ka kɛ duba kɛrɛnkɛrɛnnen kalo ye Jehowa ka jamakulu mɔgɔw bɛɛ bolo k’a to an bɛ ‘jijali la kɛwale ɲumanw na,’ k’a jira o cogo la k’an ye kelen ye.
[Ɲɛ 4nan yɔrɔ kɔrilen]
Hakilijigin don fɛn minnu ka kan ka to an hakili la
Ɲinan Hakilijigin don bɛ bɛn Awirilikalo tile 19 ma. Maakɔrɔw ka kan k’u jan to nin fɛnw na:
◼ Ka lajɛ waati sigi. Ka jɛya a la ko taamasiyɛnw tɛna tɛmɛ fo tilebin kɔfɛ.
◼ Mɔgɔ kelen-kelen bɛɛ, ka fara kumana kan, olu ka kan ka ladɔnniya lajɛ kɛwaati jɔnjɔn ani a kɛyɔrɔ la.
◼ Nbuuru ni duwɛn sugu minnu bɛnnen don, olu ka kan ka labɛn ka bila.—San 1985 Feburuyekalo tile 15 La Tour de Garde ɲɛw 19 lajɛ.
◼ Mɔgɔ minnu sugandira, olu ka kan ka na joona ni asiyɛtiw, wɛrɛw, ani tabali n’a fini bɛnnen ye lajɛ kɛyɔrɔ la walasa k’u bila u yɔrɔ la.
◼ Masaya So, walima lajɛ bɛ kɛ yɔrɔ min na, o yɔrɔw ka kan ka saniya joona, wa k’a kɛ ka ɲɛ fana.
◼ Mɔgɔw kunbɛnbagaw ani taamasiyɛnw latɛmɛbagaw ka kan ka kɔn ka sugandi. U ka kan ka kɔn ka kunnafoniw fana sɔrɔ u ka baara kɛtaw la, ani ko kɛcogo bɛnnen na.
◼ Ni mɔgɔ munnen dɔ man kɛnɛ, n’a tɛ se ka na Hakilijigin na, labɛnw ka kan ka kɛ walasa a ka taamasiyɛnw sɔrɔ.
◼ Ni jɛkulu caman bɛ jɛ Masaya So kelen kɔnɔ, u ka kan ka kow labɛn cogo ɲuman na u ni ɲɔgɔn cɛ walasa ka ɲɔgɔndegun fu bali donda ni tɛmɛsira ni sennamɔgɔw tɛmɛyɔrɔ ani mobiliw jɔyɔrɔ la.