An bɛ se ka san 2000 Awirilikalo kɛ an ka kalo bɛɛ la fisaman ye cogo di?
1 Awirilikalo tile 19 nan, n’o bɛ bɛn Arabadon ma, o wulada bɛna kɛ an ka ala-ka-marako san don bɛɛ la nafama ye. O don na, tuma min na tile bɛna bin dɔɔnin dɔɔnin dugukolo yɔrɔ bɛɛ la, Krista ka saya Hakilijigin don bɛna kɛ Jehowa Seerew ka jɛkulu kelen kelen, n’a kulu kelen kelen bɛɛ la. N’an sigilen bɛ yɔrɔ o yɔrɔ la, n’an ye Yesu Krista ka saraka Hakilijigin don labato, o bɛna kɛ san ko ye min ka bon ni san ko tɔw bɛɛ ye. Hakilijigin don jiralen bɛ Calendrier des Témoins de Jéhovah 2000 (Jehowa Seerew ka san 2000 donjatelan) kan, Awirilikalo yɔrɔ la.
2 K’a sɔrɔ an man kan n’a ye, Jehowa ye dusukun ɲumanya jira a Denkɛ ka saraka fɛ. O la sa, Awirilikalo mumɛ bɛ cogo ɲumanba di an ma k’an ka waleɲumandɔn jira ka ɲɛsin o ma, n’an ni bɛɛ ye. Cogo di? Ciden Pol y’a sɛbɛn ko: “Krista ka kanuya bɛ an jija (“wajibiya”, NW ) katuguni an b’a jate ko ni kelen sara mɔgɔw bɛɛ nɔ na walasa minnu ɲɛnama don, olu kana ɲɛnamaya u yɛrɛw ye tun, nka min sara u nɔ na ka kunun, u ka ɲɛnamaya o de ye.” (2 Kɔr. 5:14, 15) Ɔwɔ, iko Masaya weleweledalaw, an bɛ se ka jira ko an tɛ ɲɛnamaya an yɛrɛw ye, nka k’an bɛ ɲɛnama mɔgɔ ye min sara an ye, n’an bɛ Awirilikalo kɛ an ka kalo bɛɛ la fisaman ye.
3 Ɲinisɛbɛn lafa walasa ka kɛ tutigɛbaga farankan ye Awirilikalo la: Ciden Pol ye dusu don an kɔnɔ n’a ka misali ye, tuma min na a y’a fɔ ko: ‘Ne tɛ n yɛrɛ ni jate fɛn ye, a bɛ i n’a fɔ fosi tɛ, ni ne bɛ se dɔrɔn ka ne ka boli dafa ni ɲagali ye, ka ne ka baara fana dafa ne ye min sɔrɔ Matigi Yesu fɛ, ka Ala ka nɛɛma kibaru duman fɔ.’ (Kɛw. 20:24) O bonya kelen de fana b’an bolo ka seereya dafalen kɛ Jehowa Ala ko la. O kosɔn, a ka kan ka diya an ye ka Awirilikalo kɛ an ka kalo bɛɛ la fisaman ye tutigɛbaga farankan baara la.
4 Dɔgɔkun laban duuru de bɛ san 2000 Awirilikalo la. O bɛn’a kɛ kalo ɲuman ye walasa caman ka kɛ tutigɛbaga ye. N’an seginna an kɔ ka na san 1997 Marisikalo la, an ye tutigɛbaga farankan hakɛ cayalenba sɔrɔ waati bɛɛ la. Mɔgɔ minnu y’o baara kɛ, u tun ye 190 ye. O la sa, weleweledalaw mumɛ na, weleweledala 19 ni kɔ de y’o kɛ kɛmɛ kɛmɛ jate la. San fila ni tila o kɔfɛ, san 1999 Utikalo la, weleweledalaw mumɛ min jatera, weleweledala 10 de farala o hakɛ kan, kɛmɛ kɛmɛ jate la. O kɔrɔ ko cogoba de b’an bolo ka se ka tutigɛbaga farankanw hakɛ cayalenba kɔrɔ tɛmɛ. Ka fara o kan, ikomi dɔ bɔra lɛrɛ wajibiyalen na, o b’a to o baara bɛ se ka kɛ mɔgɔ caman fɛ jɛkulu kɔnɔ. Weleweledala kelen o kelen min batisera, a ka kan ka lajɛ delili kɔnɔ n’a bɛ se ka kɛ tutigɛbaga farankan ye nin Awirilikalo in na.
5 I ka baara kɛ ni san 2000 donjatelan ye walasa i ka Awirilikalo baara boloda kabini sisan. Don minnu na i bɛna se ka taa foro baara la, i k’olu latigɛ. E yɛrɛ ɲɛna, i bɛ se ka lɛrɛ minnu kɛ wajuli baara la kalo kɔnɔna na, i k’o lɛrɛw fara ɲɔgɔn kan. I bɛ se ka waati min kɛ ka kuma mɔgɔ wɛrɛw fɛ senfɛ seereya ni seereya sifa wɛrɛw la, i k’o waatiw fana jate. Yali o mumɛ bɛ se ka tutigɛbaga farankan ka lɛrɛ 50 hakɛ wajibiyalen sɔrɔ wa? Ni dɔ b’i jɛ o lɛrɛ wajibiyalen na, yali i bɛ se ka yɛlɛmali wɛrɛw don i ka baara bolodalen na walasa i ka se ka waati kunmabɔ, n’o bɛna to i ka kɛ tutigɛbaga farankan ye wa? Walasa ka lɛrɛ 50 sɔrɔ kalo kɔnɔ, i mago b’a la dɔrɔn ka lɛrɛ kelen ni sanga 40 kɛ don o don.
6 Ikomi dɔ fana bɔra sisan tutigɛbaga basigilenw ka lɛrɛ wajibiyalen na, yali i miirila ka don waati dafalen baara la wa? Mun na i tɛna daminɛ sisan, bawo Awirili bɛna kɛ kalo ɲuman ye walasa k’o kɛ. N’i dalen t’a la k’i bɛ se ka tutigɛbaga basigilenw ka lɛrɛ wajibiyalen 70 sɔrɔ, mun na i tɛna kɛ tutigɛbaga farankan ye Awirilikalo la, nka ka lɛrɛ 70 kɛ i kuntilenna ye? N’i y’a ye k’i sera k’o kɛ, a bɛ se ka nɔgɔya i bolo kosɛbɛ k’i fara tutigɛbaga basigilenw kan.— Notre Ministère ɲɛw 113-114 lajɛ.
7 Iko Kibaru Duman weleweledala, i k’i ta kɛ k’a dafa: An kelen kelen bɛɛ fɛ, weleweledalaw ka fara tutigɛbagaw kan, an ka kanuya jɔnjɔn ka ɲɛsin Ala ma, ani ka ɲɛsin an mɔgɔɲɔgɔnw ma, o de b’an bila an k’an seko bɛɛ kɛ n’an ni bɛɛ ye Jehowa ka baara la. Wa an b’o kɛ ka kɛɲɛ n’an cogow ye. (Luka 10:27) An b’a jira o fɛ ko “an bɛ baara kɛ ka kɛlɛ kɛ, katuguni an ye an jigi da Ala ɲɛnama kan, o min ye mɔgɔw bɛɛ Kisibaa ye, janko dannabaaw ta.” (1 Tim. 4:10, ABU) O de kosɔn, Masaya baara la, n’an bɛɛ b’an ta kɛ k’a dafa, an ka kan ka sigi n’a ye ko weleweledala kɛmɛ bɛna u sen don Awirilikalo baara la, kɛmɛ kɛmɛ jate la.
8 An kana ɲinɛ Yesu ka dusulamin kuma kɔ ko: “Sumantigɛta ka ca, nka baarakɛlaw ka dɔgɔ. Aw dun ka Sumantigi deli ko a ka baarakɛlaw bila ka taa a ka suman tigɛ.” A y’o fɔ kaban minkɛ dɔrɔn, Yesu ye ci di a ka ciden 12 ma, k’u bila ka taa a ɲɛ ka wajuli kɛ. (Mat. 9:37, 38; 10:1, 5, 7) San kelen ɲɔgɔn o kɔfɛ, a kɛlen kɔ ka mɔgɔ 12 dege wajuli la ka ɲɛ, Yesu ye ‘mɔgɔ biwolonwula wɛrɛw ɲɛnatɔmɔ k’u bila ka taa a ɲɛ,’ k’o ci kelen fɔ u ye ko: ‘Suman tigɛta ka ca. . . O de kosɔn aw ka Sumantigi deli ko a ka baarakɛlaw ci ka taa a ka suman tigɛ.’ (Luka 10:1, 2, ABU) Jehowa y’o deliliw jaabi cogo min na, o jiralen bɛ Kɛwalew kɔnɔ. San 33 an tile la, Pantekɔti don na, kalanden cayara ka mɔgɔ 120 hakɛ sɔrɔ.U kɛra kalanden 3 000 ye. O kɔfɛ u kɛra kalanden 5 000 ye. (Kɛw. 1:15; 2:41; 4:4) O kɔfɛ, “kalanden cayara kosɛbɛ.” (Kɛw. 6:7) O cogo kelen na fana, an ka waati la, an ka kan ka t’a fɛ ka Makɛ deli walasa ka Masaya weleweledala caman sɔrɔ. Ka kɛɲɛ n’an ka deliliw ye, jɛkulu kɔnɔ weleweledala kelen kelen bɛɛ ka kan k’u ka kow labɛn, k’u basigi walasa u k’u sen don cidenyabaara la kalo o kalo.
9 I bɛ se ka Awirilikalo yɔrɔ lajɛ ko kura donjatelan kan. Ikomi kalo bɛ daminɛ ni Sibiri ni Kari ye, yali i bɛ se k’i labɛn ka wajuli kɛ o dɔgɔkun laban in na walasa i ka se k’a daminɛ joona o cogo la wa? Yali kalo kɔnɔna na, i bɛ se k’i fara i ka jɛkulu ka gafe kalan kulu kan walasa aw ka baara kɛ ɲɔgɔn fɛ “sɔn-ni-sɔn gafeninw don” na wa? Ka lɛrɛ kelen ni kɔ kɛ wajuli la karidon kelen kelen bɛɛ la, e ko cogo di o la? Ikomi su tɛ ko joona, an bɛ se ka waati caman kunmabɔ o tuma na. Yali i bɛ se k’i labɛn walasa ka wajuli kɛ su dɔw fɛ wa? Cogo minnu bɛɛ b’i bolo walasa ka senfɛ seereya kɛ i ka baarakɛyɔrɔ la, lakɔli la, walima i ka don o don kow la, i kana ɲinɛ olu kɔ. I bɛ se ka wajuli kɛ don minnu na, taamasiyɛn kɛ o donw na donjatelan kan. I bɛ lɛrɛ minnu kɛ wajuli la, i k’olu fana sɛbɛn o kan.
10 Mɔgɔ minnu bɛɛ ye cogow dafa ni maakɔrɔw jɛnna n’a ye u ka wajuli daminɛ iko weleweledala minnu ma batise, Awirilikalo bɛna kɛ olu fana bolo waati bɛnnen ye k’o daminɛ. N’i bɛ Bibulu kalan kɛ mɔgɔ dɔ kun, yali a taara ɲɛ fo a bɛ se ka ɲini ɲɛmɔgɔya lakɔlɔsibaga fɛ n’a bɛ se ka kɛ kibaru duman weleweledala ye wa? Ni denw b’i bolo minnu ma batɛmu ta fɔlɔ, yali i kumana maakɔrɔw fɛ u ka hakili ta fan fɛ ɲɛtaaw ko kan wa? Yali sisan de tɛna kɛ a waati ɲuman ye u bolo ka weleweledali daminɛ wa? — Notre Ministère ɲɛw 98-101 lajɛ.
11 Ikomi an b’a fɛ k’an cɛsiri walasa ka san 2000 Awirilikalo kɛ an ka kalo bɛɛ la fisaman ye, an kelen kelen bɛɛ ka kan k’an ta kɛ cidenyabaara la, ka tila ka baara dantigɛli sɛbɛn bila kalo sa la. (A suma ni Marka 6:10 ye) Weleweledala kura minnu ma batise, n’u siɲɛ fɔlɔ don k’u sen don foro baara la, an ka kan ka dusu don u kɔnɔ walasa u k’u ka baara dantigɛli sɛbɛn di a waati bɛnnen na. N’an y’an ta kɛ, o bɛ se ka caman fara Awirilikalo baara dantigɛli kan. N’an y’an cɛsiri o cogo la wajuli la, o bɛna kɛ tanunikanba ye Jehowa ma.
12 Na ni mɔgɔ wɛrɛw ye Hakilijigin don na: Yali a tɛna diya an ye k’a ye ko san 2000 la mɔgɔ minnu bɛna na Krista ka saya Hakilijigin don na, ko cayalenba kura sɔrɔla olu hakɛ la wa? Ɔwɔ, o kɔrɔ ye ko mɔgɔ hakɛ cayalenba bɛna u lajɛ ɲɔgɔn fɛ iko a ma deli ka kɛ ban, walasa k’u ka waleɲumandɔn jira ka ɲɛsin Jehowa Ala ni Yesu Krista ka kanuya wale ma, u ye kanuya wale min kɛ an ye. (Yuh. 3:16; 15:13) I ka kan ka fɛɛrɛ o fɛɛrɛ tigɛ walasa fɛn fosi kana e n’i ka denbaya bali k’a kɛ Hakilijigin don na, i k’o fɛɛrɛw tigɛ.
13 Sisan de fana y’a waati ye ka mɔgɔw wele ka na Hakilijigin don na. I b’a fɛ ka mɔgɔ o mɔgɔ ye ka na Hakilijigin don na, i ka sɛbɛnfura dɔ ta k’olu tɔgɔw sɛbɛn o kan. Mɔgɔ minnu ye Bibulu kalan ka tɛmɛ, minnu bɛɛ bɛ k’a kalan sisan, ani minnu ye i ka segin-ka-bɔnyew ye, i k’olu tɔgɔw sɛbɛn o kan. I dɔnbaga minnu b’i ka baarakɛyɔrɔ la, lakɔli la, i sigiɲɔgɔnw ani e ni minnu bɛ kow kɛ ɲɔgɔnw fɛ, i k’olu bɛɛ fana tɔgɔw sɛbɛn. I kana ɲinɛ i dɔnbaga wɛrɛw ni balimaw tɔgɔw kɔ. N’i y’o tɔgɔ ninnu bɛɛ sɛbɛn kaban, i ka daminɛ k’o mɔgɔw kelen kelen bɛɛ wele ni nisɔndiya ye. Hakilijigin don bɛna kɛ tuma min na ani yɔrɔ min na, i k’o jɛya u ye. Ni Awirilikalo tile 19 bɛ ka surunya, i ye mɔgɔ minnu tɔgɔw sɛbɛn, i k’olu hakili jigin o la. E yɛrɛ bɛ se k’u ye k’o kɛ, walima i bɛ se k’o kɛ telefɔni fɛ. A fɔ u ye k’u bɛ se ka taa i fɛ Hakilijigin don na.
14 Ka ɲɛsin weleweledala walekɛbaliw ma minnu bɛ danyɔrɔ la, maakɔrɔw kulu bɛna cɛsiri kɛrɛnkɛrɛnnen kɛ ka dusu don olu bɛɛ kɔnɔ walasa u ka na Hakilijigin don na, ka kɛɲɛ ni Tɔn ka ɲɛbilakuma tɛmɛnen ye. (Mat. 18:12-14) A bɛna diya maakɔrɔw ye ka Tɔn ka san 1999 Feburuyekalo tile 2 bataki lajɛ ko kura. Jɛkulu sɛbɛnnikɛla ka kan ka weleweledala walekɛbaliw bɛɛ tɔgɔw sɛbɛn. Baara lakɔlɔsibaga bɛna maakɔrɔw sugandi ka taa bɔ u ye walasa k’u wele ka na Hakilijigin don na. U ka dɛndɛnni baara kɔnɔna na, ni maakɔrɔw bɛ to ka taa bɔ o mɔgɔ ninnu ye, o bɛna se k’u dɛmɛ ka wajuli daminɛ ko kura, Awirilikalo kɔnɔna yɛrɛ la. N’a ɲinina walekɛbaliw fɛ u ni weleweledala dɔ ka wajuli kɛ ɲɔgɔn fɛ, weleweledala min bɛ foro baara dɔn kosɛbɛ, o bɛna kɛ sababu ye ka dusu don u kɔnɔ kosɛbɛ.
15 Dusu don mɔgɔw kɔnɔ u ka wajuli baara kɔkɔrɔdon Awirilikalo la: Maakɔrɔw bɛɛ, cidenyabaara magannaw ni dutigiw ka kan ka jɛ ka baara kɛ ɲɔgɔn fɛ koɲuman walasa ka san 2000 Awirilikalo kɛ an ka kalo bɛɛ la fisaman ye. Maakɔrɔw bɛna u cɛsiri walasa fɛn kelen kelen bɛɛ ka labɛn koɲuman, ka ɲɛmɔgɔya fana ta. (Heb. 13:7) Dɔgɔkun labanw na, ani baara kɛ don na, foro baara ka lajɛw bɛna labɛn cogo la min kɔkɔrɔdonni ka nɔgɔ. Foro baara ka lajɛ dɔ wɛrɛw bɛ se ka labɛn wuladanin fɛ ani su daminɛ na. Awirilikalo ka baara bolodalen bɛɛ bɛna sɛbɛn k’a bila kunnafoniw sɛbɛnw gengenyɔrɔ la. Mɔgɔ dɔ ka kan ka sugandi walasa ka foro baara ka lajɛ bolodalen kelen kelen bɛɛ ɲɛminɛ. Wajuli kɛyɔrɔ min bɛ bɔli kɛ, o ka kan ka sɔrɔ walasa kulu ka se ka baara kɛ.
16 Awirilikalo la La Tour de Garde ni Réveillez-vous! bɛna jira. Walasa ka sokɔnɔ Bibulu kalanw daminɛ, Wajibiya gafenin ka kan ka jira magojirabaga bɛɛ la. O la sa, sɔn-ni-sɔn gafeninw ni gafeninw hakɛ min bɛ bɔli kɛ, o ka kan ka sɔrɔ.
17 Kalo sa la, a bɛna diya jɛkulu ka gafe kalan ɲɛminɛbagaw n’u kankɔrɔsigiw bɛɛ ye, u ka dusu don u ka kulu mɔgɔ kelen kelen bɛɛ kɔnɔ walasa kalo bɛ sa yɔrɔnin min na dɔrɔn, u k’u ka baara dantigɛli sɛbɛn di. A dɔ rɔ, u bɛ se k’o di Karidon na, Awirilikalo tile 30. O kɔfɛ sa, ni sɛbɛnnikɛla bɛ dantigɛli sɛbɛn ninnu jate minɛ, n’a y’a kɔlɔsi ko weleweledala dɔw m’u ka baara dantigɛli sɛbɛn di, a bɛ se k’olu hakili jigin ni kanuya ye, u k’o kɛ sanni Mɛkalo tile 6 ka se, bawo o don de la, a ka kan ka jɛkulu ka dantigɛli bila ka taa Tɔn ma. A bɛ se ka ɲini gafe kalan ɲɛminɛbagaw fɛ u k’a dɛmɛ ka weleweledalaw lasɔrɔ.
18 Hakilijigin don waati nafa de ka bon ni san waati tɔ bɛɛ ye Ala ka jamakulu mɔgɔw bolo. A ka kan k’a kɛ baara caman waati ye Jehowa ka baara la, an bɛɛ fɛ. A bɛ se k’a kɛ ten ni kibaru duman weleweledala kelen kelen bɛɛ bɛ se k’u ta kɛ k’a dafa, ni minnu y’u tɔgɔ di walasa ka kɛ tutigɛbaga farankanw ye, n’u b’u ta kɛ, ani n’an b’an timinandiya fana ka na ni mɔgɔ caman ye Krista ka saya hakilijigin don na. An ka Jehowa deli ni kɔnɔnajɛya ye, a ka duba an ye walasa san 2000 Awirilikalo ka kɛ an ka ala-ka-marako san kalo bɛɛ la fisaman ye. O bɛɛ ka kɛ Ala ka tanu n’a ka nɔɔrɔ kama!—Heb. 13:15.
[Box on page 3]
Waati bɛɛ la
Tutigɛbaga farankan hakɛ cayalenba:190
(San 1997 Marisikalo)
[Box on page 4]
Waati bɛɛ la
Weleweledalaw mumɛ cayalenba:1071
(San 1999 Utikalo la)
[Box on page 5]
Waati bɛɛ la mɔgɔw hakɛ cayalenba,
Mɔgɔ minnu tun bɛ Hakilijigin don na:2982
(San 1997)