‘N bɛ se ka mun kɛ?’
1 N bɛ se ka mun kɛ? Siga t’a la k’o ɲininkali tun bɛ Bibulu kalan kulu fitinin kɔnɔmɔgɔw hakili la. O kulu in sigira Charles Rusɛl fɛ san 1870 la. Ikomi u tun bɛ ka Ala sago faamu ka t’a fɛ, o Bibulu kalanden fɔlɔw y’u yɛrɛ ɲininka u tun bɛna se ka min kɛ walasa ka mɔgɔ wɛrɛw dɛmɛ ka Ala kuntilenna dɔn. U tun bɛ ka Bibulu dɔnniya min sɔrɔ, walasa ka diɲɛ mumɛ bɛɛ lasɔrɔ n’o ye, a jɛlen don k’o tun ye baaraba yɛrɛ de ye.
2 A kɛra hɛrɛ ye an bolo k’u sera k’o kɛ. Cogo di? Mɔgɔ kelen kelen bɛɛ y’a niyɔrɔ fitinin kɛ, wa bi bi in na, Jehowa Seerew dɔnnen don diɲɛ yɔrɔ bɛɛ la. U ye jɛkulu ye min mɔgɔw bɛ weleweledalaw miliyɔn wɔɔrɔ ɲɔgɔn bɔ minnu bɛ ka baara kɛ jɛkulu 90 000 na, jamana ni gunw 234 na.—Esa. 60:22.
3 I ka wajuli baara kɔkɔrɔdon k’a dafa: Baaraba min tun ka kan ka kɛ don labanw na, ni Yesu tun y’o kofɔ, a nafa ka bon an kelen kelen bɛɛ k’an ta kɛ o la. (Mar. 13:10) A jɛlen don k’o baara tɛ se ka to maakɔrɔw dama bolo minnu man ca. Wajuli baara tɛ bin tutigɛbagaw fana dɔrɔn kan. Nka tiɲɛ na, Krecɛn o Krecɛn min y’i yɛrɛbakun di Ala ma, o ka jɔyɔrɔ ka bon o baara la. An kelen kelen bɛɛ bɛ se k’an sen don wajuli baara ɲɛ dɔw la. (1 Tim. 1:12) An ka baara bonyana ka se hakɛ o hakɛ ma, o bɛna anw ni tɔw nafa.—1 Tim. 4:16.
4 Ka ɲɛsin an ka balimaya ma Krecɛnya sira la, an kelen kelen bɛɛ bɛ se k’o kɔkɔrɔdon k’a dafa cogo nafama wɛrɛw la. An bɛ se ka jɛkulu ka lajɛw kɔkɔrɔdon, n’an bɛ lajɛw matarafa, ka jaabiw di ni nisɔndiya ye. (Zab. 122:1, 8, 9) An bɛ se k’an niyɔrɔ kɛ fana walasa jɛkulu sanuyalen ka to jogo ta fan fɛ. Baara min bɛ ka kɛ diɲɛ bɛɛ la, an bɛ se k’o kɔkɔrɔdon ni wari ye, ka kɛɲɛ n’an ka sɔrɔ ye. An bɛ se k’an ta fana kɛ Masaya So saniyali la. N’an bɛ mɔgɔ kuraw, funankɛw ni mɔgɔkɔrɔbaw dɛmɛ cogo kelen na, an bɛ se ka kanuya ni kelenya cogo labonya jɛkulu kɔnɔ.—Kol. 3:12, 14.
5 O la sa, i bɛ se k’i yɛrɛ ɲininka, ko ‘N bɛ se ka mun kɛ?’ Hali ni mɔgɔ kelen kelen ka cɛsiriw bɛ se ka kɛ iko fɛn fitinin, n’i y’i ta kɛ, o bɛ kɛ jɛkulu barikama, kisɛma ni kɛnɛma dɔ sababu ye. O kosɔn, an bɛɛ bɛ min kɛ, o nafa ka bon Jehowa tɔgɔ bonyali la.