An ka Kibaru duman weleweleda
1 O ye bonyaba ye an bolo ka kɛ “hɛrɛ kibaru duman” fɔbagaw ye dɛ! (Rom. 10:15) Dususaalo cikan de b’an bolo ka fɔ mɔgɔw ye, mɔgɔ minnu jigi tigɛlen don kosɛbɛ, ni gɛlɛyaba caman fana b’u da la. An bɛ se k’u dɛmɛ cogo di walasa u k’a dɔn k’an bɛ fɛn min jira u la, k’o ye “fɛn ɲuman kibaru duman” ye?—Esa. 52:7.
2 Cikan fɔcogo min bɛna nɔ ɲuman to, an k’o labɛn: An ka cidenyabaara la, n’an b’an ka barow sinsin fɛn ɲumanw kan, o bɛna nɔ ɲuman bila mɔgɔw la. O la sa, n’an bɛ k’an ka kumajiracogo labɛn, k’a sɛbɛn jirata lajɛ, a nafa ka bon an ka cikan yɔrɔw ɲini minnu ka ɲi. Ikomi an jigiya sinsinnen bɛ Bibulu kan, n’an b’o fɔ mɔgɔ ye ni dannaya ni nisɔndiya ye, an bɛ se ka sigi n’a ye ko fɛn bɛna bɔ o la min bɛna dusu don an kɔnɔ.—Nta. 25:11.
3 Ni mɔgɔw b’a fɔ an ye ko diɲɛ kow bɛ ka juguya cogo dɔ la min bɛ ka se olu yɛrɛw ma, an bɛ se ka jira u la k’an b’u dusukunnataw faamu. Nka, an ka kan fana ka jira u la ko Ala ka Masaya de ye hadamadenw ka kunkow ɲɛnabɔlan lakika ye. Hali n’an bɛ kuma Jehowa ka “hakɛbɔ don” kan, an b’a fɛ k’a jira u la, k’o ye ‘kibaru duman ye mɔgɔ majiginnenw’ fɛ. (Esa. 61:1, 2; NW) An bɛ se k’an lamɛnbaga lajɛya a la ko Jehowa bɛ fɛn o fɛn kɛ, ko a mɛn o mɛn, o fɛn bɛ na ni hɛrɛba ye, ka laban ɲumanba fana sɔrɔ.
4 Kuma tiɲɛ kan ni nisɔndiya lakika ye: Ni mɔgɔw b’a kɔlɔsi an ɲɛ kan k’an dusu ka di, wa k’an bɛ min fɔ, k’an dalen bɛ o fana na, a ka nɔgɔn u bolo k’an lamɛn. N’an hakilinata b’a jira ko jigiya bɛ kow la, an lamɛnbagaw bɛna ye ko ‘an b’an ɲagali jigiya la.’ (Rom. 12:12) A bɛ se ka nɔgɔya u bolo kosɛbɛ ka sɔn kibaru duman na. Siga t’a la ko kun sɛbɛ b’an bolo tuma bɛɛ ka daŋaniya ni nisɔndiya jira an ka cidenyabaara ɲɛ kelen-kelen bɛɛ la.
5 Ikomi an ye kibaru duman weleweledalaw ye, an ka baara tɛ dan mɔgɔ ladɔnniyali dɔrɔn ma. An ka wajuli bɛ jigiya sɛbɛ di bi ni sini ɲɛnamaya fisaman ko la. (1 Tim. 4:8) N’an bɛ kuma mɔgɔ fɛ, n’an ka ko yecogo ka ɲi, o bɛna ye an ka kuma fɔtaw la, ka mɔgɔw dɛmɛ u ka sɔn kibaru duman na. N’an bɛ ka kibaru duman weleweleda, n’an b’an kɔlɔsi an ka kuma fɔtaw ni u fɔcogo la, o bɛ mɔgɔ kɔnɔnajɛlenw bila u ka sɔn o kibaru duman na.