An ka ‘an dantigɛ’ joona!
1 Yali mɔgɔ dɔ ma deli k’i ka kuma labɛnnen koɲuman tigɛ ko: “I bɛ mun nɔ fɛ tigi-tigi! I dantigɛ!” Nin ko in bɛ se k’an kalan mun na?
2 Bi mɔgɔ caman kɔrɔtɔlen don. U b’a fɛ k’a dɔn an ye jɔni ye, ani mun na an b’u ka yɔrɔ la. N’u y’a ye ko an ka bɔnyeli kun ye ka baro kɛ Bibulu kan, u bɛ se k’u ban k’an lamɛn. Bibulu kalanni ani hakili ta fan fɛ baro tɛ fɛnw ye minnu nafa ka bon u caman ka ɲɛnamaya kɔnɔ. An bɛ se k’o mɔgɔ suguw lajɛya a la cogo di k’u ka kan ka sanga damadɔw ta ka kuma Bibulu barokun dɔ kan?
3 A cogo bɛɛ la fisama ye min ye: A gundo ye k’a jira o mɔgɔ sugu la ko kunko minnu b’a la, ko Bibulu bɛ ɲɛnabɔli cogo ɲuman di olu la, wa i k’o fɔ kuma dakuruɲɛ damadɔw dɔrɔn na, n’i bɛ se. Kumajiracogo minnu ka fisa kosɛbɛ, o ye kumajiracogow ye ɲininkali kɛrɛnkɛrɛnnen dɔ bɛ lawuli minnu na. O kun ye k’an lamɛnbaga bila ka miiri. O kɔ, Bibulu tɛmɛsira dɔ ta walisa k’o ɲininkali jaabi. I bɛ se ka nisɔndiya sɔrɔ n’i bɛ hakilina nata dɔw lajɛ. U dikun ye k’an dɛmɛ ka ‘an dantigɛ’ joona walisa an ka kuma ka baro nege don an lamɛnbaga la.
4 Danyɔrɔ minnu na mɔgɔw b’a fɔ tuma caman na ko an ka cikan man di u ye, ɲininkali lawuli min bɛ olu yɛrɛ kun kan:
◼ “Ikomi an bɛ ka gɛrɛ san ba nata la, yali jigiya de b’i la wa, walima siga-siga? [A to a k’i jaabi.] An ɲɛ bɛ jɔrɔnanko minnu na bi, Bibulu ye olu kofɔ. U bɛna laban min na, a y’o fana fɔ.” 2 Timote 3:1, 2, 5 ani Ntalenw 2:21, 22 kalan.
◼ “An ka jamana kan, furakɛli ko hamiba de bɛ mɔgɔw la. Yali i tun b’a dɔn ko Ala ye layidu ta k’a bɛna gɛlɛyakow bɛɛ ɲɛnabɔ ka ban pewu ka ɲɛsin an ka kɛnɛya ma wa?” Jirali 21:3, 4 kalan.
◼ “Mɔgɔ kelen o kelen min bɛ balo la an ka sigida la, n’o mɔgɔ kelen o kelen ye Bibulu sariyakolow sirataama, e ka jate la, an bɛɛ bɛna nafa sɔrɔ o la cogo di?” Matiyu 22:37-39 kalan.
5 Ikomi an ka ci ye ka Masaya kibaru duman weleweleda, n’a bɛ bɛn tuma o tuma, Masaya bɛna min kɛ, an ka kan ka mɔgɔw dɛmɛ u k’u hakili to o la. I bɛ se k’a fɔ ko:
◼ “Yali i b’a dɔn ko Kitabu min ka kɔrɔ ni diɲɛ kitabuw bɛɛ ye, n’o ye Bibulu ye, k’o y’a fɔ ko gɔfɛrɛnaman kelen bɛna sigi diɲɛ bɛɛ kunna wa?” Daniɛl 2:44 kalan.
◼ “Ni Yesu Krista tun bɛ dugukolo mara la, kow na kɛ cogo di, e ka jate la?” Zaburu 72:7, 8 kalan.
6 Mɔgɔw ka alako ka bon danyɔrɔ min na, i bɛ se ka nin kumajiracogo ninnu dɔ la kelen lajɛ:
◼ “Caman bɛ tɔɔrɔ k’a sababu kɛ ɲɛnawoloma ye, bawo u ye cɛ ye, walima muso ye, walima u fari ɲɛ kosɔn, walima u ka diinɛ kosɔn. E ɲɛ na, Ala bɛ mun miiri o tɔɲɔni sugu ko la?” Kɛwalew 10:34, 35 kalan.
◼ “An b’a dɔn ko Yesu Krista ye kabako caman kɛ a ka waati la. N’i tun bɛ se k’a ɲininka a ka kabako kelen wɛrɛ kɛ, o na kɛ mun ye?” Zaburu 72:12-14, 16 kalan.
7 Ni mɔgɔ dɔ t’a fɛ ka da yɛlɛ, i bɛ se ka baro daminɛ ko:
◼ “Mɔgɔ fanba sɛgɛnna gɛlɛyakow kuma mɛnni la. U b’a fɛ ka kow ɲɛnabɔli cogow kuma de mɛn. An bɛ kow ɲɛnabɔli cogo jɔnjɔnw sɔrɔ an ka gɛlɛyakow la min?” 2 Timote 3:16, 17 kalan.
8 Mun na i tɛna a lajɛ? Tuma caman na, an mago bɛ min na, o ye ɲininkali nɔgɔn n’a pereperelatigɛlen dɔ de ye walisa ka baro nege don an lamɛnbaga la. Fɔlɔ la, muso dɔ min tun kɔdonnen bɛ tiɲɛ na, a y’an balimamuso fila ladon a ka so kɔnɔ katuguni u dɔ la kelen y’a ɲininka ko: “I bɛ delili kɛ Masaya min ko la, n’o fɔlen bɛ Matigi ka delili kɔnɔ, yali i bɛ se k’a fɔ n ye o masaya ye mun ye wa?” O ɲininkali ye muso bila k’a hakili jakabɔ. A sɔnna Bibulu kalan na. Sisan, a ye Jehowa ka maganna dɔ ye min y’a yɛrɛ latɛmɛ Ala ma!
9 N’i bɛ ka kuma mɔgɔ dɔ fɛ, i ka kɛ mɔgɔ sɛbɛ ye i ka kumaw la. U ka bɔ i dusukun na. Ni mɔgɔw daŋaniyalen b’a kan k’an b’u fɛ tiɲɛ na, u sɔn ka di.—Kɛw. 2:46, 47.
10 Kibaru duman weleweledali baara ye ko gɛlɛn ye bi. Mɔgɔ dɔw bɛ siga dunanw na. Dɔ wɛrɛw senna ka teli u ka ɲɛnamaya kɔnɔ, wa lafiya waati bɛrɛ t’u bolo. O bɛɛ n’a ta, an bɛ se ka da a la ko hali bi mɔgɔ caman bɛ yen minnu ka kan n’a ye, an bɛ se ka minnu sɔrɔ. (Mat. 10:11) An bɛ cɛsiri minnu kɛ walisa k’u ɲini, o taɲɛ bɛ bonya n’an b’an ka kumajiracogow kun surunya, ka ‘an dantigɛ’ joona!